લોકો ઘણીવાર અજાણ્યા રસ્તાઓ પર આગળ વધવા માટે GPS અને Google Maps પર આધાર રાખતા હોય છે. ઘણી વખત આ ટેકનોલોજી ખુબ મદદરૂપ સાબિત થાય છે, પરંતુ વગર વિચાર્યે તેણે બતાવેલા રસ્તાઓ પર આંખ બંધ કરીને ફોલો કરવું ઘણી વખત મુસીબતને આમંત્રણ આપતું હોય છે. USAના સિએટલ શહેરમાં બનેલી એક ઘટના આ વાત સાબિત કરે છે. અહીં એક વૃદ્ધ મહિલા GPS સિગ્નલને ફોલો કરીને તે રસ્તે આગળ વધતી રહી અને સીધી રેલ્વે ટ્રેક પર પોતાની કાર લઇ ગઈ. આ ઘટના એટલી ખતરનાક હતી કે જોનારાઓ પણ થોડીક ક્ષણો વિચારી રહ્યા હતા કે આ કાર રેલ્વે ટ્રેક પર પહોંચી કેવી રીતે. જોત જોતામાં આ વીડિયો સોશિયલ મીડિયા પર ઝડપથી વાયરલ થઇ ગયો, અને લોકો તેના પર પોતાની રમુજી પ્રતિક્રિયાઓ આપવા લાગ્યા.
અહેવાલો અનુસાર, આ ઘટના 2 જૂનના રોજ સાંજે 6:20 વાગ્યે સિએટલના માઉન્ટ બેકર સ્ટેશન નજીક બની હતી. 70 વર્ષીય મહિલા પોતાની Mazda CX-5 SUV ચલાવી રહી હતી. એવું કહેવામાં આવી રહ્યું છે કે, તે GPSના નિર્દેશોનું પાલન કરી રહી હતી, પરંતુ અચાનક જ તે શહેરની લાઇટ રેલ લાઇન પર આવી ગઈ. આશ્ચર્યની વાત તો એ છે કે, મહિલા લગભગ એક માઇલના ચોથા ભાગ સુધી રેલ્વે ટ્રેક પર પોતાનું વાહન ચલાવતી રહી. ત્યારપછી, તેની કાર ટ્રેક પર જ ફસાઈ ગઈ અને આગળ જતા બંધ થઇ ગઈ. સ્ટેશન પરના મુસાફરોએ જ્યારે કારને પાટા પર જોઈ તો તેઓ ચોંકી ગયા.
કાર પાટા પર ફસાઈ ગયા પછી, સ્થાનિક વહીવટીતંત્ર અને પરિવહન એજન્સીએ તાત્કાલિક કાર્યવાહી કરવી પડી. સલામતીના કારણોસર, પહેલા રેલ્વે લાઇનનો વીજ પુરવઠો કાપી નાખવામાં આવ્યો. ત્યારપછી, ક્રેન અને અન્ય સાધનોનો ઉપયોગ કરીને કારને પાટા પરથી દૂર કરવામાં આવી. આ સમગ્ર પ્રક્રિયામાં લગભગ બે કલાક લાગ્યા. પરિણામે, શહેરની લાઇન 1 લાઇટ રેલ સેવાને અસ્થાયી રૂપે સ્થગિત કરવી પડી, જેના કારણે મુસાફરોને અસુવિધા થઈ. સ્થાનિક પરિવહન એજન્સીએ પાછળથી સમગ્ર કામગીરીનો એક વીડિયો પણ બહાર પાડ્યો, જેમાં કારને પાટા પરથી દૂર કરવામાં આવી તે દર્શાવવામાં આવ્યું છે.
અધિકારીઓ સામે સૌથી મોટો પ્રશ્ન એ છે કે, મહિલા પાટા પર પહોંચી કેવી રીતે. પ્રારંભિક તપાસ સૂચવે છે કે તે જ્યાંથી રેલ્વે લાઇન રસ્તાના એક લેવલ પરથી પસાર થાય છે, તે જગ્યાએથી પાટા પર ચઢી ગઈ હશે. અહેવાલો અનુસાર, માઉન્ટ બેકર સ્ટેશનથી લગભગ અડધો માઇલ દૂર, એક એવો વિસ્તાર છે જ્યાં રોડ અને રેલ્વે લાઇન એકબીજાની ખૂબ નજીક છે. એવી શંકા છે કે મહિલા આકસ્મિક રીતે ત્યાંથી પાટા પર ચાલી ગઈ હતી.
