પશ્ચિમ બંગાળમાં પોતાની હાર પછી, તૃણમૂલ કોંગ્રેસ (TMC) મુશ્કેલ સમયમાંથી પસાર થઈ રહી છે. પાર્ટીના વરિષ્ઠ નેતાઓ ખુલ્લેઆમ પોતાનો અસંતોષ વ્યક્ત કરી રહ્યા છે. આ દરમિયાન, ભારતીય જનતા પાર્ટી (BJP)ના વરિષ્ઠ નેતા સૌમિત્ર ખાને દાવો કર્યો છે કે 20 TMC સાંસદો BJP સાથે સંપર્કમાં છે. તેમણે એમ પણ કહ્યું કે, જો કેન્દ્રીય નેતૃત્વ મંજૂરી આપે તો તેઓ પક્ષ બદલવા માટે તૈયાર છે. TMCએ આ દાવાને ‘પાયાવિહોણો’ ગણાવીને ફગાવી દીધો હતો.
કોઈ પણ સાંસદનું નામ લીધા વિના, 3 વખત લોકસભાના સાંસદ રહેલા સૌમિત્ર ખાને પત્રકારોને જણાવ્યું હતું કે, ’20 TMC સાંસદો BJPમાં જોડાવા માટે તૈયાર છે. જો BJPનું કેન્દ્રીય નેતૃત્વ એકવાર કહેશે, તો TMC પાર્ટીનું અસ્તિત્વ ખતમ થઈ જશે. દરેક વ્યક્તિ BJPમાં જોડાવા માટે તૈયાર છે.’
તેમણે એવો પણ દાવો કર્યો હતો કે, 50 TMC ધારાસભ્યો પાર્ટીથી નાખુશ છે. BJPના નેતા સૌમિત્રએ કહ્યું કે, જો BJP ઈચ્છે તો આગામી થોડા દિવસોમાં સમગ્ર TMCનો નાશ થઈ જશે.
પશ્ચિમ બંગાળની 42 લોકસભા બેઠકોમાંથી, TMC પાસે હાલમાં 29 સાંસદો છે. BJP પાસે 12 અને કોંગ્રેસ પાસે એક છે. પક્ષપલટા વિરોધી કાયદા મુજબ, સંસદીય પક્ષના ઓછામાં ઓછા બે તૃતીયાંશ સભ્યોએ ગેરલાયક ઠેરવવાથી બચવા માટે એક સાથે પક્ષ બદલવો પડશે. TMCના કિસ્સામાં જોવા જઈએ તો, લોકસભામાં 29 સાંસદો સાથે, આ સંખ્યા 20ની આસપાસ બને છે.
તૃણમૂલ કોંગ્રેસ (TMC)એ BJP નેતા સૌમિત્ર ખાનના દાવાઓને ફગાવી દીધા છે. TMCના વરિષ્ઠ નેતા અને સાંસદ સૌગત રોયે આ અહેવાલોને ‘પાયાવિહોણા’ ગણાવ્યા. એક સમાચાર એજન્સીએ તેમનો ઉલ્લેખ કરીને કહ્યું, ‘આ સંપૂર્ણપણે પાયાવિહોણા છે, જેને BJP અને સૌમિત્ર ખાન મીડિયામાં ફેલાવી રહ્યા છે. આવું કંઈ પણ થવાનું નથી.’
2021ની વિધાનસભા ચૂંટણી પહેલા, TMCના ઘણા વરિષ્ઠ નેતાઓ BJPમાં જોડાયા હતા, પરંતુ TMC સત્તામાં આવ્યા પછી તેઓ પોતાની પાર્ટીમાં પાછા ફર્યા હતા. રાજકીય નિષ્ણાતો કહે છે કે, આ વખતે પરિસ્થિતિ અલગ દેખાય છે. BJPએ TMCના 15 વર્ષના શાસનનો અંત લાવ્યો છે અને બંગાળમાં સત્તા મેળવી છે.
પશ્ચિમ બંગાળમાં કારમી હાર પછી, TMC મુશ્કેલ તબક્કામાંથી પસાર થઈ રહી છે. છેલ્લા કેટલાક દિવસોમાં, વિવિધ નગરપાલિકાઓના લગભગ 100 કોર્પોરેટરોએ રાજીનામું આપી દીધું છે. લોકસભા સાંસદ કાકોલી ઘોષ દસ્તીદારે પણ 6 ધારાસભ્યો સાથે BJPની બેઠકમાં હાજરી આપી હતી. બંગાળના રાજકીય વર્તુળોમાં આના વિવિધ અર્થ નીકાળવામાં આવી રહ્યા છે. અટકળો ચાલી રહી છે કે કાકોલી ઘોષ અને અન્ય ઘણા ધારાસભ્યો BJPમાં જોડાઈ શકે છે.