જો તમે IPOમાં રોકાણ કરવાની યોજના બનાવી રહ્યા છો અને આ વર્ષમાં અત્યાર સુધી આવેલા IPOમાં નાણાંનું રોકાણ કરવાનું ચૂકી ગયા છો, તો આ સમાચાર તમારા માટે છે. તમને 2024ના છેલ્લા મહિનામાં આવતા અઠવાડિયે બમ્પર કમાણીની તકો મળવાની છે. ખરેખર, એક-બે નહીં પરંતુ 9 IPO બજારમાં આવી રહ્યા છે. જેમાં સુપરમાર્કેટ ચેઇન ચલાવતી કંપની વિશાલ મેગા માર્ટ અને મોબિક્વિક જેવા ચાર મેઇનબોર્ડ ઇશ્યુનો સમાવેશ થાય છે, ચાલો તમને એના વિશે થોડી માહિતી આપી દઈએ..
વર્ષના છેલ્લા ડિસેમ્બર મહિનામાં IPO માર્કેટમાં ઘણો ગ્રોથ જોવા મળી રહ્યો છે અને તેમાં આગામી સપ્તાહ પણ વ્યસ્ત રહેવાનું છે. હકીકતમાં, 9 કંપનીઓ તેમના IPO લોન્ચ કરવા માટે તૈયાર છે, જેમાં વિશાલ મેગા માર્ટ અને Mobikwik જેવી મોટી કંપનીઓ તેમજ SME સેક્ટરમાં ઘણી ઉભરતી કંપનીઓનો સમાવેશ થાય છે. આનો અર્થ એ થયો કે, રોકાણકારોને માત્ર એક કે બે નહીં પરંતુ કમાવવા માટે નવ તક મળવાની છે. આ બ્લોકબસ્ટર સપ્તાહમાં સ્ટોક માર્કેટમાં ખુલવા જઈ રહેલા ઈસ્યુની પ્રાઇસ બેન્ડથી લઈને લોટ સાઈઝ સુધીની વિગતો આવી ગઈ છે.
મેઈનસ્ટ્રીમ કેટેગરીમાં સુપરમાર્કેટ ચેઈન ચલાવતી કંપની વિશાલ મેગા માર્ટના IPOનું કદ રૂ. 8,000 કરોડ છે અને તે અંતર્ગત 102.56 કરોડ શેર ઓફર ફોર સેલ (OFS) દ્વારા વેચાણ માટે ઓફર કરવામાં આવી રહ્યા છે. તેનો અર્થ એ કે કોઈ નવા શેર બહાર પાડવામાં આવશે નહીં. રોકાણકારો 11 ડિસેમ્બરથી 13 ડિસેમ્બર સુધી આ ઈસ્યુમાં નાણાંનું રોકાણ કરી શકશે અને શેરબજારમાં તેનું લિસ્ટિંગ 18 ડિસેમ્બરે થઈ શકે છે. પ્રાઇસ બેન્ડ વિશે વાત કરીએ તો, તે 74 થી 78 રૂપિયા પ્રતિ શેર નક્કી કરવામાં આવી છે અને તેની લોટ સાઈઝ 190 શેર છે. આ મુજબ રોકાણકારે ઓછામાં ઓછા 14,820 રૂપિયાનું રોકાણ કરવું પડશે.
