દેશની સૌથી મોટી સરકારી ઓઇલ કંપની ઇન્ડિયન ઓઇલ કોર્પોરેશન (IOC) દ્વારા શનિવારે એક મહત્ત્વનું નિવેદન જાહેર કરવામાં આવ્યું છે. કંપનીએ સ્પષ્ટ કર્યું છે કે દેશભરમાં પેટ્રોલ કે ડીઝલની કોઈ એકંદર (overall) અછત નથી. કેટલાક રિટેલ આઉટલેટ્સ (પેટ્રોલ પંપ) પર જોવા મળી રહેલી ઇંધણની તંગી ‘તદ્દન સ્થાનિક’ અને અસ્થાયી છે, જે પ્રાદેશિક સ્તરે માંગ-પુરવઠામાં અસંતુલન અને વેચાણની બદલાયેલી પદ્ધતિઓના કારણે ઊભી થઈ છે.
ઇંધણની માંગમાં કેમ અચાનક ઉછાળો આવ્યો?
ઇન્ડિયન ઓઇલે જણાવ્યું હતું કે હાલમાં પાકની લણણી (harvesting season) ચાલી રહી હોવાથી ગ્રામીણ અને કૃષિ ક્ષેત્રોમાં ડીઝલની માંગમાં મોસમી વધારો થયો છે. ખાનગી કંપનીઓના પેટ્રોલ પંપ પર સરકારી પંપની સરખામણીએ રિટેલ ભાવ વધુ હોવાના કારણે, ગ્રાહકો હવે મોટી સંખ્યામાં સરકારી પેટ્રોલ પંપ તરફ વળ્યા છે. આંતરરાષ્ટ્રીય બજારમાં તેલના ઊંચા ભાવોને કારણે બલ્ક (જથ્થાબંધ) અને ઇન્સ્ટિટ્યુશનલ સપ્લાયના ભાવ ઘણા વધી ગયા છે. પરિણામે, વ્યાપારી અને સંસ્થાકીય ખરીદદારો પણ હવે સામાન્ય સરકારી રિટેલ આઉટલેટ્સ પરથી ઇંધણ ખરીદી રહ્યા છે.
કંપનીએ આંકડા જાહેર કરતા જણાવ્યું કે, 1 થી 22 મે દરમિયાન દેશમાં પેટ્રોલના વેચાણમાં વાર્ષિક ધોરણે 14 ટકાનો અને ડીઝલના વેચાણમાં આશરે 18 ટકાનો મોટો ઉછાળો નોંધાયો છે. માંગમાં આટલો ‘અસાધારણ અને સતત’ વધારો હોવા છતાં કંપની સમગ્ર દેશમાં પુરવઠો પૂરો પાડી રહી છે.
IOC એ જણાવ્યું કે તેના 42,000 થી વધુ પેટ્રોલ પંપના વિશાળ નેટવર્કમાંથી માત્ર ‘ખૂબ જ નાની સંખ્યામાં’ આઉટલેટ્સ પર પુરવઠાને અસર થઈ છે. મોટાભાગના પંપો પર સ્ટોક અને સપ્લાય સંપૂર્ણપણે સામાન્ય અને પૂરતા પ્રમાણમાં ઉપલબ્ધ છે.
ઇન્ડિયન ઓઇલે ગ્રાહકો અને સામાન્ય જનતાને ખાતરી આપતા જણાવ્યું છે કે, અન્ય સરકારી ઓઇલ માર્કેટિંગ કંપનીઓ (OMCs) સાથે મળીને દેશભરમાં પેટ્રોલ અને ડીઝલનો પૂરતો સ્ટોક જાળવી રાખવામાં આવ્યો છે.
કંપની સ્થિતિ પર બારીકાઈથી નજર રાખી રહી છે અને જ્યાં પણ સ્થાનિક સ્તરે અછત જેવી સ્થિતિ છે, તેને દૂર કરવા માટે યોગ્ય પગલાં લેવામાં આવી રહ્યા છે. ગ્રાહકોને અફવાઓથી દૂર રહેવા અને બિનજરૂરી ગભરાટમાં આવીને ઇંધણનો સંગ્રહ (Panic Buying) ન કરવા નમ્ર અપીલ કરવામાં આવી છે.