પશ્ચિમ બંગાળના બાદુરિયામાં તૃણમૂલ કોંગ્રેસ (TMC) ના એક વરિષ્ઠ નેતાના ફાર્મહાઉસ અને તેની આસપાસના વિસ્તારોમાં પોલીસે પાડેલા દરોડામાં કરોડો રૂપિયાની બિનહિસાબી રોકડ મળી આવતા સમગ્ર રાજ્યના રાજકારણમાં ખળભળાટ મચી ગયો છે. બાદુરિયા નગરપાલિકાના ચેરમેન દીપાંકર ભટ્ટાચાર્યના ફાર્મહાઉસ નજીક આવેલા શણ (Jute) ના ખેતરમાંથી જમીનમાં દાટી રાખેલા કરોડો રૂપિયા મળી આવ્યા છે. અત્યાર સુધીમાં રિકવર કરાયેલી રોકડનો આંકડો ₹2.24 કરોડ ને પાર કરી ગયો છે અને બુધવારની આખી રાત નોટો ગણવાનું કામ ચાલુ રહ્યા બાદ આજે પણ ગણતરી ચાલી રહી છે.
આ સમગ્ર હાઈવોલ્ટેજ ડ્રામાની શરૂઆત 24 મેના રોજ થઈ હતી. બાદુરિયાના સ્થાનિક રહીશોએ અંધારાના સમયે તૃણમૂલ કોંગ્રેસ (TMC) ની ઓફિસમાંથી કેટલીક વાન (ગાડીઓ) માં સામાન બહાર લઈ જવાની શંકાસ્પદ પ્રવૃત્તિ જોઈ હતી. સ્થાનિક લોકોએ તુરંત જ આ અંગે પોલીસને બાતમી આપી હતી. માહિતી મળતાં જ પોલીસે તત્કાલીન એક્શન લઈને TMC પાર્ટી ઓફિસ અને બાદુરિયા નગરપાલિકાના ચેરમેન દીપાંકર ભટ્ટાચાર્યના નજીકના ફાર્મહાઉસ પર દરોડા પાડ્યા હતા.
દરોડા દરમિયાન પોલીસને પાર્ટી ઓફિસ અને ફાર્મહાઉસમાંથી સરકાર દ્વારા રાહત સામગ્રી તરીકે વહેંચવા માટે રાખવામાં આવેલી અંદાજે 4,000 જેટલી તારપત્રી (Tarpaulin sheets) મળી આવી હતી. સ્થાનિક મીડિયા અહેવાલો અનુસાર, મ્યુનિસિપલ ચેરમેનના ફાર્મહાઉસમાંથી અંદાજે ₹80 લાખની રોકડ પણ મળી આવી હતી. આ ઉપરાંત, ઓફિસની બહાર અડધી બળેલી હાલતમાં કેટલાક ગુપ્ત દસ્તાવેજો પણ મળી આવ્યા હતા, જે પુરાવાનો નાશ કરવાનો પ્રયાસ હોવાનું મનાય છે.
ત્યારબાદ તેમને કોર્ટમાં રજૂ કરવામાં આવ્યા હતા, જ્યાં કોર્ટે તેમને પોલીસ કસ્ટડીમાં મોકલી આપ્યા હતા. પોલીસ પૂછપરછ દરમિયાન કડકાઈ દાખવતા ભટ્ટાચાર્યએ પોપટની જેમ બધું જ સત્ય ઓકી દીધું હતું અને ખુલાસો કર્યો હતો કે તેમણે પોતાના ઘરની પાછળ આવેલા શણના ખેતરમાં કરોડો રૂપિયા દાટી રાખ્યા છે.
આ ચોંકાવનારા ખુલાસા બાદ પોલીસે સ્નિફર ડોગ્સ અને ડ્રોન કેમેરાની મદદથી શણના ખેતરમાં મોટું સર્ચ ઓપરેશન શરૂ કર્યું હતું. કલાકો સુધી ચાલેલા ખોદકામ બાદ જમીનમાંથી જે નીકળ્યું તે જોઈને પોલીસ અધિકારીઓ પણ દંગ રહી ગયા હતા. જમીનની અંદર ટ્રોલી બેગ અને કોથળાઓમાં ₹500 ના દરની નોટોના બંડલો અને સોનું ચુસ્તપણે પેક કરીને દાટવામાં આવ્યું હતું.
