બોલીવુડ અભિનેત્રી જેકલીન ફર્નાન્ડીઝને 200 કરોડના મની લોન્ડરિંગ કેસમાં મોટો ઝટકો લાગ્યો છે. એન્ફોર્સમેન્ટ ડિરેક્ટોરેટ (ED)એ છેતરપિંડી કરનાર કુખ્યાત સુકેશ ચંદ્રશેખર સાથે સંકળાયેલા આ કેસમાં સરકારી સાક્ષી બનવાની જેકલીનની અરજીનો સખત વિરોધ કર્યો છે. EDનો દાવો છે કે, આ કેસમાં જેકલીનનું વર્તન શંકાસ્પદ રહ્યું છે.
EDએ દિલ્હી કોર્ટને જણાવ્યું હતું કે, તેની પાસે જેકલીન સામે પૂરતા પુરાવા છે. EDએ આ મામલે વિગતવાર જવાબ દાખલ કરવા માટે સમય માંગ્યો છે. EDના જણાવ્યા અનુસાર, જેકલીન સુકેશના ગુનાહિત ઇતિહાસથી સંપૂર્ણપણે વાકેફ હતી. સુકેશના દુષ્કૃત્યો વિશે જાણ્યા હોવા છતાં, જેકલીન સુકેશ સાથે તેના સંબંધો ચાલુ રાખ્યા હતા અને તેની મોંઘી ભેટો સ્વીકારતી હતી. આ કેસમાં જેકલીન પોતાને પીડિત તરીકે રજૂ કરે છે તે પુરાવાનો વિરોધાભાસ કરે છે.
કોર્ટમાં, EDએ જણાવ્યું હતું કે સુકેશની સાચી ઓળખ અને તેની ગુનાહિત પૃષ્ઠભૂમિ જાણ્યા છતાં, જેકલીને સંબંધ તોડવાનો ઇનકાર કર્યો હતો. તેણે તેની પાસેથી મોંઘી ભેટો સ્વીકારી અને સુકેશની ગેરકાયદેસર રીતે મેળવેલી સંપત્તિનો ઉપયોગ પોતાના અને પોતાના પરિવાર માટે કર્યો. આ સ્પષ્ટપણે દર્શાવે છે કે, જેક્લીને જાણી જોઈને ભંડોળના સ્ત્રોતને અવગણ્યો હતો અને સુકેશ સાથે મની લોન્ડરિંગ પ્રક્રિયામાં સામેલ હતી. EDએ સ્પષ્ટતા કરી કે અભિનેત્રીનો સાક્ષી બનવાનો દાવો મની લોન્ડરિંગ કેસમાં તેની નિર્દોષતા સાબિત કરતો નથી.
જેક્લીન અને સુકેશ સાથેનો કેસ લાંબા સમયથી ચાલી રહ્યો છે. સુકેશ અને જેક્લીન કથિત રીતે અફેરમાં સંડોવાયેલા હતા. એવું બહાર આવ્યું છે કે સુકેશે તેની પ્રેમિકા જેક્લીનને મોંઘી ભેટો આપી હતી, જેમાં લક્ઝરી કાર, ડાયમંડ સેટ અને મોંઘી બેગનો સમાવેશ થાય છે. સુકેશે માત્ર જેક્લીન જ નહીં પરંતુ તેના પરિવારને પણ મોંઘી ભેટો આપી હતી. જોકે, કેસમાં ફસાયા પછી, જેક્લીને સુકેશ સાથે કોઈ સંબંધ હોવાનો ઇનકાર કર્યો હતો.
તેણે એમ પણ કહ્યું કે, તે સુકેશના કાવતરાનો ભોગ બની હતી. તે માસ્ટરમાઇન્ડની સાચી ઓળખથી અજાણ હતી. બીજી તરફ, જેલમાં બંધ સુકેશે જેક્લીન પ્રત્યેનો પ્રેમ ઓછો થવાના કોઈ સંકેતો દર્શાવ્યા નથી. તેણે હજુ પણ તેને પ્રેમ પત્રો લખવાનું ચાલુ રાખ્યું છે, અને પોતાનો પ્રેમ વ્યક્ત કરે છે. જેક્લીનને હાલમાં આ કેસમાં દિલ્હી હાઈકોર્ટે જામીન આપ્યા છે.