મધ્ય પૂર્વમાં સ્થિતિ અત્યંત ગંભીર બની ગઈ છે. ઈરાન, સાઉદી અરેબિયા, કુવૈત અને સાયપ્રસ સહિતના દેશો અત્યારે યુદ્ધની જ્વાળાઓમાં લપેટાયેલા છે. અમેરિકા અને ઈઝરાયલના સંયુક્ત હુમલાઓએ ઈરાનમાં ભારે તબાહી મચાવી છે, જ્યારે ખાડી દેશોમાં પણ મિસાઈલ અને ડ્રોન હુમલાઓને કારણે ઈમરજન્સી જેવી સ્થિતિ સર્જાઈ છે.
આજના સૌથી મોટા અપડેટ્સ:
ઈરાનમાં ભારે જાનહાનિ: રેડ ક્રેસન્ટના જણાવ્યા અનુસાર, અમેરિકા અને ઈઝરાયલ દ્વારા ઈરાનના 131 જિલ્લાઓમાં કરવામાં આવેલા સંયુક્ત હુમલામાં અત્યાર સુધીમાં ઓછામાં ઓછા 555 લોકોના મોત થયા છે.
સાઉદીની રિફાઈનરીમાં આગ: સાઉદી અરેબિયાના સંરક્ષણ મંત્રાલયે પુષ્ટિ કરી છે કે રાસ તનુરા ઓઈલ રિફાઈનરી પર બે ડ્રોન હુમલા થયા હતા. જોકે ડ્રોનને હવામાં તોડી પાડવામાં આવ્યા હતા, પરંતુ તેનો કાટમાળ પડવાને કારણે રિફાઈનરીમાં ભીષણ આગ ફાટી નીકળી છે.
સાયપ્રસમાં બ્રિટિશ બેઝ પર હુમલો: બ્રિટિશ વિદેશ મંત્રી કૂપરે જણાવ્યું છે કે સાયપ્રસમાં આવેલા બ્રિટિશ સૈન્ય મથક પર ડ્રોન હુમલો થયો છે, જે સીધો રનવે પર પડ્યો હતો.
લેબનોનમાં મોતનો આંકડો વધ્યો: લેબનોનના આરોગ્ય મંત્રાલયના જણાવ્યા અનુસાર, ઈઝરાયલના હવાઈ હુમલામાં અત્યાર સુધીમાં 31 લોકોના મોત થયા છે અને 149 લોકો ઘાયલ થયા છે.
કુવૈતમાં અમેરિકી વિમાનો ક્રેશ: કુવૈતના સંરક્ષણ મંત્રાલયે ચોંકાવનારો દાવો કર્યો છે કે તેમના એરસ્પેસમાં “કેટલાક” અમેરિકી યુદ્ધ વિમાનો ક્રેશ થયા છે. તમામ ક્રૂ મેમ્બરો સુરક્ષિત રીતે બચી ગયા છે.
બહેરીનમાં આતંકી હુમલાનો ભય: બહેરીન સ્થિત અમેરિકી દૂતાવાસે ચેતવણી આપી છે કે આતંકવાદી જૂથો અમેરિકી નાગરિકો પર હુમલો કરવાની યોજના બનાવી રહ્યા છે.
ઈરાક અને એરબિલમાં વિસ્ફોટ: સુરક્ષા સૂત્રોના જણાવ્યા અનુસાર, બગદાદની દક્ષિણે આવેલા જુર્ફ અલ-સખરમાં ઈરાન સમર્થિત જૂથ ‘કતાઈબ હિઝબુલ્લાહ’ના ઠેકાણાઓ પર અમેરિકા અને ઈઝરાયલે મિસાઈલ હુમલા કર્યા છે. બીજી તરફ, એરબિલમાં પણ જોરદાર વિસ્ફોટોના અહેવાલ છે.
ખાડી દેશોમાં સાયરન અને વિસ્ફોટ: વહેલી સવારે બહેરીનમાં હુમલાના સાયરન ગુંજી ઉઠ્યા હતા, જ્યારે અબુ ધાબી અને દોહા (કતાર) માં મોટા વિસ્ફોટોના અવાજો સાંભળવા મળ્યા હતા.
ઈરાને અમેરિકા સાથે કોઈપણ પ્રકારની વાતચીત કરવાની ના પાડી દીધી છે.
