નેશનલ હાઈવે પર મુસાફરી કરતા વાહન ચાલકો માટે કેન્દ્ર સરકારે નિયમો વધુ કડક બનાવ્યા છે. માર્ગ પરિવહન અને રાજમાર્ગ મંત્રાલય દ્વારા લેવાયેલા તાજેતરના નિર્ણય મુજબ, હવે વાહનોના ફિટનેસ સર્ટિફિકેટ, પરમિટ અને માલિકી ટ્રાન્સફર જેવા મહત્વના કાર્યો માટે FASTag ફરજિયાત કરી દેવામાં આવ્યું છે.
નવા નિયમ હેઠળ શું ફેરફાર થયા?
કેન્દ્ર સરકારના નવા ગેઝેટ નોટિફિકેશન મુજબ, ‘સેન્ટ્રલ મોટર વ્હીકલ રૂલ્સ’માં સુધારો કરવામાં આવ્યો છે. હવે નીચેની સેવાઓ મેળવવા માટે વાહન પર સક્રિય (Active) FASTag હોવું અનિવાર્ય છે. કોમર્શિયલ વાહનો માટે ફિટનેસ સર્ટિફિકેટ રિન્યુ કરાવતી વખતે હવે FASTagની તપાસ કરવામાં આવશે. દેશભરમાં માલસામાનની હેરફેર માટે જરૂરી નેશનલ પરમિટ મેળવવા માટે પણ હવે FASTag વગર પ્રક્રિયા આગળ નહીં વધે.
જો તમે જૂનું વાહન વેચવા માંગો છો અથવા બીજાના નામે ટ્રાન્સફર કરવા માંગો છો, તો તે પહેલા વાહન પર FASTag હોવું જરૂરી છે. કોઈ પણ નવા વાહન માટે પરમિટ લેતી વખતે પણ આ નિયમ લાગુ પડશે.
સરકારનો ઉદ્દેશ્ય શું છે?
સરકાર આ પગલા દ્વારા ટોલ કલેક્શન સિસ્ટમને વધુ પારદર્શક અને ડિજિટલ બનાવવા માંગે છે. ઘણા કિસ્સાઓમાં જોવા મળ્યું છે કે વાહન ચાલકો FASTag લગાવતા નથી અથવા બ્લેકલિસ્ટ થયેલા ટેગ સાથે મુસાફરી કરે છે. નવા નિયમથી ટોલ પ્લાઝા પર લાગતી લાંબી લાઈનો ઘટશે, ડિજિટલ પેમેન્ટને પ્રોત્સાહન મળશે, વાહનોના ડેટાબેઝને સરકાર સરળતાથી ટ્રેક કરી શકશે.
વાહન ચાલકોએ શું ધ્યાન રાખવું?
જો તમારા વાહન પર હજુ સુધી FASTag નથી અથવા તે નિષ્ક્રિય છે, તો તમારે તાત્કાલિક તેને એક્ટિવેટ કરાવવું પડશે. જો FASTag સક્રિય નહીં હોય, તો પરિવહન વિભાગ (RTO) માં તમારા વાહનને લગતા કામો અટકી શકે છે. ખાસ કરીને જે લોકો સેકન્ડ હેન્ડ ગાડી ખરીદવા કે વેચવાનું વિચારી રહ્યા છે, તેમણે આ નિયમની ખાસ નોંધ લેવી પડશે.
