ગુજરાતમાં ભારે તબાહી મચાવનાર ડીપ ડિપ્રેશન હવે નબળું બનીને ડિપ્રેશનમાં ફેરવાયું છે. હાલ તે દક્ષિણ-પૂર્વ પાકિસ્તાનમાં સક્રિય છે. 6 સપ્ટેમ્બરથી અત્યાર સુધી આ સિસ્ટમ ત્રીજી વખત દિશા બદલી ચૂકી છે. સવારે 8:30 વાગ્યે તે ભૂજથી 270 કિમી દૂર હતું, પરંતુ માત્ર ત્રણ કલાક પછી 11:30 વાગ્યે તેનું અંતર ઘટીને 260 કિમી થઈ ગયું. કારણ કે 9 સપ્ટેમ્બરની વહેલી સવારે આ સિસ્ટમે ફરીથી દિશા બદલી દીધી હતી. પહેલેથી તે પશ્ચિમ-દક્ષિણ પશ્ચિમ તરફ આગળ વધી રહ્યું હતું, પરંતુ અચાનક દક્ષિણ-પશ્ચિમ તરફ વળી ગયું. બિલકુલ તેવી જ રીતે જેમ 6 સપ્ટેમ્બરે રાત્રે દક્ષિણ રાજસ્થાનમાંથી વળી સીધું ગુજરાત તરફ આવ્યું હતું.
હવે ફરી તેની દિશામાં મોટો ફેરફાર થતા સવાલ ઊભો થાય છે કે શું આ સિસ્ટમ ફરી ગુજરાત તરફ આવશે? હવામાન વિભાગ અને નિષ્ણાતોના અભિપ્રાય મુજબ હાલ એવી સંભાવના નથી. આ સિસ્ટમ દક્ષિણ-પશ્ચિમ તરફ જ ગતિ કરતી રહેશે અને ગુજરાત તરફ ફરી નહીં વળે.
સવારે 11:30 વાગ્યે જાહેર કરાયેલા બુલેટિનમાં હવામાન વિભાગે જણાવ્યું હતું કે ડિપ્રેશન હાલ દક્ષિણ-પૂર્વ પાકિસ્તાનમાં કેન્દ્રિત છે અને છેલ્લાં છ કલાકમાં તે 15 કિમી પ્રતિ કલાકની ઝડપે આગળ વધ્યું છે. હાલમાં તે પાકિસ્તાનના હૈદરાબાદથી 40 કિમી દક્ષિણ-પશ્ચિમમાં અને ભૂજથી ઉત્તર-ઉત્તર પશ્ચિમમાં 260 કિમી દૂર છે. આવતા 12 કલાકમાં તે નબળું પડી વેલમાર્ક લો પ્રેશરમાં પરિવર્તિત થશે અને ત્યારબાદ 24 કલાકમાં ઉત્તર-પૂર્વ અરબી સમુદ્રમાં ભળી જશે.
વિવિધ મોડલ મુજબ, ઉત્તર-પૂર્વ અરબી સમુદ્ર અને ગુજરાત નજીકના વિસ્તારમાં પશ્ચિમી પવનો તથા પાકિસ્તાન-પશ્ચિમ રાજસ્થાનમાં પૂર્વીય પવનો જોવા મળી રહ્યા છે. ઉપરાંત, અરબી સમુદ્રમાં રહેલા MJO અને ઉષ્ણકટિબંધીય તરંગો આ સિસ્ટમને હજી ટકાવી રાખવામાં સહાયક બન્યાં છે.