મધ્ય પ્રદેશના ઇન્દોરમાં એક એવી હૃદયદ્રાવક દુર્ઘટના સામે આવી છે, જેનાથી દરેક માતા-પિતાનું દિલ હચમચી ગયું છે. 4 વર્ષની માસૂમ બાળકી, જે થોડીવાર પહેલા પોતાના ઘરની બહાર રમી રહી હતી, તે રમતા-રમતા કારમાં જઇને છુપાઇ હતી. પરંતું કોઈને શું ખબર નહોતી કે આ કાર જ તેનો જીવ લઈ લેશે. ભારે ગરમી વચ્ચે બંધ કાર મૃત્યુનો રૂમ બની ગઇ અને જ્યાં સુધી પરિવારના સભ્યો બાળકી પાસે પહોંચે ત્યાં સુધીમાં ખૂબ મોડું થઈ ગયું હતું.
જૂની ઇન્દોરની નંદન વન કોલોનીમાં આ ઘટના બાદ સમગ્ર વિસ્તારમાં શોકનો માહોલ છવાઈ ગયો છે. નંદન વન કોલોનીમાં રહેતી 4 વર્ષની બાળકી બેબી હઝરા રોજની જેમ પોતાના ઘરની બહાર રમી રહી હતી. રમતા-રમતા તે નજીકમાં પાર્ક કરેલી કારમાં જતી રહી. માસૂમ બાળકીને કદાચ ખ્યાલ નહોતો કે આ રમતા-રમતા ઉઠાવવામાં આવેલું આ પગલું તેના જીવનની છેલ્લી ક્ષણ બની જશે.
એવું કહેવાય છે કે કારનો દરવાજો લોક થઇ ગયો ધ હતો, જેના કારણે બાળકી અંદર ફસાઈ ગઈ. બહાર ભીષણ ગરમી હતી, અને થોડા જ સમયમાં બંધ કાર ભઠ્ઠીની જેમ ગરમ થવા લાગી. આ દરમિયાન પરિવારના સભ્યોએ આજુબાજુના ગલી-મહોલ્લામાં બાળકીની શોધખોળ કરી. તેઓએ બધે અવાજ લગાવ્યો, પરંતુ માસૂમ બાળકી ક્યાંય મળી નહીં.
લગભગ બે કલાક પછી, પરિવારના સભ્યોને કાર પર શંકા ગઈ. જેવી જ કારનો દરવાજો ખોલ્યો, અંદરનું દૃશ્ય જોઈને પરિવારના સભ્યોની ચીસ નીકળી ગઇ. માસૂમ બાળકી બેભાન અવસ્થામાં અંદર પડી હતી. પરિવારના સભ્યો તેને તાત્કાલિક હોસ્પિટલ લઈ ગયા, પરંતુ ડૉક્ટરોએ તેને મૃત જાહેર કરી દીધી.
એક નાનકડી બેદરકારીએ આ પરિવારની ખુશી કાયમ માટે છીનવી લીધી. જે ઘરમાં થોડીવાર પહેલા બાળકની કિલકારીઓ ગૂંજી રહી હતી, ત્યાં હવે ચીસો અને શાંતિ સિવાય કંઈ નથી. આ દુર્ઘટના બાદ સમગ્ર વિસ્તારમાં શોકનું વાતાવરણ છે. તો, જૂની ઇન્દોર પોલીસે આકસ્મિક મૃત્યુનો કેસ નોંધીને તપાસ શરૂ કરી છે.