ભારત અને ચીન તેમના સૈનિકોને પાછા ખેંચવા અને વાસ્તવિક નિયંત્રણ રેખા પર પેટ્રોલિંગ ફરી શરૂ કરવા માટે એક નવા કરાર પર પહોંચ્યા છે. અહેવાલ મુજબ આ કરાર ડેપસાંગ અને ડેમચોક વિસ્તારોમાં પેટ્રોલિંગ સાથે સંબંધિત છે. માહિતી અનુસાર, સંઘર્ષના આ બંને બિંદુઓ (ડેપસાંગ અને ડેમચોક) પર પેટ્રોલિંગ શરૂ થઈ ગયું છે અને ટૂંક સમયમાં બંને દેશો તેમના સૈનિકોને પાછા હટાવવાનું શરૂ કરશે, જેને સૈન્યની ભાષામાં ડિસઇંગેન્ટમેન્ટ કહેવામાં આવે છે. વિદેશ સચિવ વિક્રમ મિસરીએ સોમવારે આ અંગે માહિતી આપી હતી. તેમણે કહ્યું કે, 2020માં પૂર્વી લદ્દાખમાં જે તણાવ પેદા થયો હતો, તે પેટ્રોલિંગ સિસ્ટમને લઈને બંને દેશો વચ્ચે થયેલી સમજૂતીને કારણે ધીમે ધીમે ઉકેલાઈ રહ્યો છે.
22-23 ઓક્ટોબરે યોજાનારી 16મી બ્રિક્સ સમિટ માટે PM નરેન્દ્ર મોદીની રશિયાની મુલાકાત પહેલા આ મહત્વપૂર્ણ ઘટનાક્રમ સામે આવ્યો છે. બ્રિક્સ સમિટ દરમિયાન ચીનના રાષ્ટ્રપતિ શી જિનપિંગ અને PM નરેન્દ્ર મોદી વચ્ચે દ્વિપક્ષીય વાટાઘાટોની સંભાવના પર વિદેશ સચિવ વિક્રમ મિસરીએ કહ્યું, ‘ભારત અને ચીન વચ્ચે છેલ્લા ઘણા અઠવાડિયાથી રાજદ્વારી અને સૈન્ય વાટાઘાટો થઈ રહી છે. અમે LAC મુદ્દાઓ પર ચીન સાથે કરાર કર્યો છે. સૈનિકોને પાછા ખેંચવા અને પરિસ્થિતિના નિરાકરણ માટે પેટ્રોલિંગની વ્યવસ્થા કરવામાં આવી છે. દ્વિપક્ષીય વાટાઘાટોના મુદ્દે, અમે હજુ પણ સમય અને પ્રતિબદ્ધતાઓ અનુસાર કામ કરી રહ્યા છીએ.’
બંને દેશોના અધિકારીઓ વચ્ચે તાજેતરની વાટાઘાટો પછી, ભારત અને ચીન પૂર્વી લદ્દાખમાં વાસ્તવિક નિયંત્રણ રેખા (LAC) પર પેટ્રોલિંગ માટે એક સમજૂતી પર પહોંચ્યા છે. મિસરીએ કહ્યું કે, પેટ્રોલિંગ સંબંધિત સમજૂતી પછી બંને દેશો વચ્ચે LAC પર તણાવ ઓછો થવાની આશા છે. વિદેશ સચિવે કહ્યું કે, વાસ્તવિક નિયંત્રણ રેખા પર બાકી રહેલા મુદ્દાઓને ઉકેલવા માટે ભારતીય અને ચીનના વાટાઘાટકારો છેલ્લા કેટલાક અઠવાડિયાથી સંપર્કમાં છે. અહીં તમને જણાવી દઈએ કે, પૂર્વી લદ્દાખની ગલવાન ઘાટીમાં 15-16 જૂન 2020ના રોજ ભારતીય અને ચીની સૈનિકો વચ્ચે અથડામણ થઈ હતી. આમાં 20 ભારતીય સૈનિકો માર્યા ગયા હતા અને લગભગ બમણા ચીનના સૈનિકો પણ માર્યા ગયા હતા. જો કે, ચીનની પીપલ્સ લિબરેશન આર્મીએ ક્યારેય તેના સૈનિકો વિશે સત્તાવાર આંકડા જાહેર કર્યા નથી.
આ ઘટના પછી બંને દેશો વચ્ચેના સંબંધો તણાવપૂર્ણ બન્યા છે. અહીં તમને જણાવી દઈએ કે, બ્રિક્સ સમિટ રશિયાના કઝાન શહેરમાં 22 ઓક્ટોબરથી શરૂ થશે. પ્રથમ દિવસે બ્રિક્સ નેતાઓ માટે રાત્રિભોજનનું આયોજન કરવામાં આવશે. 23 ઓક્ટોબરે બે મુખ્ય સત્રો થશે. સવારના સત્ર પછી, સમિટના મુખ્ય વિષય પર બપોરે ખુલ્લું સત્ર થશે. આ સત્રમાં BRICS નેતાઓ પણ કઝાન ઘોષણા સ્વીકારે તેવી અપેક્ષા છે. આ ઘોષણા બ્રિક્સ માટે આગળનો માર્ગ તૈયાર કરશે. BRICS સમિટ 24 ઓક્ટોબરે પૂર્ણ થશે. જોકે, PM નરેન્દ્ર મોદી ઘરેલુ પ્રતિબદ્ધતાઓને કારણે 23 ઓક્ટોબરે નવી દિલ્હી પરત ફરશે. બ્રિક્સ સમિટની સાથે સાથે, PM નરેન્દ્ર મોદી કેટલીક દ્વિપક્ષીય બેઠકો યોજે તેવી અપેક્ષા છે.
