મનોજ બાજપેયી હિન્દી ફિલ્મ ઈન્ડસ્ટ્રીનું મોટું નામ છે. તેણે પોતાની અભિનય પ્રતિભાથી લાખો દર્શકોને દિવાના બનાવ્યા છે. ભાગ્યે જ કોઈ એવી ભૂમિકા હશે, જે મનોજ બાજપેયી ભજવી ન શકે. સિનેમા પ્રેમીઓ તેમના જેવા બનવાનો પ્રયાસ કરે છે. મનોજ તેના અભિનયની સાથે સાથે તેની સ્પષ્ટવક્તા શૈલી માટે પણ જાણીતો છે. તે ઘણીવાર ખુલ્લેઆમ પોતાના વિચારો વ્યક્ત કરે છે. પોતાના નવા ઈન્ટરવ્યુમાં મનોજ બાજપેયીએ કંગના રનૌત વિશે વાત કરી છે.
એક ઈવેન્ટમાં મનોજ બાજપેયીને પૂછવામાં આવ્યું કે, શું તમે કંગના રનૌતને ફોલો કરો છો? તો અભિનેતાએ જવાબ આપ્યો, ‘હું માનું છું કે કંગના રનૌત એક શ્રેષ્ઠ અભિનેત્રી છે. તે ખૂબ જ અદભૂત અભિનેત્રી છે. જ્યારે મેં તેની પહેલી ફિલ્મ ‘ગેંગસ્ટર’ અને ‘વો લમ્હે’ જોઈ ત્યારે હું પાગલ થઈ ગયો હતો કે, આટલી નાની ઉંમરમાં કોઈ આટલી અદભૂત એક્ટિંગ કેવી રીતે કરી શકે?
વાતચીત દરમિયાન મનોજ બાજપેયીએ કંગના રનૌતના ચૂંટણી લડવાના સમાચાર પર પણ પ્રતિક્રિયા આપી હતી. તેણે કહ્યું કે, તે પણ આનાથી દુખી થયો છે. અભિનેતાએ કહ્યું, ‘મેં ક્યાંક વાંચ્યું હતું કે કંગના રનૌત ચૂંટણી લડી શકે છે. તે એટલી અદભૂત અભિનેત્રી છે. તેથી જ હું ચૂંટણીના સમાચારથી દુઃખી થયો હતો.’
વાતચીત દરમિયાન મનોજ બાજપેયીએ પોતાના ફેવરિટ બોલિવૂડ સ્ટાર્સ વિશે પણ વાત કરી. જ્યારે અભિનેતાને પૂછવામાં આવ્યું કે, તે બોલિવૂડના કયા અભિનેતાને શ્રેષ્ઠ માને છે. તો તેના જવાબમાં મનોજ બાજપેયીએ કહ્યું કે, ‘હું ઈન્ડસ્ટ્રીમાં કોઈ અભિનેતાને નસીરુદ્દીન શાહ કરતાં વધુ સારો નથી માનતો.’ જ્યારે બેસ્ટ એક્ટ્રેસના સવાલ પર તેણે કહ્યું કે, આજકાલ અભિનેત્રીઓ અદ્ભુત કામ કરી રહી છે. અભિનેતાએ કોંકણા સેન શર્મા, કંગના રનૌત, રસિકા દુગ્ગલ અને તબ્બુને તેની પ્રિય અભિનેત્રી ગણાવી હતી.
પ્રોજેક્ટ્સની વાત કરીએ તો મનોજ બાજપેયી નેટફ્લિક્સ સીરિઝ ‘કિલર સૂપ’માં જોવા મળ્યો હતો. આ શોમાં તેણે ડબલ રોલ કર્યો હતો, જેની ખૂબ પ્રશંસા થઈ હતી. આ સિરીઝની હિરોઈન કોંકણા સેન શર્મા હતી. આ સિવાય મનોજની ફિલ્મ ‘જોરમ’ પણ પ્રાઈમ વીડિયો પર રિલીઝ થઈ હતી, જેને ઘણો પ્રેમ મળ્યો હતો. હવે અભિનેતા ‘ભૈયા જી’ સાથે થિયેટરોમાં આવવા માટે તૈયાર છે. આ ફિલ્મ 24મી મેના રોજ રીલિઝ થશે. આ સિવાય મનોજ તેની હિટ સિરીઝ ‘ફેમિલી મેન’ની નવી સીઝનમાં પણ જોવા મળશે.