ગુજરાતના લોકો ટેસ્ટ આપ્યા વિના જ આ રાજ્યમાંથી ડ્રાઈવિંગ લાયસન્સ મેળવી રહ્યા છે

ગુજરાતમાં ડ્રાઇવિંગ લાયસન્સ મેળવવામાં ઓનલાઇન સિસ્ટમ હોવાથી વાહનચાલકોને લાયસન્સ માટે ભારે પરેશાની ઉઠાવવી પડે છે. છેલ્લાં ઘણા સમયથી ગુજરાતના કેટલાક એજન્ટ દ્વારા રાજસ્થાન તેમજ ઉત્તર પૂર્વીય રાજ્યોના RTO સાથે સાંઠગાંઠ કરીને ગુજરાતના વ્યક્તિને ત્યાં મોકલ્યા વિના જ જે-તે રાજ્યના બનાવટી સરનામા પર ડ્રાઇવિંગ લાયસન્સ ઇશ્યૂ કરવામાં આવે છે. ત્યારબાદ તે ગુજરાતના RTOમાં સરનામું બદલવા માટે અરજી કરવામાં આવે છે. આ કૌભાંડ વાહન વ્યવહાર કમિશનરના ધ્યાનમાં આવતા તેમણે અન્ય રાજ્યોમાંથી ગુજરાતનું સરનામું બદલવાની થતી અરજીઓ અંગે તપાસના આદેશ આપ્યા છે.

ગુજરાત સમાચારના અહેવાલ મુજબ, રાજસ્થાન અને ઉત્તર પૂર્વીય રાજ્યોમાંથી ઇશ્યૂ થયેલા ડ્રાઇવિંગ લાયસન્સ ધરાવતા કેટલાક લોકો દ્વારા ગુજરાતમાં અમદાવાદ સહિતના વિવિધ શહેરોમાં સરનામું બદલવાની મોટા પ્રમાણમાં અરજી કરવાના કિસ્સાઓમાં વધારો થયો હતો. ત્યારે આ અંગે પ્રાદેશિક વાહન વ્યવહાર કચેરીના કમિશનર દ્વારા તપાસના આદેશ આપવામાં આવ્યા હતા. જે અંગે ઊંડાણપૂર્વક તપાસ કરવામાં આવતા નિયમોનો ભંગ કરીને ગેરકાયદે લાયસન્સ ઇશ્યૂ કરવાનું કૌભાંડ સામે આવ્યું હતું.

જેમાં અમદાવાદ કે અન્ય જિલ્લાઓમાં રહેતી વ્યક્તિને ગુજરાતના RTOમાં ડ્રાઇવિંગ લાયસન્સ મેળવવા માટે ટેસ્ટ આપવી ફરજિયાત છે. પરંતુ, RTO ટ્રેક સેન્સર બેઝ હોવાથી મોટાભાગના લોકોને સફળ થતા ન હોવાથી ગુજરાતના કેટલાક RTO એજન્ટ રાજસ્થાન, સિક્કિમ, મણિપુર, આસામ સહિતના રાજ્યોના RTOના અધિકારીઓ સાથે સાંઠગાંઠ કરીને મોટું કૌભાંડ ચાલુ કરી દીધું છે.

રાજસ્થાનના જોધપુર RTOમાં સૌથી વધારે પ્રમાણમાં બોગસ ડ્રાઇવિંગ લાયસન્સ ઇશ્યૂ કરવામાં આવે છે અને એક બોગસ ડ્રાઇવિંગ લાયસન્સ માટે 20 હજાર રૂપિયા સુધી ચાર્જ કરવામાં આવે છે. ગુજરાતમાં આ પેટર્નથી અત્યાર સુધીમાં 3000થી વધુ બોગસ ડ્રાઇવિંગ લાયસન્સ ઇશ્યૂ કરવામાં આવ્યાની વિગતો સામે આવી છે.

જે બાબતના અનુસંધાનમાં વાહનવ્યવહાર કમિશનર દ્વારા આદેશ આપવામાં આવ્યા છે કે હાલ અન્ય રાજ્યોમાંથી ઇશ્યૂ થયેલ ડ્રાઇવિંગ લાયસન્સનું સરનામું બદલવાની થયેલી અરજીઓ અંગે તપાસ કરવી અને જો કોઈ શંકાસ્પદ માહિતી મળે તો લાયસન્સ રદ કરવાની સાથે ગુનો નોંધવા સુધીની કાર્યવાહી પણ કરવી.

ગુજરાત સમાચારના અહેવાલ મુજબ, ગુજરાતમાં રહેતા વ્યક્તિનું આધાર કાર્ડ અને સ્કૂલ લીવીંગ સર્ટિફિકેટ અન્ય રાજ્યોના RTOમાં મોકલે છે. જ્યાં જે તે વ્યક્તિનું નામ અને જન્મ તારીખ સહિતની વિગતો યોગ્ય રાખીને સરનામું ખોટું લખવામાં આવે છે. જેના આધારે કાચું લાયસન્સ ઇશ્યૂ કરવામાં આવે છે. જે લાયસન્સના આધારે ડ્રાઇવિંગ ટેસ્ટ કર્યા વિના જ પાકું ડ્રાઇવિંગ લાયસન્સ ઇશ્યૂ કરીને ગુજરાતમાં રહેતા વ્યક્તિને મોકલી દેવામાં આવે છે. ત્યારબાદ તે વ્યક્તિ દ્વારા સરનામું બદલવા માટે ગુજરાતના RTOમાં અરજી કરવામાં આવે છે.