હરિયાણામાં વિધાનસભા ચૂંટણીમાં BJP (હરિયાણા BJP)ની પરેશાનીઓ ઓછી થવાના કોઈ સંકેત દેખાઈ રહ્યા નથી. BJPએ સિરસામાંથી પોતાના ઉમેદવારનું નામાંકન પાછું ખેંચી લીધું છે, જ્યારે પ્રદેશ અધ્યક્ષ મોહન લાલ બડોલીને તેના વિશે કોઈ માહિતી નથી. તેમને ખબર નથી કે BJPએ સિરસામાં શા માટે ઉમેદવારનું નામ પાછું ખેંચ્યું છે. હાલમાં તેમણે આ મામલે BJPના ઉમેદવાર રોહતાશ જાંગડાને મળવા બોલાવ્યા છે.
હકીકતમાં, મોહન લાલ બડોલી મંગળવારે હરિયાણાના રોહતકમાં હતા. આ દરમિયાન જ્યારે તેમને સિરસામાં BJP ઉમેદવારનું નામાંકન પાછું ખેંચવા વિશે પૂછવામાં આવ્યું ત્યારે તેમણે કહ્યું કે રોહતાશ જાંગડાને પૂછવામાં આવશે કે તેમણે પોતાનું નામાંકન કેમ પાછું ખેંચ્યું. બડોલીએ જણાવ્યું કે, જાંગડાને બોલાવવામાં આવ્યા છે. જો કે તેમણે આ મામલે વધુ કહેવાનો ઇનકાર કર્યો હતો. જ્યારે, ગોપાલ કાંડા સાથેના ગઠબંધન અંગે બડોલીએ કહ્યું કે, BJPનું હિલોપા સાથે ગઠબંધન નથી.
હકીકતમાં, હરિયાણામાં BJPએ ચૂંટણી પહેલા સિરસાના ધારાસભ્ય ગોપાલ કાંડાની હરિયાણા લોકહિત પાર્ટી સાથે ગઠબંધન કર્યું હતું. આ દરમિયાન બંને પક્ષો વચ્ચે ખેંચતાણ ચાલી રહી હતી. BJP કાંડા સાથે ગઠબંધનની વાત કરતી રહી. છેલ્લી ઘડીએ BJPએ સિરસાથી પોતાનો ઉમેદવાર ઉતાર્યો અને અહીંથી રોહતાશ જાંગડાને ટિકિટ આપી. આ સમય દરમિયાન ગોપાલ કાંડાએ INLD અને BSP સાથે ગઠબંધન કરી લીધું.
જો કે, BJPના ઉમેદવાર રોહતાશ જાંગડાએ 16 સપ્ટેમ્બરે પોતાનું નામાંકન પાછું ખેંચ્યું હતું અને તેથી આ બેઠક પર હવે BJP પાસે કોઈ ઉમેદવાર નથી. બીજી તરફ, BJPના ઉમેદવારના નામાંકન પાછું ખેંચવા પર ગોપાલ કાંડાએ કહ્યું હતું કે, તેમણે આ બાબતે BJP સાથે કોઈ વાત કરી નથી. બીજી તરફ પોતાનું નોમિનેશન પાછું ખેંચ્યા પછી રોહતાશ જાંગડાએ મીડિયા સાથેની વાતચીતમાં કહ્યું હતું કે, સંગઠનની વિનંતી પર જ તેમણે પોતાનું નામાંકન પાછું ખેંચ્યું છે.
અત્રે ઉલ્લેખનીય છે કે, BJP સિરસાના રાજકીય વમળમાં ઘેરાયેલું છે. અગાઉ તેમણે કહ્યું હતું કે, પાર્ટીનું હિલોપા સાથે ગઠબંધન છે અને તેથી એવી ચર્ચા હતી કે, ગોપાલ કાંડા અહીં સંયુક્ત ઉમેદવાર હશે, પરંતુ ત્યાર પછી BJPએ અહીંથી ઉમેદવાર ઉતાર્યા અને પછી અંતિમ ક્ષણે તેમનું નામાંકન પાછું ખેંચ્યું. આવી સ્થિતિમાં BJP અહીં સંપૂર્ણ મૂંઝવણમાં છે. પાર્ટી અને સંગઠન અહીં અલગ-અલગ લાઇન પર ચાલી રહ્યા છે.
