ગૂગલ મેપ્સ આવ્યા પછી ભારતના કોઈપણ ખૂણે જવું એકદમ સરળ બની ગયું છે. ગાડીમાં બેઠા, મોબાઈલમાં ગુગલ નકશામાં જે સ્થળે જવાનું છે તે ચોક્કસ સ્થળનું લોકેશન મૂક્યું અને તેને જોઈ જોઈને આગળ વધતા રહેવાનું. આપણે બધા સામાન્ય રીતે આવું કરતા હોઈએ છીએ. પરંતુ ગૂગલ મેપ્સ પર જ એકદમ ભરોસો કરવો હવે સારી વાત રહી નથી. તેના પર આંધળો વિશ્વાસ કરવાથી વ્યક્તિ ક્યારેક મોટી મુશ્કેલીમાં ફસાઈ જાય છે. બિહારથી ગોવા જઈ રહેલા એક પરિવાર સાથે પણ આવી જ ઘટના બની હતી. ગૂગલ મેપ્સના કારણે તેણે આખી રાત ગાઢ જંગલમાં વિતાવવી પડી હતી.
મીડિયા સૂત્રોના જણાવ્યા અનુસાર, પરિવાર બિહારથી ગોવા જઈ રહ્યો હતો. તેથી, તેમણે નેવિગેશન માટે ગૂગલ મેપ્સની મદદ લીધી. કર્ણાટકના બેલગાવી જિલ્લામાં પહોંચ્યા પછી, એપ્લિકેશનમાં તેમને એક નાનો રસ્તો બતાવ્યો, જે ખાનપુરના ગાઢ ભીમગઢ જંગલમાંથી પસાર થતો હતો. 8 કિલોમીટર અંદર ગયા પછી પરિવારને સમજાયું કે આ માર્ગ પર આવીને તેમણે ભૂલ કરી છે. ઉબડખાબડ રસ્તા અને ગાઢ જંગલમાં પહોંચ્યા પછી ફોનનું નેટવર્ક પણ બંધ થઇ ગયું. નેટવર્કની બહાર ગયા પછી, ગૂગલ મેપ્સ પણ તેમને છોડી દીધું. આ પછી, તેઓને જંગલમાંથી બહાર નીકળવાનો કોઈ સ્પષ્ટ રસ્તો દેખાતો ન હતો અને પરિવારને આખી રાત જંગલમાં વિતાવવી પડી હતી.
સવાર થતા તે પરિવારને નેટવર્કની શોધમાં ચાર કિલોમીટર ચાલીને જવું પડ્યું હતું. અંતે તેમને એક જગ્યાએ નેટવર્ક મળ્યું અને તેમણે તાત્કાલિક ઇમરજન્સી હેલ્પલાઇન 112નો સંપર્ક કર્યો. આ પછી પોલીસ પહોંચી અને તેમને જંગલમાંથી બહાર કાઢ્યા. પોલીસના જણાવ્યા અનુસાર આ જંગલ ખતરનાક જંગલી પ્રાણીઓ માટે જાણીતું છે.
ગયા મહિને પણ ઉત્તર પ્રદેશના બરેલી જિલ્લામાં ગૂગલ મેપ્સના કારણે ત્રણ લોકોના મોત થયા હતા, જ્યારે ગૂગલ મેપ્સે તેમની કારને ખોટો રસ્તો બતાવ્યો હતો. કાર નકશા મુજબ ખોટી રીતે નિર્માણાધીન પુલ પર ગઈ હતી, જેના કારણે કાર નદીમાં પડી હતી અને કારમાં મુસાફરી કરી રહેલા ત્રણ લોકોના ઘટનાસ્થળે જ મોત થયા હતા. આ ઘટના ત્યારે બની જ્યારે તેઓ ગુરુગ્રામથી બરેલી લગ્નમાં હાજરી આપવા જઈ રહ્યા હતા. લગ્ન સ્થળ સુધી પહોંચવા માટે તેમણે ગૂગલ મેપ્સની મદદ લીધી. પછી તેનું GPS તેમને અધૂરા ફ્લાયઓવર પર લઈ ગયું. કાર બ્રિજ પર આગળ વધી અને 50 ફૂટની ઊંચાઈએથી રામગંગા નદીમાં પડી ગઈ હતી.
જો કે તે વખતે વહીવટીતંત્ર પર પણ સવાલો ઉઠ્યા હતા. અધૂરા ફ્લાયઓવર પર આ સંદર્ભે કોઈ સાઈન બોર્ડ નહોતું, જેનાથી વાહન ચલાવતા લોકોને બ્રિજનું બાંધકામ ચાલુ હોવાની જાણ થઈ શકે.
