મહારાષ્ટ્રની રાજધાની મુંબઈમાં ઓનલાઈન છેતરપિંડીનો એક ગંભીર મામલો સામે આવ્યો છે. જસ્ટિસ ચંદ્રચૂડ હોવાનો દાવો કરનાર એક વ્યક્તિએ વર્ચ્યૂઅલ સુનાવણીની આડમાં એક મહિલાને કરોડો રૂપિયાનો ચૂનો લગાવ્યો હતો. મહિલાને કથિત રીતે મની લોન્ડરિંગ કેસમાં ફસાવવાની ચીમકી આપવામાં આવી હતી અને જામીન આપવાના વચન આપીને લાલચ આપવામાં આવી હતી. જ્યારે તેણે પોતાને નિર્દોષ ગણાવી ત્યારે તેને પોતાની સંપત્તિ અને રોકાણો સંબંધિત તમામ દસ્તાવેજો સબમિટ કરવાનું કહેવામાં આવ્યું હતું.
તપાસમાં જાણવા મળ્યું કે ઓગસ્ટ અને ઓક્ટોબર વચ્ચે, મહિલાએ કુલ 3.75 કરોડ વિવિધ ખાતાઓમાં ટ્રાન્સફર કર્યા હતા. છેતરપિંડી કરનારાઓએ દાવો કર્યો હતો કે ઓડિટ બાદ પૈસા પરત કરવામાં આવશે, પરંતુ જ્યારે તેને પૈસા ન મળ્યા, ત્યારે તેને પોલીસનો સંપર્ક કર્યો. તપાસ મુંબઈ પોલીસના જોઈન્ટ CP લક્ષ્મી ગૌતમ અને સાયબર પોલીસ DCP પુરુષોત્તમ કરાડ દ્વારા કરવામાં આવી હતી, ત્યારબાદ 46 વર્ષીય જીતેન્દ્ર બિયાનીની સુરતથી ધરપકડ કરવામાં આવી હતી.
પોલીસના જણાવ્યા મુજબ, આરોપીએ છેતરપિંડીમાંથી મળેલી રકમનો ઉપયોગ અન્ય ડિજિટલ અરેસ્ટ કેસોમાં પણ કર્યો હતો. બીજા એક કેસમાં, પોલીસે જણાવ્યું હતું કે 86 વર્ષીય એક મહિલાને 7 દિવસ સુધી ડિજિટલ અરેસ્ટ કરીને તેની પાસેથી 1.1 કરોડ રૂપિયા વસૂલવામાં આવ્યા હતા. છેતરપિંડી કરનારાઓએ પોલીસ અને એન્ફોર્સમેન્ટ ડિરેક્ટોરેટ (ED)ના અધિકારીઓ હોવાનો દાવો કરીને નકલી દસ્તાવેજો અને નકલી અરેસ્ટ વોરંટ પણ મોકલ્યા હતા.
પોલીસનું કહેવું છે કે સાયબર ગુનેગારો લોકોને ડરાવવા માટે ‘ડિજિટલ અરેસ્ટ’ જેવા શબ્દોનો ઉપયોગ કરી રહ્યા છે, જોકે ભારતીય કાયદામાં આવી કોઈ પ્રક્રિયાની જોગવાઈ નથી. પોલીસે લોકોને અપીલ કરી છે કે તેઓ કોઈપણ અજાણ્યા કોલ, વીડિયો કોલ અથવા સંદેશાઓ પર વિશ્વાસ ન કરે અને ચકાસણી વિના કોઈપણ વ્યક્તિગત અથવા બેંકિંગ માહિતી શેર ન કરે.
સાયબર છેતરપિંડીનો સામનો કરવા માટે કેન્દ્ર સરકારે ‘I4C ડેટાબેઝ’ અને ‘સસ્પેક્ટ સર્ચ’ જેવી સુવિધાઓ શરૂ કરી છે, જેનાથી શંકાસ્પદ નંબરો, ઇમેલ ID અને UPI ઓળખને ચકાસી શકાય છે. કોઈપણ સાયબર છેતરપિંડીના કિસ્સામાં, તાત્કાલિક સાયબર ક્રાઈમ પોર્ટલ પર ફરિયાદ નોંધાવો અથવા 1930 હેલ્પલાઇનનો સંપર્ક કરો.
