જો તમે ઝોમેટો, સ્વિગી અને મેજિકપિન જેવી એપ્લિકેશનો પરથી ખાવાનું મંગાવવાનો ઓર્ડર આપો છો, તો આ સમાચાર તમારા માટે છે. 22 સપ્ટેમ્બરથી, આ એપ્લિકેશનો પરથી ખોરાકનો ઓર્ડર આપવો વધુ મોંઘો થશે. આનું કારણ એ છે કે, તે દિવસથી ડિલિવરી ચાર્જ પર 18 ટકા GST લાગશે. આ એપ્લિકેશનો દ્વારા તમે જે કંઈ પણ ઓર્ડર કરો છો, તો તમારે તે સામાનની રકમ પર 18 ટકા ટેક્સ પણ ચૂકવવો પડશે.
તહેવારોની મોસમ આવે તે પહેલાં જ, આ કંપનીઓએ તેમની ‘પ્લેટફોર્મ ફી’ વધારી દીધી છે. તમે તે અંગે પહેલાથી જ જાણતા હશો કે સ્વિગી અને ઝોમેટો જેવી એપ્લિકેશનો ગ્રાહકો પાસેથી માલ ઓર્ડર કરવા માટે પ્લેટફોર્મ ફી વસૂલ કરે છે, જે એક વધારાનો ચાર્જ છે. આ ફી દરેક ઓર્ડર પર વસૂલવામાં આવે છે. તાજેતરમાં, સ્વિગીએ કેટલાક શહેરોમાં તેની પ્લેટફોર્મ ફી વધારીને રૂ. 15 કરી છે, જેમાં GSTનો પણ સમાવેશ થાય છે. ઝોમેટોએ તેની પ્લેટફોર્મ ફી ઘટાડીને રૂ. 12.50 કરી છે, પરંતુ GST અલગથી વસૂલવામાં આવશે. જ્યારે, મેજિકપિનએ પણ તેની પ્લેટફોર્મ ફી વધારીને પ્રતિ ઓર્ડર 10 રૂપિયા કરી છે.
22 સપ્ટેમ્બરથી, સરકાર આ કંપનીઓ દ્વારા ગ્રાહકો પાસેથી વસૂલવામાં આવતા ડિલિવરી ચાર્જ પર 18 ટકા GST વસૂલશે. જોકે, આ ટેક્સ વધારે નહીં હોય. એવો અંદાજ છે કે, 22 સપ્ટેમ્બરથી ડિલિવરી ચાર્જ પર 18 ટકા GST લાદવાને કારણે, Zomato વપરાશકર્તાઓએ પ્રતિ ઓર્ડર આશરે 2 રૂપિયા ચૂકવવા પડશે અને Swiggy ગ્રાહકોએ 2.6 રૂપિયા વધારાના ચૂકવવા પડશે.
નાણા મંત્રાલયે મંગળવારે કેટલાક FAQ બહાર પાડયા. તે સમજાવે છે કે, સ્થાનિક ડિલિવરી સેવાઓ પર GST શા માટે વસૂલવામાં આવી રહ્યો છે. મંત્રાલયે કહ્યું: ‘સ્થાનિક ડિલિવરી સેવાઓ 18 ટકાના દરે કરપાત્ર છે. જો આવી સ્થાનિક ડિલિવરી સેવાઓ સીધી રીતે રજિસ્ટર્ડ વ્યક્તિ દ્વારા પૂરી પાડવામાં આવે છે, તો 18 ટકાના દરે GST ચૂકવવાપાત્ર રહેશે. જો ડિલિવરી સેવા પ્રદાતા E-કોમર્સ ઓપરેટર (ECO) માટે ડિલિવરી કરી રહ્યો છે અને નોંધાયેલ નથી, તો કલમ 9(5) હેઠળ ECO દ્વારા 18 ટકા GST ચૂકવવાપાત્ર રહેશે. જો આવી સ્થાનિક ડિલિવરી સેવાઓ રજિસ્ટર્ડ વ્યક્તિ દ્વારા ECOના માધ્યમથી પૂરી પાડવામાં આવે છે, તો સ્થાનિક ડિલિવરી સેવાના સપ્લાયર દ્વારા 18 ટકાના દરે GST ચૂકવવાપાત્ર રહેશે.’
મંગળવારે સ્વિગીના શેરમાં ત્રણ ટકાથી વધુનો વધારો જોવા મળ્યો. તે BSE પર રૂ. 245.30 પર ખુલ્યો અને રૂ. 438.30ની ઊંચી સપાટીને સ્પર્શ્યો. આજે BSE પર Zomato અથવા Eternalના શેર પણ લગભગ એક ટકા વધ્યા. સવારે તે રૂ. 323.45 પર ખુલ્યો અને રૂ. 326.30ની ઊંચી સપાટી સુધી ગયો હતો.