નકલી દેશી ઘીના વેપારીઓ દરેક તહેવારોમાં સારી રીતે રોકડી કરી લે છે. અમૂલ, પતંજલિ, રિયલ ગોલ્ડ સહિતની 18 જાણીતી બ્રાન્ડની વેલ્યુનો પૂરો લાભ ઉઠાવવામાં આવતો હતો. જે તે વિસ્તારમાં વધુ વેચાતી બ્રાન્ડના નામે પેકેજિંગ કરી નકલી ઘી વેચવામાં આવતું હતું. બે વર્ષમાં અંદાજે રૂ. 10 કરોડનું નકલી ઘી વેચાયું હતું. તપાસ દરમિયાન પોલીસને રૂ. 1.18 કરોડના વેચાણના પુરાવા મળ્યા હતા.
વર્ષ 2022માં નકલી ઘીના વેપારીઓએ આગ્રા શહેરના કહરઈના વળાંક પાસે મારુતિ પ્રવાસ કોલોનીમાં ફેક્ટરી ખોલી હતી. આ માટે ત્રણ વેરહાઉસ ભાડે લેવામાં આવ્યા હતા. 10 ડિસેમ્બર 2022ના રોજ બજરંગ ટ્રેડર્સને પ્રથમ વખત નકલી ઘી મોકલવામાં આવ્યું હતું. તપાસમાં સામે આવ્યું છે કે, 8 નવેમ્બર 2024 સુધી બજરંગ ટ્રેડર્સને 43 લાખ રૂપિયાનું નકલી ઘી મોકલવામાં આવ્યું હતું. મેનેજર રાજેશ ભારદ્વાજે ધ્યાન રાખ્યું હતું કે, આ ઘી નકલી છે તેની કોઈપણ પ્રકારે સાબિતી ન થાય. વેરહાઉસમાંથી તમામ બિલોની નકલો મળી આવી હતી.
આસિસ્ટન્ટ કમિશનર ફૂડ શશાંક ત્રિપાઠીએ જણાવ્યું કે નકલી દેશી ઘીના 13 સેમ્પલ લેવામાં આવ્યા છે. તપાસ માટે લેબોરેટરીમાં મોકલી આપવામાં આવેલ છે. 14 દિવસમાં રિપોર્ટ આવશે.
રાજેશ ભારદ્વાજ અને અન્યો દ્વારા ખાલી ડબ્બા પણ ખરીદવામાં આવતા હતા. આ ડબ્બા ભંગારના ડીલરો પાસેથી ખરીદવામાં આવ્યું હોવાનું તપાસમાં બહાર આવ્યું છે. એક ડબ્બો 15 કિલો ઘી સમાય તેટલો હતો. તેમાં લગાવેલું લેબલ દૂર કર્યા પછી, એક અલગ બ્રાન્ડનું નવું લેબલ મૂકવામાં આવતું હતું. અહીં તમને જણાવી દઈએ કે, નકલી દેશી ઘી અંગે ફરિયાદો મળી હતી. તેમ છતાં સત્તાધીશો દ્વારા તેના પર ધ્યાન આપવામાં આવ્યું ન હતું. નકલી ઘીના વેપારીઓ તેનો ફાયદો ઉઠાવતા રહ્યા.
એપ્રિલ 2024ના રોજ અક્ષય ટ્રેડર્સને 1.91 લાખ અને શ્યામ ટ્રેડર્સને 1.52 લાખ, અનંત કુમાર અને સતીશ કુમાર જમ્મુને 11 માર્ચ 2024 સહિત અન્ય તારીખોએ 13.47 લાખ, નાગચંદ્ર જમ્મુને 8 માર્ચ 2024ના રોજ 2 લાખ, વિભુ એજન્સી ગોંડાને 1.28 લાખ, ગોયલ ટ્રેડર્સ મેરઠના વેપારીને 6.34 લાખ, ન્યુ ટ્રેડર્સ 2.78 લાખ અને અનિલ ટ્રેડર્સ પ્રયાગરાજને રૂ. 1.41 લાખ, ઓમ એજન્સીઝ શાહજહાંપુરને રૂ. 35 હજાર, ગોકુલ કંપની બિહારને રૂ. 89 હજાર, ઓમ ટ્રેડિંગ ઉદેપુર રાજસ્થાનને રૂ. એક લાખનું નકલી ઘી મોકલવામાં આવ્યું હતું.
