ટેસ્લા અને સ્પેસએક્સના CEO એલોન મસ્ક અને રાષ્ટ્રપતિ ડોનાલ્ડ ટ્રમ્પની મિત્રતા તૂટી ગઈ છે. બંને વચ્ચે શબ્દ યુદ્ધ ચાલુ છે. આ દરમિયાન, મસ્કે અમેરિકામાં એક નવા રાજકીય પક્ષની જરૂરિયાત અંગે એક મોટું નિવેદન આપ્યું છે. હકીકતમાં, એલોન મસ્કે તેમના સોશિયલ મીડિયા પ્લેટફોર્મ X પર એક અભિયાન ચલાવ્યું હતું, જેમાં તેમણે પૂછ્યું હતું કે, શું અમેરિકામાં એક નવો રાજકીય પક્ષ બનાવવો જોઈએ. હવે આ અભિયાનના પરિણામો જાહેર કરતાં તેમણે કહ્યું કે 80 ટકા લોકોએ સમર્થનમાં મતદાન કર્યું છે.
મસ્કે X પર લખ્યું કે જનતાએ પોતાનો ચુકાદો આપી દીધો છે, અમેરિકાને એક નવા રાજકીય પક્ષની જરૂર છે, જે 80 ટકા મધ્યમ વર્ગના લોકોનું પ્રતિનિધિત્વ કરે અને બરાબર 80 ટકા લોકોએ તેને સમર્થન આપ્યું હોય. આ નિયતિ છે. આ પછી, તેમણે બીજી એક પોસ્ટમાં ફક્ત એટલું જ લખ્યું કે, ‘ધ અમેરિકા પાર્ટી’.
આ એવા સમયે થયું જ્યારે સોશિયલ મીડિયા પર મસ્ક અને ટ્રમ્પ વચ્ચે શબ્દ યુદ્ધ વધુ તીવ્ર બન્યું. મસ્કે ટ્રમ્પ પર નિશાન સાધ્યું હતું અને લખ્યું હતું કે, મારા વિના ટ્રમ્પ ચૂંટણી હારી ગયા હોત. આ પછી તેમણે લખ્યું કે આવી બેઈમાની.
ટ્રમ્પે ટ્રુથ સોશિયલ પર મસ્કને વિશ્વાસઘાતી બતાવીને બદલો લીધો અને ચેતવણી આપી કે તેમની સામે કાર્યવાહી થઈ શકે છે. તેમણે કહ્યું કે, બજેટમાં અબજો ડોલર બચાવવાનો સૌથી સરળ રસ્તો એલોન મસ્કની સરકારી સબસિડી અને કરારોને બંધ કરવાનો છે.
મસ્ક દ્વારા સૂચવવામાં આવેલી અમેરિકા પાર્ટી હાલમાં ફક્ત એક વિચાર છે, પરંતુ તેને અમેરિકન રાજકારણમાં એક નવા યુગની શરૂઆતના સંકેત તરીકે જોવામાં આવી રહી છે, ખાસ કરીને જ્યારે મસ્કની સોશિયલ મીડિયા પહોંચ અને પ્રભાવ દિવસેને દિવસે વધી રહ્યો છે.
અહીં તમને જણાવી દઈએ કે, 30 મેના રોજ, ડોનાલ્ડ ટ્રમ્પ અને એલોન મસ્ક બંને સાથે જોવા મળ્યા હતા. બંને એકબીજાનો આભાર માનતા સાંભળવામાં આવ્યા હતા. તે સમય દરમિયાન, એક ક્ષણ માટે પણ એવું લાગ્યું નહીં કે બંનેને એકબીજા પ્રત્યે આટલી નફરત છે, કારણ કે છ દિવસમાં, ટ્રમ્પ બિગ બ્યુટીફુલ બિલ પર એટલા નારાજ થઈ ગયા કે તેઓ ગુસ્સાથી લાલચોળ થઇ ગયા. આ પછી, મસ્કે સોશિયલ મીડિયા પર હુમલાઓનો દોર શરૂ કર્યો અને દાવો કર્યો કે, ટ્રમ્પ તેમના વિના ચૂંટણી જીતી શક્યા ન હોત. મસ્કે ટ્રમ્પ પર મહાભિયોગ ચલાવવા અને તેમને હટાવવાનું પણ સમર્થન કર્યું અને અમેરિકામાં ત્રીજા પક્ષની જરૂરિયાત પર એક મતદાન કર્યું, જેમાં 80 ટકા લોકો મસ્ક સાથે સંમત થયા.