વડોદરા મહાનગરપાલિકાની બજેટલક્ષી સામાન્ય સભા આજે રાજકીય ગરમાવા અને આશ્ચર્યજનક ઘટનાક્રમની સાક્ષી બની હતી. સભામાં સમય ફાળવણી મુદ્દે થયેલા વિવાદને પગલે મેયરે આકરું વલણ અપનાવી વિપક્ષના તમામ સભ્યોને સસ્પેન્ડ કર્યા હતા, તો બીજી તરફ ભાજપના પીઢ કાઉન્સિલરે સભામાં જ ચૂંટણી સંન્યાસની જાહેરાત કરીને સૌને ચોંકાવી દીધા હતા.
વિપક્ષના તમામ સભ્યો સસ્પેન્ડ
બજેટ પરની ચર્ચા દરમિયાન સમયની ફાળવણી મુદ્દે વિપક્ષી સભ્યોએ ભારે વિરોધ નોંધાવ્યો હતો. વિપક્ષનો આરોપ હતો કે તેમને પૂરતો સમય આપવામાં આવતો નથી. આ મામલે હોબાળો ઉગ્ર બનતા મેયર પિંકીબેન સોનીએ શિસ્તભંગના પગલાં રૂપે વિપક્ષના તમામ 7 સભ્યોને સભામાંથી સસ્પેન્ડ કરવાનો આદેશ આપ્યો હતો.
પરાક્રમસિંહ જાડેજાની આશ્ચર્યજનક જાહેરાત
સભામાં સૌથી વધુ ધ્યાન વોર્ડ નંબર 3ના ભાજપના કાઉન્સિલર પરાક્રમસિંહ જાડેજાએ ખેંચ્યું હતું. છેલ્લા 10 વર્ષથી કાઉન્સિલર તરીકે સેવા આપતા પરાક્રમસિંહે ચાલુ સભામાં જાહેરાત કરી હતી કે, “હવે પછી હું કોઈ પણ ચૂંટણી નહીં લડું.”
તેમણે પોતાની આ જાહેરાત પાછળનું કારણ જણાવતા કહ્યું કે- હવે નવા કાર્યકરોને તક મળવી જોઈએ. પોતે ચૂંટણી નહીં લડે પણ આજીવન ભાજપના વફાદાર કાર્યકર તરીકે સેવા આપતા રહેશે. આગામી ચૂંટણીમાં તેમના વોર્ડમાં જે નવા ઉમેદવાર આવશે તેમને જીતાડવાની સંપૂર્ણ જવાબદારી તેઓ નિભાવશે.
પક્ષ-વિપક્ષે પાઠવી શુભેચ્છાઓ
પરાક્રમસિંહની આ જાહેરાત બાદ સભામાં ભાવુક દ્રશ્યો સર્જાયા હતા.
- મેયર પિંકી સોની: તેમણે જણાવ્યું કે પરાક્રમસિંહ હંમેશા મહિલા કાઉન્સિલરોને ‘બેનબા’ કહીને સંબોધતા અને પિતાતુલ્ય સ્નેહ આપતા. નવા કાર્યકરો માટે સ્થાન ખાલી કરી તેમણે ઉત્તમ ઉદાહરણ પૂરું પાડ્યું છે.
- વિપક્ષી સભ્ય પુષ્પા વાઘેલા: તેમણે લાગણી વ્યક્ત કરી હતી કે પરાક્રમસિંહ હંમેશા નવા સભાગૃહની ઈચ્છા રાખતા હતા, તેથી જ્યારે નવું સભાગૃહ બને ત્યારે તેની સાથે તેમનું નામ જોડાવું જોઈએ.
- સ્થાયી સમિતિ અધ્યક્ષ: ડો. શીતલ મિસ્ત્રીએ પણ પરાક્રમસિંહના આ નિર્ણયને આવકારી તેમને ઉજ્જવળ ભવિષ્યની શુભકામનાઓ પાઠવી હતી.