સોશિયલ મીડિયા પર આ ઘટનાના વીડિયો જોરદાર વાયરલ થઈ રહ્યા છે, જેમાં પોલીસકર્મીઓ ખેતરમાંથી નોટો ભરેલા કોથળા પોતાના ખભા પર ઉંચકીને જતા જોવા મળે છે. આ દ્રશ્ય જોવા માટે ખેતરની આસપાસ હજારો લોકોની ભીડ ઉમટી પડી હતી. નોટોનો જથ્થો એટલો મોટો હતો કે છેવટે તેને ગણવા માટે ખાસ મશીનો મગાવવા પડ્યા હતા. બુધવારે આખી રાત ચાલેલી ગણતરી બાદ આ આંકડો ₹2.24 કરોડ સુધી પહોંચ્યો છે, અને અધિકારીઓનું અનુમાન છે કે આ આંકડો ₹3 કરોડ સુધી પહોંચી શકે છે. આ ઉપરાંત ભટ્ટાચાર્યના ઘરની બિલકુલ બાજુમાં આવેલા એક કમ્પ્યુટર ટ્રેનિંગ સેન્ટર (જે ભટ્ટાચાર્ય પોતે જ ચલાવતા હોવાનું સ્થાનિકોએ જણાવ્યું છે) માંથી પણ રોકડા ભરેલા કેટલાક કોથળા મળી આવ્યા છે.
એક નગરપાલિકાના ચેરમેન પાસે આટલી મોટી રકમ ક્યાંથી આવી તેને લઈને અનેક સવાલો ઉભા થઈ રહ્યા છે. ભાજપે આક્ષેપ કર્યો છે કે આ નાણાં ગેરકાયદેસર ઉઘરાણી (Extortion) અને સરકારી આવાસ યોજનાના ભંડોળની ઉચાપત (Siphoning) કરીને ભેગા કરવામાં આવ્યા હતા.
બીજી તરફ, બંગાળના નેતા દિલીપ ઘોષે પણ આ મામલે TMC પર આકરા પ્રહારો કર્યા છે. તેમણે મીડિયાને જણાવ્યું કે, “દરેક વ્યક્તિ કંઈ પાર્થ ચેટર્જી નથી હોતી જે પોતાની ગર્લફ્રેન્ડના ફ્લેટમાં પૈસા રાખી શકે. તૃણમૂલના ઘણા નેતાઓએ એટલા બધા પૈસા કમાઈ લીધા છે કે હવે તેમને એ જ ખબર નથી પડતી કે આ પૈસા છુપાવવા ક્યાં!” (ઉલ્લેખનીય છે કે 2022માં સ્કૂલ જોબ કૌભાંડમાં તત્કાલીન મંત્રી પાર્થ ચેટર્જીની નજીકની સહયોગી અર્પિતા મુખર્જીના બે ફ્લેટમાંથી ED એ ₹50 કરોડ રોકડા અને સોનું ઝડપ્યું હતું).
આશરે ત્રણ અઠવાડિયા પહેલા બંગાળની ચૂંટણીમાં ભાજપ સામે તૃણમૂલ કોંગ્રેસના કારમા પરાજય બાદથી, પક્ષના કાઉન્સિલરો અને ધારાસભ્યોની ધરપકડનો સિલસિલો સતત ચાલી રહ્યો છે. આ અઠવાડિયાની શરૂઆતમાં જ, ભૂતપૂર્વ મંત્રી જ્યોતિપ્રિય મલિકના નજીકના સાથી ગણાતા TMC નેતા અજિત સાહા અને તેમના ભાઈની ધરપકડ કરવામાં આવી હતી. ગોબરડાંગામાં તેમના નિવાસસ્થાને દરોડા દરમિયાન એક 7mm પિસ્તોલ, એક એરગન, મોટી માત્રામાં કારતૂસ, ₹27 લાખ રોકડા અને વિદેશી દારૂની 52 બોટલો મળી આવી હતી.
આ સતત લાગી રહેલા આંચકાઓ અને પક્ષની અંદર વધી રહેલા આંતરિક અસંતોષને કારણે તૃણમૂલ કોંગ્રેસ છેલ્લા બે દાયકાના તેના સૌથી ગંભીર સંકટનો સામનો કરી રહી છે. વિતેલા અઠવાડિયામાં જ પક્ષના અંદાજે 100 જેટલા કાઉન્સિલરોએ રાજીનામા આપી દીધા છે, જેના કારણે TMC નું સંગઠન હવે સંપૂર્ણપણે પતન થવાના આરે ઉભેલું દેખાઈ રહ્યું છે.