27 વર્ષ પછી ઈચ્છા પુરી થઇ, ઓસ્ટ્રેલિયાને હરાવી દક્ષિણ આફ્રિકા બન્યું ટેસ્ટ વર્લ્ડ ચેમ્પિયન, ‘ચોકર્સ’નો ટેગ ધોવાઈ ગયો

ICC ટ્રોફી જીતવા માટે દક્ષિણ આફ્રિકાની 27 વર્ષની રાહ આખરે પૂરી થઈ. 1998માં ચેમ્પિયન્સ ટ્રોફી જીત્યા પછી, દક્ષિણ આફ્રિકા એક પછી એક ICC ટ્રોફીમાં નિરાશ થઈ રહ્યું હતું. સમગ્ર ટુર્નામેન્ટ દરમિયાન વિસ્ફોટક રમત દર્શાવવા છતાં, ટીમ નોકઆઉટમાં જઈને હારી જતી હતી. ટીમને ‘ચોકર્સ’નો ટેગ મળ્યો હતો. પરંતુ હવે દક્ષિણ આફ્રિકાએ 2023-25ના વર્લ્ડ ટેસ્ટ ચેમ્પિયનશિપના ટાઇટલ મેચમાં ઓસ્ટ્રેલિયાને હરાવ્યું છે. એડન માર્કરમની સંઘર્ષપૂર્ણ સદી અને ટેમ્બા બાવુમાની કેપ્ટન્સી ઇનિંગને કારણે દક્ષિણ આફ્રિકાને આ જીત મળી છે. લંડનના ઐતિહાસિક લોર્ડ્સ ક્રિકેટ ગ્રાઉન્ડ પર રમાયેલી વર્લ્ડ ટેસ્ટ ચેમ્પિયનશિપની ફાઇનલમાં, દક્ષિણ આફ્રિકાને જીતવા માટે 282 રનનો લક્ષ્યાંક મળ્યો હતો, તેણે રમતના ચોથા દિવસે પહેલા સત્રમાં 5 વિકેટ ગુમાવીને 285 રન બનાવ્યા હતા. આ રીતે ટીમે 5 વિકેટથી જીત મેળવી.

દક્ષિણ આફ્રિકાની જીતના હીરો એડન માર્કરમે 207 બોલમાં 136 રનની ઇનિંગ રમી હતી. માર્કરમ પહેલી ઇનિંગમાં ખાતું પણ ખોલી શક્યો ન હતો. જ્યારે તે આઉટ થયો ત્યારે ટીમને જીતવા માટે ફક્ત 6 રનની જરૂર હતી. માર્કરમને શાનદાર સપોર્ટ આપનાર કેપ્ટન ટેમ્બા બાવુમા ચોથા દિવસના પહેલા સત્રમાં વધુ સમય ક્રીઝ પર ટકી શક્યો નહીં અને 66 રન બનાવીને આઉટ થયો. ઓસ્ટ્રેલિયાએ ચુસ્ત બોલિંગ કરી. દક્ષિણ આફ્રિકાની ટીમ થોડી મુશ્કેલીમાં દેખાતી હતી પરંતુ અંતે લક્ષ્ય સુધી પહોંચી ગઈ. બેડિંગહામ અને વેરેનની જોડીએ ટીમને લક્ષ્ય સુધી પહોંચાડી.

લોર્ડ્સના મેદાન પર ટેસ્ટ ઇતિહાસમાં આ બીજો સૌથી મોટો રન ચેઝ છે. આ મેચ પહેલા અહીં ચોથી ઇનિંગમાં ફક્ત ચાર વખત 200થી વધુનો સ્કોર ચેઝ કરવામાં આવ્યો હતો. હવે દક્ષિણ આફ્રિકાએ પણ આ સિદ્ધિ મેળવી છે. આ મેદાન પર સૌથી મોટા રન ચેઝનો રેકોર્ડ વેસ્ટ ઇન્ડિઝના નામે છે. 1984માં વેસ્ટ ઇન્ડિઝે ઇંગ્લેન્ડ સામે ચોથી ઇનિંગમાં 342 રનનો ટાર્ગેટ પીછો કર્યો હતો. ઇંગ્લેન્ડે 2004માં ન્યૂઝીલેન્ડ સામે ફક્ત 282 રન બનાવીને જીત મેળવી હતી.

