નાના દેશોમાં ટેસ્ટ ક્રિકેટને વ્યવહારુ અને લોકપ્રિય બનાવવા માટે આંતરરાષ્ટ્રીય ક્રિકેટ પરિષદ (ICC) એક મોટું પગલું ભરવા જઈ રહી છે. આંતરરાષ્ટ્રીય ક્રિકેટ પરિષદ (ICC) એક મોટા ફેરફાર તરફ આગળ વધી રહી છે. એક અહેવાલમાં દાવો કરવામાં આવ્યો છે કે, ICC 2027-29 વર્લ્ડ ટેસ્ટ ચેમ્પિયનશિપ (WTC) ચક્રમાં નાના દેશો માટે ચાર દિવસની ટેસ્ટ મેચોને મંજૂરી આપવા માટે તૈયાર છે. બીજી તરફ, ભારત, ઓસ્ટ્રેલિયા અને ઇંગ્લેન્ડ હજુ પણ પરંપરાગત 5-દિવસીય મેચ રમી શકે છે.
મેચોની સંખ્યા એક દિવસ ઘટાડવાનો નિર્ણય એક મહત્વપૂર્ણ ફેરફાર હશે અને નાના દેશોને વધુ ટેસ્ટ અને લાંબી અવધિની શ્રેણી રમવામાં મદદ કરશે. 2025-27 વર્લ્ડ ટેસ્ટ ચેમ્પિયનશિપ 5-દિવસીય મેચોના વર્તમાન ફોર્મેટ હેઠળ રમાશે.
મીડિયા સૂત્રોના એક અહેવાલમાં જણાવાયું છે કે, ‘ગયા અઠવાડિયે લોર્ડ્સમાં WTC ફાઇનલ દરમિયાન થયેલી ચર્ચામાં, ICC પ્રમુખ જય શાહે 2027-29 WTC ચક્ર માટે 4-દિવસીય ટેસ્ટ માટે પોતાનો ટેકો જાહેર કર્યો હતો.’
તેમાં કહેવામાં આવ્યું છે કે, ‘ઇંગ્લેન્ડ, ઓસ્ટ્રેલિયા અને ભારતને ત્યારે પણ એશિઝ, બોર્ડર-ગાવસ્કર ટ્રોફી અને એન્ડરસન-તેંડુલકર ટ્રોફી માટે 5-દિવસીય ટેસ્ટ શ્રેણી રમવાની મંજૂરી આપવામાં આવશે.’
ICCએ સૌપ્રથમ 2017માં દ્વિપક્ષીય મેચો માટે 4-દિવસીય ટેસ્ટને મંજૂરી આપી હતી. 2019 અને 2023માં આયર્લેન્ડ સામે 4-દિવસીય ટેસ્ટ પછી, ઇંગ્લેન્ડે ગયા મહિને ટ્રેન્ટ બ્રિજ ખાતે ઝિમ્બાબ્વે સામે 4-દિવસીય ટેસ્ટ પણ રમી હતી.
અહેવાલ મુજબ, ‘ઘણા નાના દેશો સમય અને ખર્ચને કારણે ટેસ્ટ મેચોનું આયોજન કરવામાં રસ ધરાવતા નથી, પરંતુ 4-દિવસીય ટેસ્ટ મેચોની શરૂઆત થવાની સાથે, 3 ટેસ્ટ મેચોની આખી શ્રેણી 3 અઠવાડિયાથી ઓછા સમયમાં રમી શકાય છે.’
તેમાં કહેવામાં આવ્યું છે કે, ‘સમયનો બગાડ અટકાવવા માટે, 4-દિવસીય ટેસ્ટ મેચોમાં રમવાનો સમય 90 ઓવર પ્રતિ દિવસથી વધારીને ઓછામાં ઓછો દિવસમાં 98 ઓવર કરવામાં આવ્યો છે.’
અહેવાલમાં કહેવામાં આવ્યું છે કે, ‘ગયા અઠવાડિયે લોર્ડ્સમાં ઓસ્ટ્રેલિયા સામેની રોમાંચક ફાઇનલમાં વિશ્વ ચેમ્પિયન બનવા છતાં, દક્ષિણ આફ્રિકાના કંટાળાજનક કાર્યક્રમે આ મુદ્દાને વધુ પ્રકાશિત કર્યો અને આ પછી ફેરફારની જરૂરિયાત અનુભવાઈ હતી.’
2025-27 ટેસ્ટ ચેમ્પિયનશિપ હજુ પણ જૂના પાંચ-દિવસીય ફોર્મેટમાં રમાશે. તેની શરૂઆત મંગળવારે શ્રીલંકા અને બાંગ્લાદેશ વચ્ચે બે ટેસ્ટ શ્રેણીથી થઈ હતી. આ ચક્રમાં કુલ 27 ટેસ્ટ શ્રેણી રમાશે, જેમાંથી 17 બે ટેસ્ટ અને 6 ત્રણ મેચની હશે. ભારત, ઓસ્ટ્રેલિયા અને ઇંગ્લેન્ડ એકબીજા સામે પાંચ મેચની શ્રેણી રમશે.