મુંબઈના એક યુવકે નેશનલ હાઈવે ઓથોરિટી ઓફ ઈન્ડિયાની FASTag સિસ્ટમની સુરક્ષા અંગે ગંભીર પ્રશ્નો ઉભા કર્યા છે. યુવકનો દાવો છે કે, કોઇ બીજા ડ્રાઈવરે તેના વાહનની વિગતોનો ઉપયોગ કરીને બીજું FASTag એક્ટિવ કરી લીધું, જેના કારણે તેનું અસલી FASTag અચાનક બંધ થઇ ગયું. આ ઘટનાના ખુલાસા બાદ FASTag સિસ્ટમની સુરક્ષા અને તેની ડિજિટલ ચકાસણી પ્રક્રિયા અંગે સોશિયલ મીડિયા પર ભારે બહેસ શરૂ થઈ છે.
મુંબઈના રહેવાસી રુશિલે સોશિયલ મીડિયા પ્લેટફોર્મ X પર આ ઘટનાની વિગતો શેર કરી. તેણે કહ્યું કે હાઇવે પર મુસાફરી કરી રહ્યો હતો અને ટોલ પ્લાઝા પર ચૂકવણી કરવાનો પ્રયાસ કરતી વખતે તેને મુશ્કેલીઓનો સામનો કરવો પડ્યો. તેના FASTag એકાઉન્ટમાં પૂરતું બેલેન્સ હોવા છતા ટોલ ચૂકવણીની પ્રક્રિયા થઈ શકી નહીં. ત્યારબાદ, તેણે કસ્ટમર કેરનો સંપર્ક કર્યો, જ્યાં તેને જાણ કરવામાં આવી કે તેના વાહનનો નંબર કોઇ બીજા વ્યક્તિએ FASTag એક્ટિવ કર્યું છે. એટલે, બીજું FASTag એક્ટિવ થયા પછી મૂળ FASTag એકાર્ય કરવાનું બંધ કરી દીધું.
આ ઘટનાએ ઘણા લોકોને આશ્ચર્યચકિત કરી દીધા છે. સોશિયલ મીડિયા યુઝર્સ એક જ વાહન નોંધણી નંબરના આધારે બે અલ- અલગ FASTags કેવી રીતે મંજૂર કરી શકાય તે અંગે પ્રશ્નો ઉઠાવી રહ્યા છે. લોકોનું કહેવું છે કે જો આવું શક્ય હોય, તો સિસ્ટમનો દુરુપયોગ થવાની સંભાવના છે.
FASTag કેવી રીતે કાર્ય કરે છે?
FASTag દેશભરમાં હાઇવે ટોલ ચૂકવવા માટે થાય ઉપયોગ થતી એ એક ઇલેક્ટ્રોનિક સિસ્ટમ છે. તેમાં રેડિયો ફ્રીક્વન્સી આઇડેન્ટિફિકેશન (RFID) ટેકનોલોજીનો ઉપયોગ કરવામાં આવે છે, જેનાથી વાહનો રોકાયા વિના ટોલ ચૂકવી શકે છે. રાષ્ટ્રીય ધોરીમાર્ગો પર ચાલતા મોટાભાગના વાહનો માટે FASTag હવે ફરજિયાત બનાવવામાં આવ્યું છે. મુંબઈના યુવકનો આરોપ છે કે કોઇ ટ્રાન્સપોર્ટરના ડ્રાઇવરે તેના વાહનના નોંધણી નંબરનો ઉપયોગ કરીને બીજું FASTag બનાવડાવી લીધું. તેનું માનવું છે કે સિસ્ટમમાં આવી ખામીઓ વાહન માલિકો માટે મોટી પરેશાની બની શકે છે, જેનાથી ખોટો ટોલ કપાવા, છેતરપિંડી અને અન્ય અણધારી પરેશાનીઓનું જોખમ વધી શકે છે.
તાજેતરના સમયમાં FASTag સંબંધિત ફરિયાદો સામે આવી છે, જેના કારણે અધિકારીઓએ ચકાસણી પ્રોટોકોલને વધુ કડક બનાવ્યા છે. નવા માળખા હેઠળ, કોઈપણ FASTag એક્ટિવ કરતા પહેલા વાહનની વિગતોની વધુ સાવધાનીથી તપાસ કરવામાં આવી રહી છે. તેનો ઉદ્દેશ્ય ખોટી માહિતી અને દુરુપયોગના કિસ્સાઓને ઘટાડવાનો છે. આ ઘટનાએ ફરી એકવાર દેશના ડિજિટલ પરિવહન માળખા અને ડેટા સુરક્ષા અંગે ચિંતા વધારી છે. ઘણા વાહન માલિકો હવે મજબૂત સુરક્ષા વ્યવસ્થા અને ભવિષ્યમાં આવી ઘટનાઓને રોકવા માટે ફરિયાદોના ઝડપી નિરાકરણની માંગ કરી રહ્યા છે.
પોસ્ટ વાયરલ થયા બાદ ICICI બેંક અને એરટેલ પેમેન્ટ્સ બેંક બંનેએ સોશિયલ મીડિયા પ્લેટફોર્મ X પર જાહેરમાં પ્રતિક્રિયા આપી, અને કહ્યું કે આ મામલો હાલમાં તપાસ હેઠળ છે. ફરિયાદનો જવાબ આપતા ICICI બેંકે જણાવ્યું, અમને આ બાબતની જાણ થતા ચિંતા થઇ છે. અમારી ટીમ ટૂંક સમયમાં તમારો સંપર્ક કરશે અને સમસ્યાના ઉકેલમાં મદદ કરશે. તેવી જ રીતે, ઘટના પર પ્રતિક્રિયા આપતા એરટેલ પેમેન્ટ્સ બેન્કે પણ પ્રતિક્રિયા આપતા કહ્યું કે, ફરિયાદની પ્રાથમિકતાના ધોરણે તપાસ કરવામાં આવશે.