પંજાબ નેશનલ બેંક સાથે 13,000 કરોડ રૂપિયાની છેતરપિંડી કરીને ભાગી ગયેલા હીરા ઉદ્યોગપતિ મેહુલ ચોક્સીની પશ્ચિમ યુરોપિયન દેશ બેલ્જિયમમાં ધરપકડ કરવામાં આવી છે. ભારતીય તપાસ એજન્સીઓ 7 વર્ષથી ચોક્સીને શોધી રહી છે અને CBIના સૂત્રોએ જણાવ્યું છે કે, મેહુલને બેલ્જિયમ પોલીસે પકડી લીધો છે.
CBI અને ED બંને તપાસ એજન્સીઓ મેહુલ ચોક્સીને શોધી રહી છે. આવી સ્થિતિમાં, ચોક્સીની બેલ્જિયમ પોલીસે 12 એપ્રિલના રોજ ધરપકડ કરી હતી. મેહુલ ચોક્સી 2018માં ભારત છોડીને એન્ટિગુઆ ગયો હતો અને પછી ગુમ થઈ ગયો હતો. ભારત સરકારે તેના પ્રત્યાર્પણ માટે અનેક પ્રયાસો કર્યા પરંતુ કાનૂની ગૂંચવણોને કારણે તે છેલ્લી વખત ભાગી જવામાં સફળ રહ્યો.
હકીકતમાં, ભારતીય એજન્સીઓને મેહુલ ચોક્સી બેલ્જિયમમાં હોવાની માહિતી મળી હતી. આ પછી, ED અને CBIએ ત્યાંના અધિકારીઓનો સંપર્ક કર્યો અને કેસ વિશે સંપૂર્ણ માહિતી શેર કરી. ભારતે બેલ્જિયમથી મેહુલ ચોક્સીના પ્રત્યાર્પણની વિનંતી કરી છે. આ પછી, બેલ્જિયમ પોલીસે મેહુલ ચોક્સી પર નજર રાખી જેથી તે ભાગી ન જાય. બીજી તરફ, તેની વિરુદ્ધ તપાસ કર્યા પછી અને નક્કર પુરાવા મળ્યા પછી, બેલ્જિયમ પોલીસે તેની ધરપકડ કરી.
અહીં તમને જણાવી દઈએ કે, મેહુલ ચોક્સીને ભારત પરત લાવવા માટે, પ્રત્યાર્પણ માટે એક નવો રસ્તો પસંદ કરવામાં આવ્યો હતો અને મેહુલ ચોક્સી વિરુદ્ધ બહાર પડાયેલી ઇન્ટરપોલ નોટિસ પાછી ખેંચી લેવામાં આવી હતી. CBI અને EDએ બેલ્જિયમનો સંપર્ક કર્યો હતો. પ્રત્યાર્પણ વિનંતીના ભાગ રૂપે, ભારતીય એજન્સીઓએ 2018 અને 2021માં મુંબઈની એક ખાસ અદાલત દ્વારા બહાર પડાયેલા બે ઓપન-એન્ડેડ ધરપકડ વોરંટ તેમના બેલ્જિયમ અધિકારીઓને બજાવ્યા હતા અને તેની ધરપકડ પછી, બંને દેશોની એજન્સીઓ કાગળની કાર્યવાહીમાં વ્યસ્ત છે.
મેહુલ ચોક્સીના ભારત પ્રત્યાર્પણ અંગે વાત કરીએ તો, સૂત્રોના જણાવ્યા અનુસાર, ભારત સરકાર મેહુલ ચોક્સીને શક્ય તેટલી વહેલી તકે પરત લાવવાનો પ્રયાસ કરી રહી છે, પરંતુ બેલ્જિયમની અદાલતોમાં કાનૂની અવરોધો પ્રક્રિયામાં વિલંબ કરી શકે છે. મળતી માહિતી મુજબ, મેહુલ ચોકસી સ્વાસ્થ્યના કારણોસર તેની પત્ની સાથે બેલ્જિયમમાં રહે છે. મેહુલ ચોક્સી બેલ્જિયમથી સ્વિટ્ઝર્લેન્ડ ભાગી જવાનો પ્રયાસ કરી રહ્યો હતો. એવું માનવામાં આવે છે કે, તે ખરાબ સ્વાસ્થ્ય અને અન્ય કારણોસર જામીન પણ માંગી શકે છે, તેમના વકીલો પણ આ સંકેત આપી રહ્યા છે.
અગાઉ, જ્યારે મેહુલ ચોક્સી એન્ટિગુઆમાં હતો, ત્યારે ત્યાંની હાઈકોર્ટમાં તેના પ્રત્યાર્પણની પ્રક્રિયા ચાલી રહી હતી, પરંતુ કોર્ટે આખરે ભારત સરકારની દલીલોને અવગણીને પ્રત્યાર્પણ અરજી ફગાવી દીધી હતી. આવી સ્થિતિમાં, હવે જોવાનું રહેશે કે, ભારત સરકાર અને બેલ્જિયમની તપાસ એજન્સીઓ તેના પ્રત્યાર્પણ માટે કઈ પદ્ધતિ અપનાવે છે.