ટાટા મોટર્સે તેની એન્ટ્રી-લેવલ ઇલેક્ટ્રિક ફોર-વ્હીલર ટિયાગો હેચબેકનું ફેસલિફ્ટેડ વર્ઝન લોન્ચ કર્યું છે. ફેસલિફ્ટેડ વર્ઝન હવે સેગમેન્ટ-ફર્સ્ટ ફીચર્સ સાથે આવે છે. કંપનીની અન્ય કારની જેમ, ઇલેક્ટ્રિક હેચબેક લાઇફટાઇમ બેટરી વોરંટી ઓફર કરી રહી છે. ઉપરાંત તે ફાસ્ટ ચાર્જિંગને પણ સપોર્ટ કરે છે. કંપનીએ તેની શરૂઆતની એક્સ-શોરૂમ કિંમત માત્ર રૂ. 6.99 લાખ રાખી છે. ગ્રાહકો આ કાર BaaS સેવાઓ સાથે પણ ખરીદી શકે છે, જે કંપનીએ રૂ. 4.69 લાખ નક્કી કરી છે, જેનો અર્થ છે કે તેનો ખર્ચ ગ્રાહકોને પ્રતિ કિલોમીટર રૂ. 2.60 થશે. ભારતીય બજારમાં, તે MG Comet EV અને Citroen eC3 સાથે સ્પર્ધા કરશે.
ટિયાગો EV બે બેટરી પેક વિકલ્પોમાં ઉપલબ્ધ છે, જેમાં 19.2kWh અને 24kWhનો સમાવેશ થાય છે. નાનું બેટરી વર્ઝન 62 hp અને 110 Nm પાવર ઉત્પન્ન કરે છે, જ્યારે મોટું બેટરી પેક 75 hp અને 114 Nm ટોર્ક ઉત્પન્ન કરે છે. 24 kWh વર્ઝનમાં હવે દાવો કરાયેલ MIDC રેન્જ 285 Km છે, જે પહેલા 293 Km હતી. જ્યારે 19.2 kWh વર્ઝનની દાવો કરાયેલ રેન્જ 223 Kmથી થોડી વધીને 226 Km થઈ ગઈ છે.
કંપનીના જણાવ્યા અનુસાર, તેની રિયલ વર્લ્ડની C75 રેન્જ અનુક્રમે 160થી 170 Km અને 205થી 215 Km છે. ટાટા કહે છે કે, Tiago EV હવે 40 ટકા ઝડપથી ચાર્જ થાય છે, તે 18 મિનિટમાં 100 Km રેન્જ ઉમેરે છે. તે DC ફાસ્ટ ચાર્જિંગને પણ સપોર્ટ કરે છે, જેનાથી 30 kW DC ફાસ્ટ ચાર્જરનો ઉપયોગ કરીને બંને બેટરીને 35 મિનિટમાં 10 થી 80 ટકા સુધી ચાર્જ કરી શકાય છે. માનક તરીકે, Tiago EV 3.3kW અને 7.2kW AC ચાર્જિંગ વિકલ્પો સાથે આવે છે.
અપડેટેડ ટિયાગો EVમાં ચાર-સ્તરીય રિજનરેટિવ બ્રેકિંગ અને સિટી અને સ્પોર્ટ ડ્રાઇવ મોડ્સ પણ મળે છે. ટાટાનો દાવો છે કે 24kWh વર્ઝન 5.7 સેકન્ડમાં 0-60kphની ઝડપ પકડી શકે છે. ટાટા મોટર્સ 24kWh વર્ઝનના હાઇ-વોલ્ટેજ બેટરી પેક પર પહેલા નોંધાયેલા માલિકોને આજીવન, અમર્યાદિત કિલોમીટર વોરંટી પણ આપી રહી છે. 19.2kWh વર્ઝનમાં 8-વર્ષ/1.6 લાખ Kmની બેટરી વોરંટી મળતી રહેશે.
અપડેટેડ ટિયાગો EVના બાહ્ય ભાગમાં ફરીથી ડિઝાઇન કરાયેલ ફ્રન્ટ ફેસિયા મળે છે, જેમાં સ્લીક LED હેડલેમ્પ્સ, નવા આઇબ્રો-આકારના LED DRL અને બોડી-કલરવાળા બંધ ગ્રિલ ડિઝાઇન છે. ટાટાએ બમ્પરને પણ ફરીથી ડિઝાઇન કર્યું છે, જેમાં કિનારાઓ પર નવા ફોક્સ એર વેન્ટ્સ આપવામાં આવ્યા છે. આ ઉપરાંત, કોન્ટ્રાસ્ટિંગ વ્હીલ-આર્ચ ક્લેડીંગ સાથે નવા 15-ઇંચ વ્હીલ્સ ઉમેરવામાં આવ્યા છે.
