વડોદરાની એમએસયુ યુનિવર્સિટીમાંથી એક ચોંકાવનારી ઘટના સામે આવી છે. અહીં પેઇન્ટિંગ ડિપાર્ટમેન્ટમાં પ્રથમ વર્ષમાં અભ્યાસ કરતી 22 વર્ષીય વિદ્યાર્થિની કાજલ ચૌધરીનું કરંટ લાગવાથી દુર્ઘટનાજનક મોત થયું. આ ઘટનાએ કેમ્પસમાં શોક અને ભયનું માહોલ સર્જી દીધો છે.
માહિતી મુજબ, કાજલ મૂળ વલસાડની રહેવાસી હતી અને પેઇન્ટિંગ આર્ટ માટે પાણી ગરમ કરતી વખતે વોટર હીટર મશીનમાં કરંટ લાગતા અચાનક ઢળી પડી. સાથી વિદ્યાર્થીઓએ તાત્કાલિક તેને હોસ્પિટલ પહોંચાડી હતી, પરંતુ તબીબોએ તપાસ બાદ તેને મૃત જાહેર કરી.
હાલ કાજલના મૃતદેહને સયાજી હોસ્પિટલ ખાતે પોસ્ટમોર્ટમ માટે ખસેડવામાં આવ્યો છે. બીજી તરફ, આ બનાવને લઈને યુનિવર્સિટી તંત્રની બેદરકારી સામે ગંભીર સવાલો ઉઠી રહ્યા છે.
કેમ્પસમાં વિદ્યાર્થીઓ ભારે દુઃખ અને આઘાત અનુભવી રહ્યા છે, જ્યારે કાજલના પરિવારજનોમાં પણ શોકનો માહોલ છવાઈ ગયો છે.