સિએટલ પોલીસ વિભાગના અધિકારી પેટ્રિક માઇકલના જણાવ્યા અનુસાર, મહિલા નશામાં ન હતી. જોકે, પૂછપરછ દરમિયાન, તે મૂંઝાયેલી દેખાઈ અને પ્રશ્નોના જવાબ આપવામાં ઘણો સમય લાગ્યો. પોલીસે હજુ સુધી સ્પષ્ટ કર્યું નથી કે મહિલા સામે કોઈ કાનૂની કાર્યવાહી કરવામાં આવી છે કે નહીં. મામલાની તપાસ હજુ ચાલુ છે. પોલીસનું કહેવું છે કે દિશા નિર્દેશ આપતી સિસ્ટમે મહિલાને એક જગ્યાએથી વળવાની સૂચના આપી હતી, જ્યાં રસ્તાની બાજુમાં એલિવેટેડ રેલ્વે ટ્રેક તરફ જતો રેમ્પ અથવા જાળવણીનો રસ્તો હતો. મહિલાએ ધ્યાન આપ્યા વિના અને આગળની પરિસ્થિતિને સમજ્યા વિના, GPSની સૂચનાઓનું પાલન કર્યું અને કાર સીધી રેલ્વે ટ્રેક પર ચઢાવી દીધી.
સૌથી આશ્ચર્યજનક વાત એ છે કે, પાટા પર ચઢ્યા પછી, કારને ઝટકા લાગી રહ્યા હતા અને રેલવેના પાટા સ્પષ્ટ દેખાઈ રહ્યા હતા, છતાં મહિલાને પોતાની ભૂલ સમજાઈ નહીં. તે GPS તરફથી વધુ સૂચનાઓની રાહ જોતી ટ્રેક વચ્ચે ઘણે આગળ સુધી કાર ચલાવતી રહી. તેનું નસીબ સારું હતું કે ઘટના સમયે ટ્રેક પર કોઈ પેસેન્જર કે માલગાડી સામેથી આવતી નહોતી, નહીં તો ભયંકર અને જીવલેણ અકસ્માત થઈ શક્યો હોત. સ્ટેશન અને નજીકના લોકો જ્યારે કારને ટ્રેક પર આગળ વધતી જોઈને તેઓ ચોંકી ગયા. તેમણે તાત્કાલિક મહિલાને કાર રોકવા માટે બૂમો પાડી અને રેલ્વે અધિકારીઓ અને પોલીસને જાણ કરી. માહિતી મળતાં, તે રૂટ પરની બધી ટ્રેનો તાત્કાલિક રોકી દેવામાં આવી. પોલીસ ઘટનાસ્થળે પહોંચી અને વૃદ્ધ મહિલાને કારમાંથી સુરક્ષિત રીતે બહાર કાઢી. ત્યાર પછી, ક્રેનની મદદથી કારને પાટા પરથી નીચે દૂર કરવામાં આવી. પોલીસે અહેવાલ આપ્યો કે મહિલા સંપૂર્ણપણે સુરક્ષિત છે, પરંતુ ઘટનાથી ખૂબ જ ડરી ગઈ અને ગભરાઈ ગઈ હતી.
આ ઘટનાનો વીડિયો ઇન્ટરનેટ પર વાયરલ થતાં જ લોકોએ તેના પર જોરદાર પ્રતિક્રિયા આપવાનું શરુ કર્યું. ઘણા યુઝર્સે તેની મજાક ઉડાવી, તેને વીડિયો ગેમ સાથે જોડી દીધી. એક યુઝરે લખ્યું, ‘શું GTA 6 લોન્ચ થઈ ગયું છે?’ બીજા યુઝરે કહ્યું, ‘GPS ઠીક છે, પરંતુ ક્યારેક તમારે તમારી આંખો અને મગજનો પણ ઉપયોગ કરવો જોઈએ.’ બીજા યુઝરે મજાકમાં લખ્યું કે, ‘સૌથી મજાની વાત એ હતી કે મહિલા સ્ટેશન પહોંચ્યા પછી જ રોકાઈ ગઈ, જાણે કે તે પોતે જ ટ્રેન હોય. આ દરમિયાન, ઘણા લોકોએ ધ્યાન દોર્યું કે, ટેકનોલોજી પર જરૂરત કરતા વધારે આધાર રાખવો ખતરનાક બની શકે છે અને કોઈપણ સૂચનાને આંખ બંધ કરીને ફોલો ન કરવી જોઈએ.
આજે GPS અને ડિજિટલ મેપ્સ આપણા જીવનનો મહત્વનો ભાગ બની ગયા છે. જો કે, નિષ્ણાતો માને છે કે કોઈપણ ટેકનોલોજીનો ઉપયોગ કરતી વખતે માનવીની સમજણ અને સાવધાની પણ એટલી જ મહત્વપૂર્ણ છે. મશીનો રસ્તો બતાવી શકે છે, પરંતુ શું સાચું છે અને ખોટું શું છે, તે નક્કી કરવાનું કામ માણસોએ જ કરવાનું હોય છે.