જેમી ડિમોન જે JPMorgan Chaseના CEO છે, એમણે મીડિયા સૂત્રને જણાવ્યું હતું કે, AI એટલી ઝડપથી આગળ વધી રહ્યું છે કે સરકારોને પણ તેના વૈશ્વિક ફેલાવાને રોકવા માટે સંઘર્ષ કરવો પડી શકે છે. શિકાગોના ઇકોનોમિક ક્લબમાં બોલતા, જેમી ડિમોને કહ્યું કે, AI ઔદ્યોગિક ક્રાંતિ કરતાં વધુ ઝડપથી વિકાસ કરી રહ્યું છે, દર થોડા અઠવાડિયે નવી ક્ષમતાઓ ઉમેરી રહ્યું છે. ચીન સહિત ઘણા દેશોમાં ઓપન-સોર્સ AI મોડેલો અને સિસ્ટમો ઝડપથી ફેલાઈ રહી છે, જેના કારણે સરકારો માટે આ ટેકનોલોજીને નિયંત્રિત કરવી મુશ્કેલ બની રહી છે.
મીડિયા સૂત્રના અહેવાલ મુજબ, જેમી ડિમોન માને છે કે, AIના કારણે કાર્યક્ષમતામાં વધારો થશે. જેના કારણે આગામી 30 વર્ષમાં, લોકોને અઠવાડિયામાં ફક્ત સાડા ત્રણથી ચાર દિવસ જ કામ કરવું પડશે, અને તેમની વાર્ષિક કમાણી 3 લાખ ડૉલર સુધી પહોંચી શકે છે. Dimonનું નિવેદન એવા સમયે આવ્યું છે જ્યારે મોટી ટેક કંપનીઓ AIમાં ઝડપથી રોકાણ કરી રહી છે. Google, Amazon, Microsoft અને Metaએ આ વર્ષે AI-સંબંધિત માળખાગત સુવિધાઓમાં મોટા રોકાણોની યોજના બનાવી છે. આ કંપનીઓનો કુલ મૂડી ખર્ચ 700 અરબ ડૉલરથી વધુ થવાનો અંદાજ છે.
એટલું જ નહીં, ડિમોને તો ચેતવણી આપી હતી કે, AI એજન્ટો દિવસ-રાત સાયબર હુમલાઓ કરી શકે છે. જો તેમને લોકો વતી ચુકવણી કરવા માટે બેંક ખાતાઓની ઍક્સેસ આપવામાં આવે, તો આ સુરક્ષા જોખમો ઉભા કરી શકે છે. તેમણે વધુમાં જણાવ્યું હતું કે જો AI એજન્ટો નાણાકીય ખાતાઓની ઍક્સેસ મેળવ્યા પછી વપરાશકર્તાઓના શ્રેષ્ઠ હિતમાં કાર્ય નહીં કરે, તો લોકો જોખમમાં મુકાઈ શકે છે.
ડિમોનના મતે, કંપનીઓ અને સરકારોએ આ સાયબર સુરક્ષા જોખમોને સંબોધવા માટે ઝડપી પગલાં લેવાની જરૂર છે. તેમણે કહ્યું કે, AIના ફેલાવાને રોકવાને બદલે, પ્રાથમિકતા એ હોવી જોઈએ કે તેના આગળ વધવાને કારણે ઉદ્ભવતા જોખમોની સંભાળ રાખવાની.
મીડિયા સૂત્રોના અહેવાલ મુજબ બેંક ઓફ અમેરિકાએ અદ્યતન AI મોડેલો દ્વારા જાહેર કરાયેલી સોફ્ટવેર નબળાઈઓને દૂર કરવા માટે 1000 બાહ્ય સલાહકારોની નિમણૂંક કરી હતી. જેમાં નાણાકીય ક્ષેત્રમાં AI-સંબંધિત સુરક્ષા જોખમો વિશે વધતી ચિંતાઓ બહાર આવી છે.