સોમવારે ઉત્તરપૂર્વીય અમેરિકામાં એક શક્તિશાળી બરફના વાવાઝોડાએ તબાહી મચાવી. ભારે હિમવર્ષા અને ઝડપી પવનને કારણે રસ્તાઓ લપસણા બની ગયા, જાહેર પરિવહન ઠપ્પ થઈ ગયું અને લાખો લોકો ઘરમાં ફસાઈ ગયા. સામાન્ય રીતે ભીડભાડવાળા રસ્તાઓ ઉજ્જડ થઇ ગયા હતા, એરપોર્ટ ખાલી હતા અને શાળાઓ બંધ કરવાની ફરજ પડી હતી. આ વાવાઝોડાથી હવાઈ મુસાફરી પર ઘણી મોટી અસર દેખાઈ રહી હતી.
ફ્લાઇટ ટ્રેકિંગ સેવા ફ્લાઇટઅવેર અનુસાર, 21થી 24 ફેબ્રુઆરી દરમિયાન 10,000થી વધુ ફ્લાઇટ્સ રદ કરવામાં આવી હતી. ફક્ત સોમવારે જ 5,000થી વધુ ફ્લાઇટ્સ રદ કરવામાં આવી હતી, જ્યારે મંગળવાર માટે 1300થી વધુ ફ્લાઇટ્સ રદ કરવામાં આવી હતી. જોન F. કેનેડી ઇન્ટરનેશનલ એરપોર્ટ, લાગાર્ડિયા એરપોર્ટ, બોસ્ટન લોગન ઇન્ટરનેશનલ એરપોર્ટ અને ન્યૂ યોર્ક લિબર્ટી ઇન્ટરનેશનલ એરપોર્ટ સૌથી વધુ પ્રભાવિત થયા હતા. ઘણા રાજ્યોમાં રેલ અને બસ સેવાઓ પણ સ્થગિત કરવામાં આવી હતી.
ન્યુ યોર્ક સિટીના અધિકારીઓએ લોકોને બિન-આવશ્યક મુસાફરી ટાળવાની સલાહ આપી. જ્યારે ન્યૂ યોર્ક, ન્યૂ જર્સી અને રોડ આઇલેન્ડના કેટલાક ભાગોમાં પણ આજ પ્રકારના આદેશો બહાર પાડવામાં આવ્યા હતા. ન્યૂ યોર્કના મેયર ઝોહરાન મામદાનીએ એક સંદેશમાં જણાવ્યું હતું કે, ‘હું દરેક ન્યૂ યોર્કવાસીઓને ઘરે રહેવા વિનંતી કરું છું.’ સોમવારે સવાર સુધીમાં સેન્ટ્રલ પાર્કમાં 15 ઇંચથી વધુ બરફ પડ્યો હતો. લોંગ આઇલેન્ડ અને ન્યૂ જર્સીના ઘણા વિસ્તારોમાં લગભગ બે ફૂટ બરફ પડ્યો હતો.
ફિલાડેલ્ફિયામાં લગભગ એક ફૂટ બરફ પડ્યો હતો, અને બોસ્ટનમાં મોડી સાંજ સુધી બરફ પડતો રહ્યો હતો. હવામાનશાસ્ત્રીઓએ તોફાનને બરફવર્ષા તરીકે વર્ગીકૃત કર્યું હતું, જેમાં 35 માઇલ પ્રતિ કલાકથી વધુની ઝડપે પવન ફૂંકાયો હતો અને 40-60 માઇલ પ્રતિ કલાકની ઝડપે બરફનો વરસાદ પડ્યો હતો. નેન્ટુકેટ જેવા દરિયાકાંઠાના વિસ્તારોમાં 60 માઇલ પ્રતિ કલાકથી વધુની ઝડપે પવન ફૂંકાયો હતો. રાષ્ટ્રીય હવામાન સેવાએ ચેતવણી આપી હતી કે, ઇન્ટરસ્ટેટ 95 કોરિડોરના ઘણા ભાગોમાં દૃશ્યતા અત્યંત ઓછી રહેશે.
વાવાઝોડાએ પૂર્વ કિનારા પર 570,000થી વધુ ઘરો અને ધંધાકીય સ્થળોએ વીજળી ગુલ કરી દીધી હતી. મેસાચ્યુસેટ્સ અને ન્યૂ જર્સી સૌથી વધુ પ્રભાવિત થયા હતા. ડેલાવેર અને રોડ આઇલેન્ડ પણ તોફાનથી ભારે પ્રભાવિત થયા હતા. રાજ્યોએ કટોકટી પ્રતિભાવને એલર્ટ પર રાખ્યો હતો. ન્યૂ યોર્કના ગવર્નર કેથી હોચુલે અસરગ્રસ્ત વિસ્તારોમાં મદદ કરવા માટે નેશનલ ગાર્ડને તૈનાત કર્યા હતા. મેસાચ્યુસેટ્સે કટોકટીની સ્થિતિ જાહેર કરી હતી, અને સરકારી કર્મચારીઓને ઘરેથી કામ કરવાનું કહેવામાં આવ્યું હતું. તોફાન વધુ તીવ્ર બનતાં ન્યૂયોર્કમાં સંયુક્ત રાષ્ટ્રનું મુખ્ય મથક પણ દિવસભર માટે બંધ રાખવામાં આવ્યું હતું.
