ઉત્તર પ્રદેશના ગાઝિયાબાદમાં ભૂતપૂર્વ કોર્પોરેટર હાજી ખલીલના ચોથા લગ્નને લઈને મોટો વિવાદ ઉભો થયો છે. આ 70 વર્ષીય નેતાએ 20 વર્ષની કન્યા સાથે લગ્ન કર્યા પછી, તેની બીજી પત્નીએ તેમના પર તેમની મિલકત હડપ કરવાનો અને જાનથી મારી નાખવાની ધમકી આપવાનો આરોપ લગાવ્યો છે. 11 બાળકોના પિતા ખલીલને હવે કાનૂની કાર્યવાહીનો સામનો કરવો પડી શકે છે.
ગાઝિયાબાદના કોતવાલી પોલીસ સ્ટેશન વિસ્તારના કૈલા ભટ્ટાના રહેવાસી SP નેતા અને ભૂતપૂર્વ કોર્પોરેટર હાજી ખલીલે 70 વર્ષની ઉંમરે 20 વર્ષની યાસ્મીન સાથે ચોથી વાર લગ્ન કર્યા. આ લગ્ન પછી, તેમની બીજી પત્ની, નઝરીને, પોલીસ કમિશનર ઓફિસમાં ઉત્પીડન અને છેતરપિંડીની ફરિયાદ નોંધાવી છે. નઝરીનનો આરોપ છે કે, ખલીલ મેહરમાં આપવામાં આવેલી મિલકત પર કબજો કરવા માંગે છે. આ વિવાદ 1991માં કરેલા બીજા લગ્નની સચ્ચાઈ છુપાવવા, અગાઉના લગ્ન અને કુલ 11 બાળકો સાથે જોડાયેલા કૌટુંબિક વિવાદમાંથી ઉદ્ભવ્યો છે. હાલમાં, પોલીસે આ કેસની તપાસ શરૂ કરી છે.
પીડિત નાઝરીનના જણાવ્યા મુજબ, તેણે 1991માં હાજી ખલીલ સાથે લગ્ન કર્યા હતા. તે સમયે, ખલીલે એ હકીકત છુપાવી હતી કે તે પહેલાથી જ પરિણીત હતો અને તેની પહેલી પત્નીથી 8 બાળકો હતા. ખલીલને નાઝરીનથી 3 બાળકો (બે પુત્રીઓ અને એક પુત્ર) પણ છે. મહિલાનો આરોપ છે કે, ખલીલે 2010માં ત્રીજા લગ્ન પણ કર્યા હતા, પરંતુ નિઃસંતાનતાને કારણે ત્રણ તલાક આપીને તેની પત્નીને છૂટાછેડા આપી દીધા હતા. હવે 20 વર્ષની નવી દુલ્હનના આગમનથી વિવાદ વધુ વકર્યો છે.
નાઝરીનએ એડિશનલ પોલીસ કમિશનરને આપેલી અરજીમાં જણાવ્યું હતું કે, તે હાલમાં જે મિલકત ધરાવે છે તે તેને મેહરમાં મળી હતી. હવે, હાજી ખલીલ અને તેની ચોથી પત્ની યાસ્મીનની નજર એ જ મિલકત પર છે. એવો આરોપ છે કે તેઓ મિલકતને તેમના નામે ટ્રાન્સફર કરવાનું કાવતરું ઘડી રહ્યા છે. નઝરીનનો દાવો છે કે, જ્યારે તેણે વિરોધ કર્યો ત્યારે તેને અને તેના પુત્રને ઘરમાંથી કાઢી મૂકવામાં આવ્યા હતા. મહિલાએ સુરક્ષાની માંગણી કરી છે, કારણ કે તેને અને તેના બાળકોના જીવને જોખમ છે.
હાજી ખલીલ ગાઝિયાબાદના રાજકારણમાં એક અનુભવી વ્યક્તિ છે. તેમણે 1995 અને 2000માં ઇસ્લામનગર વોર્ડમાંથી કોર્પોરેટર તરીકે સેવા આપી હતી. અગાઉ તેમના પર કરોડો રૂપિયાની મ્યુનિસિપલ જમીન પર ગેરકાયદેસર રીતે કબજો કરવાના ગંભીર આરોપો લાગી ચુક્યા છે. તાજેતરના કિસ્સામાં, પોલીસ અધિકારીઓ કહે છે કે, તેમને ફરિયાદ મળી છે અને તપાસ બાદ યોગ્ય કાનૂની કાર્યવાહી કરવામાં આવશે. 70 વર્ષીય નેતાના ચોથા લગ્ન અને ત્યારપછીના મિલકત વિવાદે સમગ્ર વિસ્તારમાં વ્યાપક ચર્ચા ફેલાઈ ગઈ છે.