બજાજ ઓટોએ ભારતીય બજારમાં તેની નવી બાઇક લોન્ચ કરી દીધી છે. કંપનીએ અપડેટેડ એવેન્જર સ્ટ્રીટ 220 લોન્ચ કરી છે. જો તમે ભારતીય બજારમાં ઓછા બજેટમાં ક્રુઝર-બોડી સ્ટાઇલવાળી બાઇક શોધી રહ્યા છો, તો બજાજ એવેન્જર સૌથી સસ્તું વિકલ્પ છે.
કંપનીએ તાજેતરમાં સ્ટ્રીટ 160 બંધ કરી દીધી છે. બ્રાન્ડે તેની વેબસાઇટ પરથી આ બાઇક દૂર કરી દીધી છે. હવે, એવેન્જર સ્ટ્રીટ 220 બજાજની વેબસાઇટ પર મુકવામાં આવી છે. કંપનીએ આ બાઇકના લોન્ચિંગ અંગે કોઈ માહિતી આપી ન હતી. બાઇક એકદમ ચુપકેથી લોન્ચ કરવામાં આવી હતી.
બજાજ ઓટોની વેબસાઇટ પર તમને એવેન્જર સ્ટ્રીટ 220 લિસ્ટેડ જોવા મળશે. કંપનીએ આ બાઇક રૂ. 1,30,173ની પ્રારંભિક એક્સ-શોરૂમ કિંમતે લોન્ચ કરી છે. આ બાઇક બે રંગ વિકલ્પોમાં ઉપલબ્ધ છે, એબોની બ્લેક અને કોકટેલ રેડ વાઇન.
બાઇકની ડિઝાઇનમાં તમને કોઈ મોટા ફેરફારો દેખાશે નહીં. તેમાં એક આરામદાયક ડિઝાઇન આપવામાં આવી છે, જે સવારીને વધુ આરામદાયક બનાવે છે. હેન્ડલબાર થોડા ઊંચા છે, અને ફૂટરેસ્ટ આગળ મૂકવામાં આવ્યા છે. આનાથી લાંબા અંતર સુધી બાઈક ચલાવવા પર થાક ઓછો લાગે છે. કંપનીના જણાવ્યા મુજબ, આ બાઇક શહેરોમાં સવારી કરવા માટે પણ સરળ અને આરામદાયક રહેશે.
બજાજ એવેન્જર સ્ટ્રીટ 220માં 220cc, એર-કૂલ્ડ, સિંગલ-સિલિન્ડર એન્જિન આપવામાં આવ્યું છે, જે પલ્સર 220Fમાં પણ જોવા મળે છે. આ એન્જિન 8500 rpm પર 19 hp પાવર અને 7000 rpm પર 17 Nm ટોર્ક ઉત્પન્ન કરે છે. બાઇક 5-સ્પીડ ગિયરબોક્સ સાથે આવે છે.
તેમાં ટેલિસ્કોપિક ફ્રન્ટ સસ્પેન્શન અને 5-સ્ટેપ પ્રીલોડ એડજસ્ટમેન્ટ સાથે ટ્વીન રીઅર શોક એબ્ઝોર્બર્સ છે. આગળના ભાગમાં 280 mm ડિસ્ક બ્રેક છે અને પાછળના ભાગમાં 130 mm ડ્રમ બ્રેક આપવામાં આવી છે. સલામતી માટે, બાઇકમાં સિંગલ-ચેનલ ABS છે. બાઈક એલોય વ્હીલ્સ સાથે આવે છે.
એવેન્જર સ્ટ્રીટ 220માં ટ્યુબલેસ ટાયર છે. મોટરસાઇકલ 13-લિટર ફ્યુઅલ ટાંકી સાથે આવે છે. આ બાઇકનું કુલ વજન 160 કિલોગ્રામ છે અને તેની સીટની ઊંચાઈ 737 mm છે.