આવતા અઠવાડિયે ખુલવાનો બીજો મેઈનબોર્ડ IPO સાઈ લાઈફ સાયન્સ લિમિટેડનો છે. કંપનીએ તેના ઈશ્યુ દ્વારા બજારમાંથી રૂ. 3,042.62 કરોડ એકત્ર કરવાની યોજના બનાવી છે. આમાં, રૂ. 950 કરોડના મૂલ્યના 1.73 કરોડ નવા શેર બહાર પાડવામાં આવશે, જ્યારે રૂ. 2,092.62 કરોડના મૂલ્યના 3.81 કરોડ શેર ઓફર ફોર સેલ (OFS) હેઠળ બહાર પાડવામાં આવશે. આ IPO પણ 11 થી 13 ડિસેમ્બર સુધી સબસ્ક્રાઇબ કરી શકાય છે, જ્યારે લિસ્ટિંગની સંભવિત તારીખ 18 ડિસેમ્બર નક્કી કરવામાં આવી છે. કંપનીએ તેના શેરની પ્રાઇસ બેન્ડ રૂ. 522 થી રૂ. 549 પ્રતિ શેર નક્કી કરી છે, જ્યારે લોટનું કદ 27 શેરનું છે અને રોકાણકારોએ ઓછામાં ઓછું રૂ. 14,823નું રોકાણ કરવું પડશે.
યાદીમાં આગળનું નામ One Mobikwik Systems Limitedના IPOનું છે, જેનું કદ રૂ. 572 કરોડ છે. આ હેઠળ, 2.05 કરોડ નવા શેર બહાર પાડવાના છે, અને તે પણ 11-13 ડિસેમ્બર સુધી ખુલ્લા રહેશે, જ્યારે શેર બજારમાં લિસ્ટિંગ 18 ડિસેમ્બરે થશે. પ્રાઇસ બેન્ડ વિશે વાત કરીએ તો, તે શેર દીઠ રૂ. 265 થી રૂ. 279 નક્કી કરવામાં આવી છે અને રોકાણકાર ઓછામાં ઓછા 53 શેર માટે બિડ કરીને ઓછામાં ઓછા રૂ. 14,787નું રોકાણ કરશે.
આગામી અઠવાડિયે ખુલવા જઈ રહેલા મેઈનબોર્ડ ઈશ્યુ ઈન્વેન્ટુરસ નોલેજ સોલ્યુશન્સ લિમિટેડનો IPO છે. જે 12 ડિસેમ્બરે ખુલશે અને તેમાં 16 ડિસેમ્બર સુધી પૈસા રોકી શકાય છે. કંપની ઓફર ફોર સેલ દ્વારા 1.88 કરોડ શેર ઈશ્યુ કરવાની તૈયારી કરી રહી છે, એટલે કે કોઈ નવા શેર ઈશ્યુ કરવામાં આવશે નહીં. 12મી ડિસેમ્બરે ખુલ્યા પછી, આ ઈસ્યુ 16મી ડિસેમ્બરે બંધ થશે અને તેનું સંભવિત લિસ્ટિંગ 19મી ડિસેમ્બરે થઈ શકે છે. જો કે, કંપની દ્વારા હજુ સુધી આ IPO માટે પ્રાઇસ બેન્ડની જાહેરાત કરવામાં આવી નથી.
હવે વાત કરીએ SME બોર્ડમાં આવતા અઠવાડિયે શરૂ થનારા 5 IPOની, તો અમે તમને જણાવી દઈએ કે, ધનલક્ષ્મી ક્રોપ સાયન્સ IPO, જેનું કદ રૂ. 23.80 કરોડ છે, તે 9-11 ડિસેમ્બરે ખુલશે. આ સિવાય જંગલ કેમ્પ્સ ઈન્ડિયા IPO 10-12 ડિસેમ્બર સુધી ખુલ્લો રહેશે અને તેનું કદ 29.42 કરોડ રૂપિયા છે. ટૉસ ધ કોઈન IPOની કિંમત રૂ. 9.17 કરોડ છે, પર્પલ યુનાઈટેડ સેલ્સ IPOની કિંમત રૂ. 32.81 કરોડ છે. આ સિવાય સુપ્રીમ ફેસિલિટી મેનેજમેન્ટનો રૂ. 50 કરોડનો IPO પણ યાદીમાં છે.
નોંધ: શેરબજાર કે IPO માર્કેટમાં કોઈપણ પ્રકારનું નાણાકીય રોકાણ કરતા પહેલા તમારા માર્કેટ એક્સપર્ટની સલાહ ચોક્કસ લો.