પાછળની તરફ, આ હેચબેકમાં હવે કનેક્ટેડ LED ટેલ-લેમ્પ્સ અને નવું બમ્પર મળે છે. તેના બાહ્ય ભાગની અન્ય હાઇલાઇટ્સમાં ડ્યુઅલ-ટોન બ્લેક રૂફ, શાર્ક-ફિન એન્ટેના અને ડોર હેન્ડલ્સ પર ક્રોમ ફિનિશનો સમાવેશ થાય છે. ટાટા ટિયાગો EV 6 રંગોમાં ખરીદી શકશે, દેહરાદૂન ડ્યૂ, સોબો સર્જ, પેંગોંગ પલ્સ, માથેરાન મોનસૂન, પ્યોર ગ્રે અને પ્રિસ્ટાઇન વ્હાઇટ.
આંતરિક ભાગની વાત કરીએ તો, ટિયાગો EVમાં સંપૂર્ણપણે ફરીથી ડિઝાઇન કરેલું ડ્યુઅલ-ટોન ડેશબોર્ડ છે, જેમાં ફ્રી-સ્ટેન્ડિંગ 10.25-ઇંચ ટચસ્ક્રીન ઇન્ફોટેનમેન્ટ સિસ્ટમ અને સેમી-ડિજિટલ TFT ઇન્સ્ટ્રુમેન્ટ ક્લસ્ટર છે, જે બ્લૂટૂથ કાર્યક્ષમતાને પણ સપોર્ટ કરે છે. કંપની કહે છે કે તેણે ટિયાગો EVના E એન્ડ E આર્કિટેક્ચરને ઘણી સારી રીતે અપગ્રેડ કર્યું છે, જે બધી નવી સુવિધાઓને સપોર્ટ કરવા માટે વધુ પ્રોસેસિંગ પાવર પ્રદાન કરે છે.
આમાં 40થી વધુ ફંક્શન્સ સાથે કનેક્ટેડ કાર ટેકનોલોજી, વાયરલેસ એન્ડ્રોઇડ ઓટો અને એપલ કારપ્લે, ઓટોમેટિક ક્લાઇમેટ કંટ્રોલ, ક્રુઝ કંટ્રોલ, નવી રીઅર AC વેન્ટ્સ, કૂલ્ડ ગ્લોવબોક્સ, ઓટો-ફોલ્ડ ORVMs, હાઈટ-એડજસ્ટેબલ ડ્રાઇવર સીટ, 4 સ્પીકર્સ અને એક નવું રોટરી ડ્રાઇવ સિલેક્ટરનો સમાવેશ થાય છે. ટિયાગો EVમાં નવા ડોર પેડ્સ, ફ્રન્ટ સેન્ટર આર્મરેસ્ટ, નવી ગ્રે ફેબ્રિક અપહોલ્સ્ટરી અને ગ્લોસ બ્લેક ફિનિશમાં બે વાયરલેસ ચાર્જિંગ પેડ્સ સાથે ફરીથી ડિઝાઇન કરેલું સેન્ટર કન્સોલ પણ મળે છે.
અપડેટેડ ટિયાગો EV હવે 6 એરબેગ્સ સાથે આવે છે, જે અગાઉના ડ્યુઅલ-એરબેગ સેટઅપની જગ્યાએ આપવામાં આવ્યું છે. અન્ય સલામતી સુવિધાઓમાં ટ્રેક્શન કંટ્રોલ સાથે ESP, હિલ હોલ્ડ આસિસ્ટ, TPMS, બ્રેકિંગ દ્વારા ટોર્ક વેક્ટરિંગ અને EBD સાથે ABSનો સમાવેશ થાય છે. ટિયાગો EVમાં બહુવિધ વ્યુઇંગ મોડ્સ અને બ્લાઇન્ડ-વ્યૂ મોનિટર સાથે 360-ડિગ્રી કેમેરા પણ આપવામાં આવ્યું છે. ઓટોમેટિક હેડલેમ્પ્સ, રેઇન-સેન્સિંગ વાઇપર્સ અને ફોલો-મી-હોમ હેડલેમ્પ્સ પણ આપવામાં આવ્યું છે.