તમને આ સાંભળવામાં કે વાંચવામાં વિચિત્ર લાગશે, પરંતુ પાકિસ્તાનમાં પતંગ ઉડાડવા, એક પૈડા પર બાઇક ચલાવવા અને હવામાં ગોળીબાર કરવાને બિન-ઇસ્લામિક જાહેર કરવામાં આવ્યા છે. પોલીસ વિભાગ સાથે વાતચીત અને વિચાર કર્યા પછી, લાહોરના દારુલ ઇફ્તા જામિયા નઈમિયા દ્વારા આ સંદર્ભમાં ફતવો બહાર પાડવામાં આવ્યો છે. ફતવામાં કુરાન અને હદીસની અનેક આયતોનો ઉલ્લેખ કરીને કહેવામાં આવ્યું હતું કે, આ ત્રણ કામ કરવું ગુનો છે અને ઇસ્લામ અનુસાર હરામ પણ છે. ફતવામાં આ ત્રણેય પાછળના કારણો પણ આપવામાં આવ્યા છે અને કહેવામાં આવ્યું છે કે, આના કારણે માનવ જીવન જોખમમાં મુકાઈ રહ્યું છે. ઇસ્લામમાં એવા કોઈપણ કાર્ય જે માનવ જીવન માટે જોખમ ઊભું કરે છે તેને હરામ માનવામાં આવે છે. એટલા માટે તેમના પર પ્રતિબંધો લાદવામાં આવે છે.
લાહોર પોલીસ દ્વારા એક માહિતી પ્રકાશિત કરવામાં આવી હતી જેમાં કહેવામાં આવ્યું હતું કે, દેશમાં મોટી સંખ્યામાં લોકો પતંગની દોરી, ખોટી બાઇક ચલાવવા અને હવામાં ગોળીબારને કારણે મૃત્યુ પામે છે. ખુશીના પ્રસંગોએ ઘણીવાર હવાઈ ગોળીબાર કરવામાં આવે છે. ફતવામાં કહેવામાં આવ્યું હતું કે, આ ત્રણ બાબતોને કારણે એવી ઘટનાઓ બની રહી છે, જેના કારણે પરિવારમાં શોકનો માહોલ છવાઈ જાય છે. તેથી આને બિન-ઇસ્લામિક અને હરામ જાહેર કરવામાં આવે છે. લાહોર પોલીસ અને ઇસ્લામિક સંગઠનો દ્વારા બહાર પડાયેલા ફતવામાં ચેતવણી આપવામાં આવી છે કે, આ પ્રવૃત્તિઓમાં સામેલ લોકોને સજા કરવામાં આવશે. એવું કહેવામાં આવ્યું છે કે, આ માનવ જીવન માટે ખતરો છે. તેથી આ માટે કોઈને પરવાનગી આપી શકાય નહીં.
ઇસ્લામિક વિદ્વાનોએ ફતવો બહાર પાડીને કહ્યું કે, ઇસ્લામ હંમેશા માનવ જીવન બચાવવાની હિમાયત કરે છે. તેથી તેને જોખમમાં મૂકે તેવી કોઈપણ વસ્તુ હોય તે બિન-ઇસ્લામિક હશે. ફતવામાં કહેવામાં આવ્યું છે કે, આવા કાર્યો કરવા એ આત્મહત્યા કરવા બરાબર છે અને ઇસ્લામમાં આવું કરવું હરામ છે. લાહોરના DIG ઓપરેશન્સ ફૈઝલ કામરાને કહ્યું કે, જામિયા નઈમિયા દ્વારા આવો ફતવો બહાર પાડવામાં આવ્યો છે. તેમાં કહેવામાં આવ્યું છે કે, આ વસ્તુઓ બિન-ઇસ્લામિક અને હરામ છે.
સ્થાનિક મીડિયા સૂત્રો અનુસાર, તેમણે કહ્યું કે તેમના કારણે લોકોને મૃત્યુનો સામનો કરવો પડે છે. એટલા માટે તેમના પર પ્રતિબંધ લાદવામાં આવ્યો છે. તેમણે કહ્યું કે, આવી પ્રવૃત્તિઓમાં સામેલ સેંકડો લોકોની ધરપકડ પણ કરવામાં આવી છે. તેમણે કહ્યું કે, એક જ પૈડા પર બાઇક ચલાવવાનો પ્રયાસ કરનારા 151 લોકોની ધરપકડ કરવામાં આવી છે. આ ઉપરાંત પતંગ ઉડાવવા બદલ 150 કેસ પણ નોંધાયા છે. હવાઈ ફાયરિંગના 118 આરોપીઓને પણ જેલમાં મોકલવામાં આવ્યા છે.
