ન્યૂઝીલેન્ડ સામેની ટેસ્ટ સીરિઝ પહેલા ભારતીય કેપ્ટન શુભમન ગિલે પોતાની તૈયારીઓ માટે એક ખાસ રણનીતિ બનાવી છે. અહેવાલો અનુસાર, તે પ્રવાસ પર 4-5 વ્યક્તિગત નેટ બોલરોને પોતાની સાથે લઇ જશે અને તેમના આવવા-જવાથી લઇને રહેવા સહિતનો તમામ ખર્ચ પોતે ઉઠાવશે. આ બોલરો સાથે પ્રેક્ટિસ કરીને ગિલ ન્યૂઝીલેન્ડની પરિસ્થિતિઓ અનુસાર પોતાની બેટિંગ સારી કરવા પર ધ્યાન આપશે.
સામાન્ય રીતે ભારતીય ક્રિકેટ કંટ્રોલ બોર્ડ (BCCI) ખેલાડીઓ માટે વિદેશી પ્રવાસો પર પ્રેક્ટિસ કરવા માટે નેટ બોલરોની વ્યવસ્થા કરે છે. પરંતુ, શુભમન ગિલે પોતાના બોલરોની વ્યવસ્થા કરવાનો નિર્ણય લીધો છે. આ પગલું ટેસ્ટ ક્રિકેટની તૈયારી અંગે ગંભીરતા દર્શાવે છે.
PTIના અહેવાલ મુજબ, BCCIના એક અધિકારીએ જણાવ્યું હતું કે શુભમન ગિલ ઇન્ડિયા A ટેસ્ટ મેચોમાં ભાગ નહીં લે કારણ કે તેણે ODI સીરિઝ પણ રમવાની છે. અધિકારીના જણાવ્યા મુજબ, શુભમન 23 કે 24 ઓક્ટોબરે ન્યૂઝીલેન્ડ જવા રવાના થઇ શકે છે. તેમની સાથે જનારા 4-5 બોલરોનો સંપૂર્ણ ખર્ચ કેપ્ટન ઉઠાવશે.
શુભમન ગિલે ગયા વર્ષે ઇંગ્લેન્ડ સામેની 5 ટેસ્ટ મેચની સીરિઝમાં 754 રન બનાવીને પોતાની બેટિંગનો દમ બતાવ્યો હતો. હવે, ન્યૂઝીલેન્ડ સામે એક અલગ પડકાર હશે. ત્યાંની પરિસ્થિતિઓમાં ફાસ્ટ બોલરોની મદદ મળવાની સંભાવના છે, એવામાં ટેકનિક, ધૈર્ય અને પરિસ્થિતિઓ મુજબ રમવાની ક્ષમતા મહત્ત્વપૂર્ણ રહેશે.
ન્યૂઝીલેન્ડ જતા પહેલા શુભમન ગિલ પંજાબ તરફથી રણજી ટ્રોફી રમશે. વ્યક્તિગત કારણોસર, તે ટીમની પહેલી મેચ રમી શક્યો નહોતો, પરંતુ 18 ઓક્ટોબરથી મુલ્લાંપુરમાં છત્તીસગઢ સામેની મેચ માટે વાપસી થવાની છે. રણજી ટ્રોફીની આ મેચ શુભમન ગિલને સ્પર્ધાત્મક લાલ-બોલ ક્રિકેટ રમવાની તક આપશે. ત્યારબાદ, ન્યૂઝીલેન્ડમાં તેની તૈયારી અને કેપ્ટનશીપ બંને પર નજર રહેશે. ભારત માટે આ પ્રવાસ મહત્ત્વપૂર્ણ છે, અને ગિલની બેટિંગ ટીમની સફળતામાં મહત્ત્વપૂર્ણ ભૂમિકા ભજવી શકે છે.
નકશા જુઓ
ભારત Vs ન્યૂઝીલેન્ડ (શેડ્યૂલ)
પ્રથમ T20: 22 ઓક્ટોબર, ક્રાઇસ્ટચર્ચ, બપોરે 12:30
બીજી T20: 24 ઓક્ટોબર, ક્રાઇસ્ટચર્ચ, બપોરે 12:30
ત્રીજી T20: 27 ઓક્ટોબર, વેલિંગ્ટન, બપોરે 12:30
ચોથી T20: 30 ઓક્ટોબર, ઓકલેન્ડ, બપોરે 12:30
પાંચમી T20: 1 નવેમ્બર, હેમિલ્ટન, બપોરે 12:30
પ્રથમ વન-ડે: 4 નવેમ્બર, ઓકલેન્ડ, સવારે 7:30
બીજી વન-ડે: 7 નવેમ્બર, વેલિંગ્ટન, સવારે 7:30
ત્રીજી વન-ડે: 10 નવેમ્બર, હેમિલ્ટન, સવારે 7:30
ચોથી વન-ડે: 13 નવેમ્બર, માઉન્ટ માઉંગાનુઈ, સવારે 7:30
પાંચમી વન-ડે: 15 નવેમ્બર, માઉન્ટ મૌંગાનુઈ, સવારે 7:30
પ્રથમ ટેસ્ટ: 19 નવેમ્બરથી 23 નવેમ્બર વેલિંગ્ટન, સવારે 3:30
બીજી ટેસ્ટ: 27 નવેન્બરથી 1 ડિસેમ્બર, ક્રાઇસ્ટચર્ચ, સવારે 3:30