બિહારના ગોપાલગંજ જિલ્લામાંથી એક અનોખો અને ચર્ચાસ્પદ કેસ સામે આવ્યો છે, જેમાં દારૂની હેરાફેરીમાં પકડાયેલા એક કિશોરને કોર્ટએ જેલની જગ્યાએ સમાજ સુધાર સાથે જોડાયેલી અનોખી સજા સંભળાવી છે. કિશોર ન્યાય પરિષદ, ગોપાલગંજના મુખ્ય દંડાધિકારી નિલેશ ભારદ્વાજે બાળકને 30 દિવસ સુધી ટ્રાફિક પોલીસની દેખરેખ હેઠળ સામુદાયિક સેવા કરવાનો ઐતિહાસિક આદેશ આપ્યો છે.
કિશોરનો ગુનો અને કોર્ટમાં કબૂલાત
એક સગીર બાળકને જાન્યુઆરી 2025માં જાદોપુર પોલીસે 81 લિટર દેશી દારૂ સાથે પકડી પાડ્યો હતો. આ કેસ કિશોર ન્યાય પરિષદની કોર્ટમાં પહોંચ્યો ત્યારે સુનાવણી દરમિયાન કિશોરે પોતાનો ગુનો સ્વીકારી લીધો હતો. તેણે કોર્ટ સમક્ષ જણાવ્યું કે તે સમાજની મુખ્યધારામાં પરત ફરવા માગે છે અને આગળથી આવી ભૂલ નહીં કરે.
કોર્ટનો સુધારાત્મક નિર્ણય
કિશોરની વાતથી કોર્ટ પ્રભાવિત થઈ અને સજા કરતાં સુધારાત્મક માર્ગ અપનાવ્યો. મુખ્ય દંડાધિકારી નિલેશ ભારદ્વાજે જણાવ્યું કે કિશોર ન્યાય અધિનિયમનો હેતુ માત્ર દંડ આપવાનો નથી, પરંતુ સગીરોને ગુનાની દુનિયામાંથી બહાર લાવી સમાજમાં ફરી જોડવાનો છે. આ જ વિચાર સાથે તેમણે કિશોરને જેલ મોકલવાની જગ્યાએ સમાજ માટે કામ કરવાની તક આપવાનું નક્કી કર્યું.
જિલ્લા પોલીસ અધિક્ષકને આદેશ આપવામાં આવ્યો છે કે કિશોરને 30 દિવસ સુધી દરરોજ ટ્રાફિક પોલીસની દેખરેખ હેઠળ રાખવામાં આવે, જેથી તે સમાજ માટે સેવા આપવાનું શીખે અને અનુશાસન તથા જવાબદારીનું મહત્વ સમજી શકે.