કોઈ કોલેજની ડિગ્રી નથી, ન તો કોઈ મોટા ધંધાકીય પરિવારમાંથી આવ્યા, ન હતી કરોડોની મૂડી… એક યુવાન જેણે માત્ર રૂ. 65 પ્રતિ મહિને નોકરીની શરૂઆત કરી હતી, તેણે ક્યારેય હાર માની નહીં. આ માણસ, જે એક સમયે રોડ પર ફરીને આઈસ્ક્રીમ વેચતો હતો, તેણે હવે લગભગ રૂ. 20,000 કરોડની કંપની બનાવી છે. આ વાર્તા તમિલનાડુના ઉદ્યોગપતિ RG ચંદ્રમોગનની છે, જેમણે નાની શરૂઆત કરી અને મોટી સફળતા મેળવી.
ઘણા માને છે કે, મોટો વ્યવસાય શરૂ કરવા માટે મોટી રકમ અને ઉચ્ચ શિક્ષણની જરૂર પડે છે. પરંતુ તમિલનાડુના ઉદ્યોગપતિ RG ચંદ્રમોગનએ આ ધારણાને ખોટી સાબિત કરી. ચંદ્રમોગન, જે એક સમયે રૂ. 65 પ્રતિ મહિને નોકરી કરતા હતા, હવે દેશની સૌથી મોટી ખાનગી ડેરી કંપનીઓમાંની એક, હટસન એગ્રો પ્રોડક્ટ્સના સ્થાપક છે. કંપનીનું બજાર મૂલ્ય આશરે રૂ. 20,000 કરોડ છે.
ચંદ્રમોગનનો જન્મ તમિલનાડુના એક સામાન્ય પરિવારમાં થયો હતો. તેમના પિતાએ ચેન્નાઈમાં કરિયાણાની દુકાન શરૂ કરી, પરંતુ થોડા વર્ષો પછી, તે ધંધો સંપૂર્ણપણે પડી ભાંગ્યો. પરિવારને ખાલી હાથે તેમના ગામ પાછું આવવું પડ્યું. અહીં ચંદ્રમોગને વ્યવસાયની મુશ્કેલીઓનો પ્રત્યક્ષ અનુભવ કર્યો.
ભણવાનું પણ તેમના માટે સરળ નહોતું. પ્રિ યુનિવર્સિટીના અભ્યાસ દરમિયાન, તેઓ ગણિતમાં નાપાસ થયા અને આગળ કોલેજનો અભ્યાસ કરી શક્યા નહીં. ત્યારપછી તેમના પિતાએ તેમને લાકડાના ગોડાઉનમાં તાલીમાર્થી તરીકે નોકરીએ લગાવી દીધા, જ્યાં તેઓ માત્ર 65 રૂપિયા મહિને કમાતા હતા. લગભગ એક વર્ષ પછી, તેમણે પોતાનો વ્યવસાય શરૂ કરવાનું નક્કી કર્યું.
તેમના પિતાએ, તેમના પુત્રના સ્વપ્નમાં વિશ્વાસ રાખીને, પરિવારની પૂર્વજોની જમીન 13,000 રૂપિયામાં વેચી દીધી. આ પૈસાથી, તેમણે 1970માં ચેન્નાઈના રોયાપુરમ વિસ્તારમાં માત્ર 250 ચોરસ ફૂટ જગ્યા ભાડે લીધી અને આઈસ્ક્રીમ ફેક્ટરી શરૂ કરી. તેમણે ‘અરુણ’ નામથી આઈસ્ક્રીમ બનાવવાનું શરૂ કર્યું, અને ઘણીવાર તેઓ જાતે ગાડી પર વેચવા માટે રોડ પર નીકળતા હતા.
આઈસ્ક્રીમના વ્યવસાયમાં લગભગ 10 વર્ષ વિતાવ્યા પછી, ચંદ્રમોગનને સમજાયું કે, વાસ્તવિક તક તો દૂધ અને ડેરી ઉત્પાદનોમાં રહેલી છે. ત્યારપછી તેમણે દૂધ, દહીં, ઘી અને માખણ જેવા ઉત્પાદનોનો વેપાર શરૂ કર્યો. ધીમે ધીમે, તેમણે ખેડૂતો અને દુકાનદારોનું મજબૂત નેટવર્ક બનાવ્યું, અને ધીમે ધીમે વ્યવસાયનો વિકાસ થતો રહ્યો.
આજે, હેટસન એગ્રો પ્રોડક્ટ્સ એક લિસ્ટેડ કંપની છે, જેનું બજાર મૂલ્ય આશરે રૂ. 20,000 કરોડ છે. ફોર્બ્સ અનુસાર, RG ચંદ્રમોગનની કુલ સંપત્તિ આશરે 1.6 અરબ ડૉલર છે. તેમની સફળતાની વાર્તા દર્શાવે છે કે, ઈરાદો જો મક્કમ હોય તો 65 રૂપિયાથી શરુ કરેલી નોકરી આગળ જઈને હજારો કરોડની કંપની બનાવી શકે છે.