ટી-સીરિઝના માલિકની પત્નીનો આરોપ, આલિયા જાતે ટિકિટ ખરીદે છે અને ફેક કલેક્શન…

11 ઓક્ટોબરે રીલિઝ થયેલી આલિયા ભટ્ટની ફિલ્મ વિવાદમાં આવી ગઈ છે. ફિલ્મને રિવ્યૂ તો સારા મળ્યા છે અને પહેલા દિવસે ફિલ્મે કમાણી પણ 4.55 કરોડની કરી લીધી છે. નવરાત્રી ચાલતી હોવા છતા આટલી કમાણી કરવી એક્સપર્ટના મતે સારું કહેવાય. પણ ફિલ્મની સ્ટોરીને લઈને અનેક સવાલ ઉઠી રહ્યા છે. આ ફિલ્મનું નિર્માણ કરણ જોહરની કંપની ધર્મા એન્ટરટેઈનમેન્ટે કર્યું છે. ‘જીગરા’ની રીલિઝ પહેલા ધર્માએ જાહેરાત કરી હતી કે તે હવેથી ફિલ્મોના પ્રેસ શો નહીં કરે. સામાન્ય રીતે, પ્રેસ શોમાં, ફિલ્મ મીડિયાના સભ્યોને એક દિવસ અગાઉ બતાવવામાં આવે છે. પરંતુ હવે ધર્માએ આ પ્રથા બંધ કરી દીધી છે.

‘જીગરા’ રીલિઝ થઈ ત્યાર બાદ સોશિયલ મીડિયા પર વિવાદ શરૂ થયો હતો. કેટલાક લોકોએ લખવાનું શરૂ કર્યું કે આ ફિલ્મની વાર્તા ‘સવી’ નામની ફિલ્મમાંથી ઉપાડવામાં આવી છે. ‘સવી’ મે 2024માં રીલિઝ થઈ હતી. તે અભિનવ દેવ દ્વારા બનાવવામાં આવી હતી. કલાકારોમાં દિવ્યા ખોસલા અને અનિલ કપૂર જેવા નામો સામેલ હતા. હવે ‘જીગરા’ રીલિઝ થયા બાદ દિવ્યા ખોસલા કુમારે એક વિવાદાસ્પદ સ્ટોરી શેર કરી છે. તેણે તેના ઈન્સ્ટાગ્રામ પર એક ફોટો પોસ્ટ કર્યો જેમાં થિયેટર સ્ક્રીન પર ‘જીગરા’ ચાલી રહી હતી.

દિવ્યાએ પોતાની સ્ટોરીમાં લખ્યું છે કે, ‘જીગરા’ના શો માટે સિટી મોલ પીવીઆરમાં ગઈ હતી. થિયેટર સાવ ખાલી હતું. સર્વત્ર થિયેટરો ખાલી થઈ રહ્યા છે. આલિયા ભટ્ટમાં ખરેખર જીગરા છે. પોતે ટિકિટ ખરીદી અને નકલી કલેક્શનની જાહેરાત કરી રહી છે. વેચાયેલી મીડિયા કેમ ચૂપ છે તે સમજી શકાતું નથી.

દિવ્યાએ તેની વાર્તાના અંતમાં હેશટેગ્સ મૂક્યા. ત્યાં લખ્યું હતું કે પ્રેક્ષકોને મૂર્ખ બનાવશો નહીં, સત્ય હંમેશાં અસત્યને પછાડે છે. દિવ્યાએ તેની વાર્તામાં ક્યાંય ‘સાવી’ નો ઉલ્લેખ કર્યો નથી. જોકે, ટુ પ્લસ ટુ કર્યા બાદ લોકો સમજી ગયા કે શું વાત થઈ રહી છે. જો ‘સાવી’ અને ‘જીગરા’ની વાર્તાની વાત કરીએ તો બંનેમાં ઘણી હદ સુધી સામ્યતા છે. ‘સાવી’માં હર્ષવર્ધન રાણેનું પાત્ર જેલમાં જાય છે. તે પછી તેની પત્ની તેને ત્યાંથી બહાર કાઢવાનો પ્લાન બનાવે છે. તે પત્નીની ભૂમિકા દિવ્યાએ ભજવી હતી.

‘જીગરા’માં વેદાંગ રૈનાનું પાત્ર જેલમાં જાય છે. ફિલ્મમાં તેની બહેનની ભૂમિકા ભજવતી આલિયા ભટ્ટ તેને જેલમાંથી બહાર કાઢવાનો પ્રયાસ કરે છે. અત્યાર સુધી આ વિવાદ માત્ર સોશિયલ મીડિયા પર જ ચાલતો હતો. કોપી-પેસ્ટિંગનો આક્ષેપ જનતા કરી રહી હતી. ફિલ્મના નિર્માતાએ કંઈ કહ્યું નથી. હવે દિવ્યાએ સત્તાવાર નિવેદન આપ્યું છે. તમને જણાવી દઈએ કે સમાચાર લખાય છે ત્યાં સુધી દિવ્યાના નિવેદન પર ‘જીગરા’ની ટીમ તરફથી કોઈ પ્રતિક્રિયા આપવામાં આવી નથી.