રાજનેતાઓ સત્તામાં આવ્યા પછી મોટા-મોટા મહેલો અને વૈભવી ગાડીઓ કઈ રીતે લઈ લે છે?

ભારતની લોકશાહીમાં રાજકારણીઓ લોકોના પ્રતિનિધિ તરીકે સેવા આપવાનું વચન આપે છે પરંતુ સત્તામાં આવ્યા પછી ઘણા રાજકારણીઓની જીવનશૈલીમાં આવતો ફેરફાર લોકોના મનમાં પ્રશ્નો ઉભા કરે છે. વૈભવી મહેલો જેવા બંગલાઓ, મોંઘી ગાડીઓ અને સંપત્તિમાં થતો અચાનક વધારો લોકોને વિચારવા મજબૂર કરે છે. આ પ્રશ્નનું મૂળ લોકશાહીમાં પારદર્શિતા અને જવાબદારીના અભાવમાં રહેલું છે. રાજકારણીઓની આર્થિક સંપન્નતા અને તેના સ્ત્રોતોની તપાસ એ લોકશાહીને મજબૂત કરવા માટેનું મહત્વનું પગલું છે.

રાજકારણીઓની સંપત્તિમાં વધારો થવાનાં કેટલાંક કારણો હોઈ શકે. પહેલું કે ઘણા રાજકારણીઓ સત્તાનો દુરુપયોગ કરીને ગેરકાયદેસર રીતે નાણાં કમાઈ શકે છે જેમાં ભ્રષ્ટાચાર, લાંચખોરી કે ખોટા કોન્ટ્રાક્ટનો સમાવેશ થાય છે. બીજું કે કેટલાક રાજકારણીઓ સત્તાનો ઉપયોગ વ્યવસાયિક હિતોને પ્રોત્સાહન આપવા માટે કરે છે જેનાથી તેમની વ્યક્તિગત સંપત્તિમાં વધારો થાય છે. ત્રીજું એ કે કેટલાક કિસ્સામાં રાજકારણીઓની આવક કાયદેસર હોઈ શકે છે પરંતુ તેની પારદર્શક જાહેરાત ન થવાથી લોકોમાં શંકા ઉભી થાય છે. આ બધાં પાસાં લોકશાહીની વિશ્વસનીયતા પર પ્રશ્નાર્થ ઉભા કરે છે.

લોકશાહીને સ્વસ્થ રાખવા માટે પારદર્શિતા અને જવાબદારી આવશ્યક છે. રાજકારણીઓએ તેમની સંપત્તિ અને આવકના સ્ત્રોતોની નિયમિત જાહેરાત કરવી જોઈએ અને ના કરે તો ફરજ પાડવી જોઈએ આપડે. ચૂંટણી પંચ જેવી સંસ્થાઓએ આ માહિતીની ઝીણવટભરી તપાસ કરવી જોઈએ. આ ઉપરાંત ભ્રષ્ટાચાર વિરોધી કાયદાઓનો કડક અમલ અને સ્વતંત્ર તપાસ એજન્સીઓની સ્થાપના રાજકારણીઓને ગેરકાયદેસર પ્પ્રવૃત્તિઓ રોકી શકે છે. આપણે પણ જાગૃત થઈને એવા ઉમેદવારોને મત આપવો જોઈએ જેમનો રેકોર્ડ પારદર્શક હોય અને જેઓ સેવાની ભાવનાથી રાજકારણમાં આવે.

એક મોટો પ્રશ્ન એ છે કે આપણે શા માટે એવા રાજકારણીઓને ચૂંટીએ છીએ જેમની પ્રાથમિકતા વ્યક્તિગત લાભ હોય? આનું કારણ આપણામાં જાગૃતિનો અભાવ અને ચૂંટણી પ્રક્રિયામાં નાણાંનો પ્રભાવ હોઈ શકે. ઘણી વખત લોકો ટૂંકા ગાળાના લાભો કે લાલચને કારણે ખોટા ઉમેદવારોને મત આપે છે. આને બદલવા માટે શિક્ષણ અને જાગૃતિની જરૂર છે. આપણે ઉમેદવારોના ભૂતકાળ, તેમની નીતિઓ અને સંપત્તિની વિગતોનું વિશ્લેષણ કરવું જોઈએ.

લોકશાહી ત્યારે જ સફળ થશે જ્યારે લોકો અને રાજકારણીઓ વચ્ચે વિશ્વાસનું વાતાવરણ હશે. નિષ્પક્ષ મીડિયા, સક્રિય નાગરિકો અને પારદર્શક ચૂંટણી પ્રક્રિયા આ વિશ્વાસને મજબૂત કરી શકે છે. રાજકારણીઓએ યાદ રાખવું જોઈએ કે તેઓ લોકોના સેવક છે નહીં કે સરમુખત્યાર. લોકો પણ પોતાના મતની શક્તિને ઓળખીને સાચા નેતાઓને ચૂંટે તો જ સ્વસ્થ અને પારદર્શક લોકશાહીનું સ્વપ્ન સાકાર થશે નહીતો આ નેતાઓ વૈભવી બંગલાઓ, કરોડોની ગાડીઓ અને સરકારી સુખસુવિધાઓ ભોગવશે અને મતદારો અને દેશ જ્યાં છે ત્યાંનો ત્યાં રહી જશે.