લોર્ડ્સ ખાતે ટેસ્ટ મેચમાં સૌથી મોટો સફળ રન ચેઝ: લક્ષ્ય: 342 રન–વેસ્ટ ઇન્ડીઝ (344/1) વિરુદ્ધ ઇંગ્લેન્ડ-1984, લક્ષ્ય: 282 રન–દક્ષિણ આફ્રિકા (285/5) વિરુદ્ધ ઓસ્ટ્રેલિયા-2025, લક્ષ્ય: 282 રન–ઇંગ્લેન્ડ (282/3) વિરુદ્ધ ન્યૂઝીલેન્ડ-2004, લક્ષ્ય: 277 રન–ઇંગ્લેન્ડ (279/5) વિરુદ્ધ ન્યૂઝીલેન્ડ-2022, લક્ષ્ય: 216 રન–ઇંગ્લેન્ડ (218/3) વિરુદ્ધ ન્યૂઝીલેન્ડ-1965.

જ્યારે દક્ષિણ આફ્રિકા ચોથી ઇનિંગમાં લક્ષ્યનો પીછો કરવા ઉતર્યું, ત્યારે ઓસ્ટ્રેલિયાએ તેમને ફક્ત 9 રનના સ્કોર પર પહેલો ઝટકો આપ્યો. રાયન રિકેલ્ટન માત્ર 6 રન બનાવીને આઉટ થયો. જોકે, આ પછી વિઆન મુલ્ડરે માર્કરામ સાથે મળીને 61 રનની ભાગીદારી કરીને દક્ષિણ આફ્રિકાને મજબૂત સ્થિતિમાં પહોંચાડ્યું. આ વિકેટ પછી, માર્કરામ અને બાવુમા વચ્ચે 166 રનની ભાગીદારી થઈ.

લંડનના ઐતિહાસિક લોર્ડ્સ ક્રિકેટ ગ્રાઉન્ડ પર રમાયેલી વર્લ્ડ ટેસ્ટ ચેમ્પિયનશિપ 2025ની ફાઇનલમાં, દક્ષિણ આફ્રિકાની ટીમે ટોસ જીતીને પ્રથમ બોલિંગ કરવાનો નિર્ણય લીધો. બોલરોએ કેપ્ટન ટેમ્બા બાવુમાના નિર્ણયને બિલકુલ યોગ્ય સાબિત કર્યો અને ઓસ્ટ્રેલિયાની પહેલી ઇનિંગ માત્ર 212 રનમાં ઓલઆઉટ કરી દીધી. આ ઇનિંગમાં દક્ષિણ આફ્રિકા તરફથી કાગીસો રબાડાએ શાનદાર બોલિંગ કરીને પોતાના પંજા ખોલ્યા. આ ઉપરાંત, માર્કો યાનસેનએ પણ ત્રણ વિકેટ લીધી, જ્યારે કેશવ મહારાજ અને એડન માર્કરમને એક-એક સફળતા મળી.

ઓસ્ટ્રેલિયા દ્વારા પ્રથમ ઇનિંગમાં બનાવેલા 212 રનના જવાબમાં, દક્ષિણ આફ્રિકાની બેટિંગ પણ ખાસ નહોતી. ઓસ્ટ્રેલિયન બોલરોએ પણ વળતો પ્રહાર કર્યો અને દક્ષિણ આફ્રિકાને માત્ર 138 રનમાં ઓલઆઉટ કરી દીધું. પરિણામ એ આવ્યું કે કાંગારૂ ટીમને પ્રથમ ઇનિંગમાં 74 રનની નોંધપાત્ર લીડ મળી. ઓસ્ટ્રેલિયા તરફથી બોલિંગમાં, કેપ્ટન પેટ કમિન્સે પોતે જ ભારે તબાહી મચાવી અને 6 વિકેટ લીધી. આ ઉપરાંત મિશેલ સ્ટાર્કે 2 અને જોશ હેઝલવુડે 1 વિકેટ લીધી.

મેચની બીજી ઇનિંગમાં દક્ષિણ આફ્રિકા માત્ર 138 રનમાં ઓલઆઉટ થયા પછી, એવું લાગતું હતું કે, ઓસ્ટ્રેલિયન ટીમ બદલો લેશે અને બેટિંગમાં અજાયબીઓ કરશે, પરંતુ આવું બન્યું નહીં. દક્ષિણ આફ્રિકાના બોલરોએ ત્રીજા ઇનિંગમાં ઓસ્ટ્રેલિયાને 207 રનમાં ઓલઆઉટ કરી દીધું. આ રીતે, દક્ષિણ આફ્રિકાને ચોથી ઇનિંગમાં જીત માટે 282 રનનો લક્ષ્યાંક આપવામાં આવ્યો. ત્રીજા ઇનિંગમાં, રબાડાએ ફરી એકવાર દક્ષિણ આફ્રિકા માટે 4 વિકેટ લીધી જ્યારે લુંગી એનગિડીએ 3 વિકેટ લીધી જ્યારે માર્કો જેન્સન, વિઆન મુલ્ડર અને માર્કરમે એક-એક વિકેટ લીધી.