શહેરના કહરઈ વળાંક પાસે છ મહિનાથી નકલી દેશી ઘી બનાવવાની ફેક્ટરી ચાલી રહી હતી. એક વીઘામાં ચાલતી ફેક્ટરીમાં ત્રણ મોટા વેરહાઉસ હતા. દરરોજ 350 કિલો નકલી ઘી તૈયાર કરવામાં આવતું હતું. એક કિલો નકલી ઘી બનાવવાની કિંમત 170 રૂપિયા થતી હતી અને તે બજારમાં 600 રૂપિયામાં વેચાતું હતું. આ ટોળકીનું નેટવર્ક ઉત્તર પ્રદેશ, જમ્મુ, રાજસ્થાન, મધ્યપ્રદેશ સહિત સાત રાજ્યોમાં ફેલાયેલું છે. ફૂડ સેફ્ટી એન્ડ ડ્રગ્સ એડમિનિસ્ટ્રેશન (FSDA) સાથે પણ કોઈ નોંધણી કરવામાં આવી ન હતી. નકલી ઘીના પેકિંગ પર ગ્વાલિયરના ફૂડ ડિપાર્ટમેન્ટનો માત્ર રજિસ્ટ્રેશન નંબર જ દર્શાવવામાં આવ્યો હતો.
આ પછી પણ FSDAના અધિકારીઓને તેના વિશે કોઈ ગંધ સુધ્ધાં ના આવી. ગુરુવારે કહરઈ વળાંક પાસેના કારખાનામાં પાંચ કલાક સુધી કાર્યવાહી ચાલુ રહી હતી. આગ્રા નકલી અને ભેળસેળયુક્ત ઘી બનાવવાનું કેન્દ્ર બની ગયું છે. વિજય નગર કોલોની, ટ્રાન્સ યમુના, શાસ્ત્રીપુરમ, સિકંદરા, રૂનકતા સહીત અન્ય વિસ્તારોમાં નકલી ઘી ઝડપાઇ ચૂક્યું છે. કહરઈ વળાંક પાસે મારુતિ પ્રવાસમાં નકલી દેશી ઘીની ફેક્ટરી કંઈ એક દિવસમાં નથી ખુલી.
નીરજ અગ્રવાલ, બ્રજેશે એક વર્ષ પહેલા જ તેની તૈયારી શરૂ કરી દીધી હતી. નીરજની ગ્વાલિયરમાં પણ ઘણી ફેક્ટરીઓ છે, જેમાં દેશી ઘી અને અન્ય ઉત્પાદનો બનાવવામાં આવે છે. છ મહિના પહેલા એક પછી એક મશીનો લાવવામાં આવ્યા અને રિફાઈન્ડ અને અન્ય વસ્તુઓ મંગાવવાનું શરુ કરવામાં આવ્યું. નીરજે ગ્વાલિયરથી ત્રણ કર્મચારીઓને નોકરીએ રાખ્યા. જેમાં શિવચરણ, રવિ, ભાસ્કર ગૌતમ અને સાગર નિવાસી ધર્મેન્દ્ર સિંહનો સમાવેશ થાય છે.
પૂછપરછ દરમિયાન કર્મચારીઓએ જણાવ્યું કે, ફેક્ટરીને ત્રણ ભાગમાં વહેંચવામાં આવી છે. તેમાંથી એકમાં મશીનો રાખવામાં આવ્યા છે અને બાકીના બે વેરહાઉસમાં બનાવેલું ઘી અને ખાલી ડબ્બા રાખવામાં આવ્યા છે. એક કાગળ પર ઘીનો જથ્થો લખીને આવતો હતો. આ માહિતી મેનેજર દ્વારા આપવામાં આવી હતી. ફેક્ટરીમાં દરરોજ 350 કિલો નકલી ઘી તૈયાર કરવામાં આવતું હતું. નકલી ઘી બનાવવા માટે એસેન્સ અને BR તેલને રિફાઈન્ડમાં ઉમેરવામાં આવતું હતું. 100 રૂપિયામાં વેચાતા પામ તેલનો આમા ઉપયોગ કરવામાં આવતો હતો.
આ સાથે, સુગંધ લાવવા માટે, નકલી ઘીમાં શુદ્ધ દેશી ઘીનો વઘાર કરીને ઉમેરવામાં આવતો હતો. નકલી ઘી તૈયાર કરીને 15 કિલોના ટીનમાં રાખવામાં આવતું હતું અને તેને કોઈપણ રાજ્ય કે પ્રદેશમાં માંગ પ્રમાણે વેચવામાં આવતું હતું. આસિસ્ટન્ટ કમિશનર ફૂડ શશાંક ત્રિપાઠીએ જણાવ્યું કે, એક કિલો નકલી ઘી 150 રૂપિયામાં તૈયાર કરીને 600 રૂપિયામાં વેચવામાં આવતું હતું. તેને જાણીતી બ્રાન્ડ તરીકે લેબલ કરવામાં આવ્યું હોવાથી, કોઈને તેના પર શંકા જતી ન હતી. તે સરળતાથી વેચાઈ જતું હતું.
