કોંગ્રેસના સાંસદ રાહુલ ગાંધીએ પુણે કોર્ટમાં અરજી દાખલ કરીને દાવો કર્યો છે કે, તેમના જીવને ગંભીર જોખમ છે. આ અરજી સાવરકર પરની તેમની ટિપ્પણી સંબંધિત માનહાનિના કેસમાં દાખલ કરવામાં આવી છે. મહાત્મા ગાંધીની હત્યાનો ઉલ્લેખ કરતા તેમણે કહ્યું કે ઇતિહાસને ફરીથી પુનરાવર્તિત ન થવા દેવો જોઈએ.
રાહુલ ગાંધીએ પોતાની અરજીમાં દાવો કર્યો હતો કે, તેમણે તાજેતરમાં જે રાજકીય મુદ્દાઓ ઉઠાવ્યા છે અને અગાઉ તેમણે સાવરકર પર જે ટિપ્પણીઓ કરી હતી તેનાથી તેમની સુરક્ષા માટે ખતરો વધ્યો છે. આ કેસમાં ફરિયાદી નાથુરામ ગોડસેનો સીધો વંશજ છે. ફરિયાદીના પરિવારનો હિંસા અને ગેરબંધારણીય પ્રવૃત્તિઓનો દસ્તાવેજીકૃત ઇતિહાસ છે.
રાહુલ ગાંધીએ કહ્યું કે, તે સ્પષ્ટ, તાર્કિક અને નક્કર આશંકા છે કે, મને નુકસાન પહોંચાડવામાં આવી શકે છે, ખોટા કેસોમાં ફસાવી શકાય છે અથવા અન્ય રીતે નિશાન બનાવવામાં આવી શકે છે. ફરિયાદીના પરિવારનો હિંસાથી જોડાયેલો ઇતિહાસ છે. ઇતિહાસને ફરીથી ન થવા દેવો જોઈએ. અહીં તેમણે મહાત્મા ગાંધીની હત્યાના સંદર્ભમાં આ નિવેદન આપ્યું હતું.
રાહુલ ગાંધીએ એમ પણ કહ્યું કે, ‘મત ચોરી’ના આરોપોએ તેમના રાજકીય વિરોધીઓને ગુસ્સે કર્યા છે. તેમણે દાવો કર્યો હતો કે, તેમને BJP તરફથી બે જાહેર ધમકીઓ મળી છે. આમાં કેન્દ્રીય મંત્રી રવિનીત સિંહ બિટ્ટુએ તેમને ‘દેશનો નંબર વન આતંકવાદી’ કહ્યા હતા. જ્યારે, BJPના નેતા તરવિંદર સિંહ મારવાહે પણ ધમકી આપી હતી.
રાહુલ ગાંધીએ કોર્ટને વિનંતી કરી હતી કે, તેઓ તેમની સુરક્ષા માટે આ ધમકીઓને ગંભીરતાથી લે, કારણ કે તેમના જીવ માટેનો ખતરો વાસ્તવિક અને ગંભીર છે.
જ્યારે, સાવરકરના પૌત્ર સત્યકી સાવરકરે કહ્યું કે, આ અરજી ઘણા સમય પહેલા દાખલ કરવામાં આવી હતી, પરંતુ તેમના (રાહુલ) દ્વારા આ મામલામાં જાણી જોઈને વિલંબ કરવામાં આવી રહ્યો છે. રાહુલ ગાંધીનું આ પગલું સંપૂર્ણપણે અપ્રસ્તુત છે. કોર્ટે પહેલાથી જ સ્પષ્ટ કરી દીધું છે કે, કેસની સુનાવણી માટે રાહુલ ગાંધીની વ્યક્તિગત હાજરી જરૂરી નથી, તેમ છતાં તેઓ કાર્યવાહીમાં વિલંબ કરી રહ્યા છે. તેમની અરજી કોઈપણ રીતે આ કેસ સાથે જોડાયેલી નથી અને તેનું કોઈ વાજબીપણું નથી.