ઉત્તર પ્રદેશના પ્રતાપગઢ જિલ્લામાંથી સાંપ્રદાયિક સંવાદિતા અને પ્રેમનું એક અનોખું ઉદાહરણ સામે આવ્યું છે.અહીં કોતવાલી પટ્ટી વિસ્તારમાં આવેલા દાઉદપુર ગામમાં એક આંતરધાર્મિક પ્રેમ લગ્ન આ પ્રદેશના ચર્ચાનો વિષય બની ગયા છે. ગામના બંને રહેવાસી અમન કુમાર ગૌતમ અને સાનિયા બાનોએ સામાજિક અને ધાર્મિક બંધનોને પાછળ છોડતા એક-બીજા સાથે લગ્ન કર્યા છે.
આ બંને ઘણા સમયથી પ્રેમ સંબંધમાં હતા. પુખ્ત વયના હોવાથી તેમણે પરસ્પર જીવનસાથી બનવાનું નક્કી કર્યું. ત્યારબાદ, તેમના લગ્ન સ્થાનિક મંદિરમાં હિન્દુ રીત-રિવાજ અને વૈદિક મંત્રોચ્ચાર અનુસાર કરવામાં આવ્યા. આ લગ્નનું સૌથી સુંદર પાસું એ છે કે બંને પરિવારોએ આ સંબંધને સહર્ષ સ્વીકાર કર્યો હતો. લગ્ન દરમિયાન બંને પક્ષના પરિવારના સભ્યો હાજર રહ્યા હતા અને નવદંપતીને સુખી જીવન માટે આશીર્વાદ આપ્યા હતા. લગ્નના વીડિયો અને ફોટા સોશિયલ મીડિયા પર ઝડપથી વાયરલ થઈ રહ્યા છે.
પોતાના આ સંબંધને કાનૂની માન્યતા આપવા માટે દંપતીએ નોટરી સમક્ષ એક સોગંદનામું રજૂ કર્યું. સોગંદનામામાં યુવતીએ સ્વેચ્છાએ અમનને પોતાના પતિ તરીકે સ્વીકાર્યો છે, જ્યારે યુવકે સાનિયાને પોતાની પત્ની તરીકે સ્વીકારીને જીવનભર સાથે રહેવાનું વચન આપ્યું. બંનેએ સ્પષ્ટતા કરી કે તેમણે આ નિર્ણય તેમણે કોઈપણ દબાણ, પ્રલોભન કે ભય વિના સ્વતંત્રતાથી લીધો છે. તેમણે એમ પણ કહ્યું કે, જો તેમના લગ્નને લઇને વાંધો ઉઠાવે છે તો તેને અનુચિત માનવામાં આવે. ગ્રામજનોએ સાક્ષી તરીકે દસ્તાવેજ પર સહી કરી. આ લગ્ન વિસ્તારમાં સાંપ્રદાયિક સૌહાર્દનું ઉદાહરણ બની ગયું છે.
તો, મુસ્લિમ કન્યાના પિતા પણ ભાવુક થઈ ગયા. તેમની પુત્રીની વિદાય પછી તેમણે કહ્યું કે, ‘અમે ઇચ્છીએ છીએ કે અમારી પુત્રી ખુશ રહે. જો તેને હિન્દુ સાથે પ્રેમ હતો, તો અમને પણ આ લગ્ન સામે કોઈ વાંધો નથી. વરરાજાના પિતાએ કહ્યું કે, અમને સાનિયાને અમારી પુત્રવધૂ બનાવીને ખુશ છીએ. અમે તેને પુત્રીની જેમ પ્રેમ કરીશું.’