ક્રિકેટમાં ઘણીવાર એકતરફી મેચ જોવા મળે છે, પરંતુ કેટલીક મેચમાં સંઘર્ષ એટલો બધો થઇ જાય છે કે તેના પર વિશ્વાસ કરવો મુશ્કેલ બની જાય છે. આવી જ એક મેચ ICC મેન્સ અંડર-19 ક્રિકેટ વર્લ્ડ કપ અમેરિકા ક્વોલિફાયર 2025માં કેનેડા અને આર્જેન્ટિના વચ્ચે રમાઈ હતી, જેમાં કેનેડિયન ટીમે માત્ર 5 બોલમાં લક્ષ્યનો પીછો કર્યો અને આર્જેન્ટિનાને 10 વિકેટથી હરાવ્યું હતું. આ મેચ અંડર-19 ક્રિકેટ વર્લ્ડ કપ અમેરિકા ક્વોલિફાયરની ચોથી મેચ હતી.
પરમવીર સ્પોર્ટ્સ કોમ્પ્લેક્સ ગ્રાઉન્ડ 2 ખાતે આર્જેન્ટિનાએ ટોસ જીતીને પ્રથમ બેટિંગ કરી, પરંતુ તેના બધા બેટ્સમેનો 19.4 ઓવરમાં 23 રન ઉમેરીને પેવેલિયન પરત ફર્યા. આર્જેન્ટિનાની ઇનિંગ્સ શરૂઆતના આંચકાઓમાંથી બહાર આવી શકી નહીં અને કોઈ બેટ્સમેન બે આંકડાના સ્કોરને પણ સ્પર્શી શક્યો નહીં. એટલું જ નહીં, 7 ખેલાડીઓ કોઈ રન બનાવ્યા વિના આઉટ થયા. 7 રન વધારાના મળ્યા. કેનેડાના ફાસ્ટ બોલર જગમનદીપ પોલે શાનદાર બોલિંગ કરી અને 5 ઓવરમાં માત્ર 7 રન આપીને 6 વિકેટ ઝડપી, જેમાં ત્રણ મેડન ઓવરનો પણ સમાવેશ થાય છે. નવા બોલ સાથેની તેમની આક્રમક બોલિંગથી આર્જેન્ટિનાને ઘૂંટણીએ પડી દીધી અને બાકીના બોલરોની મદદથી 20 ઓવરની અંદર જ તેમનો દાવ ખતમ કરી દીધો.
24 રનના લક્ષ્યનો પીછો કરતા, કેનેડાએ મેચ જીતવામાં કોઈ સમય બગાડ્યો નહીં. ઓપનર બેટ્સમેન અને કેપ્ટન યુવરાજ સમરાએ કોઈ પણ વિકેટ ગુમાવ્યા વિના ટીમને 10 વિકેટથી વિજય અપાવ્યો. ફક્ત 5 બોલમાં જ લક્ષ્યને ફતેહ કરી લીધું. ઇનિંગના પહેલા બોલ પર ધરમ પટેલે એક રન લીધો, ત્યારપછી ફ્રાન્ઝ બૂરની ચાર બોલ પર યુવરાજ સમરાએ બે ચોગ્ગા અને બે છગ્ગા ફટકાર્યા. બૂરે આ ઓવરમાં ત્રણ વાઈડ પણ આપ્યા, જેના કારણે કેનેડાએ 49.1 ઓવર અને 295 બોલ બાકી રહેતા આ લક્ષ્ય હાંસલ કરી લીધું. યુવરાજ 500ના સ્ટ્રાઈક રેટથી બેટિંગ કરતી વખતે ચાર બોલમાં 20 રન બનાવીને અણનમ રહ્યો.
આ જીત સાથે, એટલાન્ટામાં આયોજિત અમેરિકા ક્વોલિફાયરમાં કેનેડા મજબૂત સ્થિતિમાં છે. આ ટુર્નામેન્ટમાં આર્જેન્ટિના, બરમૂડા, કેનેડા અને યજમાન USAનો સમાવેશ થાય છે, જ્યાં દરેક ટીમ ડબલ રાઉન્ડ-રોબિન ફોર્મેટમાં એકબીજા સાથે બે વાર રમશે. ટોચની ટીમ 2026 ICC મેન્સ અંડર-19 ક્રિકેટ વર્લ્ડ કપમાં અમેરિકા ક્ષેત્ર માટે એકમાત્ર સ્થાન મેળવશે. ICC મેન્સ અંડર-19 ક્રિકેટ વર્લ્ડ કપ 2026 જાન્યુઆરી અને ફેબ્રુઆરી વચ્ચે નામિબિયા અને ઝિમ્બાબ્વેમાં રમાશે, જેમાં 16 ટીમો 5 સ્થળોએ રમશે. ટીમોને પ્રારંભિક તબક્કા માટે 4 ગ્રુપમાં વિભાજિત કરવામાં આવશે. ત્યારપછી સુપર સિક્સ, સેમિ-ફાઇનલ અને ફાઇનલ રમાશે.