અમેરિકાના રાષ્ટ્રપતિ ડોનાલ્ડ ટ્રમ્પનું એક ટીવી ઇન્ટરવ્યૂ તીખી બહેસમાં ફેરવાઈ ગયું. ઇન્ટરવ્યૂ દરમિયાન ટ્રમ્પે બૂમ પાડી અને ત્યારબાદ ટ્રમ્પ વચ્ચે જ ઇન્ટરવ્યૂ છોડીને જતા રહ્યા. આ ઇન્ટરવ્યૂ સામે આવ્યા બાદ સોશિયલ મીડિયા પર ચર્ચા શરૂ થઇ ગઇ છે, જેના કારણે તેમના સમર્થકો અને વિરોધીઓ બંને તરફથી વિવિધ પ્રતિક્રિયાઓ આવી રહી છે.
આ ઘટના અમેરિકન ટીવી કાર્યક્રમ મીટ ધ પ્રેસ દરમિયાન બની હતી. પત્રકાર ક્રિસ્ટન વેલ્કર ટ્રમ્પને તેમના નવા એન્ટી વેપનાઇઝ્ડ ફંડ અને 6 જાન્યુઆરી, 2021ના રોજ કેપિટોલ હિલ રમખાણો અંગેના દાવાઓ વિશે સવાલ કરી રહ્યા હતા. ટ્રમ્પે જવાબ આપ્યો કે અથવા તો તમે બેઇમાન છો કે મૂર્ખ અને મીટ ધ પ્રેસ પણ બેઇમાન છે. ABC, CBS અને CNN પણ બેઇમાન છે.
અ રીએક્શન એ સવાલના જવાબમાં આપવામાં આવ્યું, જ્યારે વેલ્કરે ટ્રમ્પ પર એ વાતને લઇને દબાણ કર્યું કે શું તેઓ તેમના $1.8 બિલિયનના એન્ટી વેપનાઇઝેશન ફંડને સાથે આગળ વધવાનો પ્લાન બનાવી રહ્યા છે. આ ફંડનો હેતુ એવા વ્યક્તિઓને મદદ કરવાનો છે જેઓ સરકાર દ્વારા સતાવણીનો દાવો કરે છે, જેમાં 6 જાન્યુઆરીએ કેપિટોલમાં ધસી આવેલા લોકોનો પણ સમાવેશ થાય છે.
બહેસ ત્યારે તેજ થઇ ગઇ, જ્યારે ટ્રમ્પે દાવો કર્યો કે 6 જાન્યુઆરીની ઘટનાઓમાં સામેલ કેટલાક વ્યક્તિઓને ખોટી રીતે નિશાન બનાવવામાં આવ્યા હતા. FBI એજન્ટો તે દિવસે પ્રદર્શનકારીઓને બિલ્ડિંગમાં લઈ ઝઇ રહ્યા હતા. વેલ્કરે તરત જ આ દાવા પર સવાલ ઉઠાવતા કહ્યું કે તેના સમર્થનમાં કોઈ નક્કર પુરાવા નથી.
ત્યારબાદ ટ્રમ્પે કહ્યું કે તેમની પાસે પુરાવા છે અને પછી તેમણે 2020ની રાષ્ટ્રપતિની ચૂંટણીમાં છેતરપિંડીના તેમના લાંબા સમયથી ચાલતા આરોપોને પુનરાવર્તિત કર્યા. વેલ્કરે સતત તેમની પાસે પુરાવા માંગતા રહ્યા, જ્યારે ટ્રમ્પ તેમના વલણ પર અડગ રહ્યા.
થોડા સમયમાં વાતાવરણ વધુ ગરમાયું. ટ્રમ્પે મીડિયા પર પ્રહારો કરતા કહ્યું કે, પ્રેસ બેઇમાન છે; વેલ્કરે જવાબમાં કહ્યું કે, તઓ ઇમાનદારીથી પોતાનું કામ કરી રહ્યા છે. દલીલ એટલી હદે વધી ગઈ કે ટ્રમ્પે વેલ્કરને કહ્યું કે અથવા તો તમે બેઇમાન છો અથવા તમને જાણકારી નથી. ત્યારબાદ તેમણે ઇન્ટરવ્યૂ કાર્યક્રમ અને નેટવર્કની સખત ટીકા કરી અને ઇન્ટરવ્યૂ છોડી દીધું.
જતા પહેલા ટ્રમ્પે કહ્યું- ‘બસ, હવે બહું થઇ ગયું. અહીં જ સમાપ્ત કરીએ.’ આટલું કહીને તેઓ વાતચીત વચ્ચે જ ચાલ્યા ગયા. શુક્રવારે વિસ્કોન્સિનમાં રેકોર્ડ કરાયેલ આ ઇન્ટરવ્યૂ રવિવારે પ્રસારિત થયું. ત્યારબાદ સોશિયલ મીડિયા પર તેની ખૂબ ચર્ચા થવા લાગી; સમર્થકોએ ટ્રમ્પનો બચાવ કર્યો, જ્યારે ટીકાકારોએ તેને કઠિન પ્રશ્નો ટાળવાના પ્રયાસ ગણાવ્યો.