પશ્ચિમ યુરોપના મોટા ભાગોમાં રેકોર્ડબ્રેક ગરમીએ તબાહી મચાવી છે. તીવ્ર ગરમીથી સૌથી વધુ અસરગ્રસ્ત દેશોમાં ફ્રાન્સનો સમાવેશ થાય છે. ફ્રેન્ચ આરોગ્ય અધિકારીઓએ રવિવારે અહેવાલ આપ્યો હતો કે, રેકોર્ડબ્રેક હીટવેવના કારણે અપેક્ષા કરતા લગભગ 1,000 વધુ મૃત્યુ થયા છે. જાહેર આરોગ્ય ફ્રાન્સે જણાવ્યું હતું કે ગરમીના રેડ એલર્ટ હેઠળના વિસ્તારો સૌથી વધુ પ્રભાવિત થયા છે.
ફ્રેન્ચ આરોગ્ય એજન્સીએ એક નિવેદનમાં જણાવ્યું હતું કે, ’24 જૂનથી, પાછલા મહિનાઓમાં નોંધાયેલા મૃત્યુની તુલનામાં લગભગ 1,000 વધારાના મૃત્યુ જોવા મળ્યા છે.’ એજન્સીએ કહ્યું હતું કે, આ અંતિમ આંકડા નથી અને આ સંખ્યા વધી પણ શકે છે. તેમણે જણાવ્યું હતું કે, મૃત્યુ થનારાઓમાં 85 ટકા મૃત્યુ 65 વર્ષ કે તેથી વધુ ઉંમરના લોકોના થયા હતા.
જાહેર આરોગ્ય ફ્રાન્સના જણાવ્યા અનુસાર, ઘરે મૃત્યુના કિસ્સાઓમાં સૌથી મોટો વધારો જોવા મળ્યો છે, જેમાં પેરિસ અને તેની આસપાસના વિસ્તારોનો સમાવેશ થાય છે. એજન્સીએ નોંધ્યું હતું કે આ આંકડા પ્રારંભિક છે અને વાસ્તવિક સંખ્યા ઘણી વધારે પણ હોઈ શકે છે.
યુરોપના ઘણા ભાગોમાં તીવ્ર ગરમીનો પ્રકોપ ચાલુ છે. આકરી ગરમીએ અગાઉના અનેક રેકોર્ડ તોડી નાખ્યા છે. શુક્રવારે જર્મનીમાં અત્યાર સુધીનું સૌથી વધુ તાપમાન 41.3 ડિગ્રી સેલ્સિયસ સુધી પહોંચી ગયું હતું.
ફ્રાન્સ આ ગરમીના મોજાથી સૌથી વધુ અસરગ્રસ્ત થનારા દેશોમાંનો એક છે, ઘણા વિસ્તારોમાં તાપમાન 40 ડિગ્રી સેલ્સિયસથી વધુ છે. ભારે ગરમીને કારણે અનેક લોકોના મોત પણ થયા છે, જેમાં ડૂબવાથી અને ગરમી સંબંધિત અન્ય સ્વાસ્થ્ય સમસ્યાઓનો સમાવેશ થાય છે. જોકે, ઘણા દિવસોની તીવ્ર ગરમી પછી, રવિવારે ફ્રાન્સમાં થોડી રાહત મળી હતી.
પોલિસે કટોકટી સેવાઓ પર દબાણ ઓછું કરવા માટે આયોજકોને કાર્યક્રમ મુલતવી રાખવા વિનંતી કર્યા પછી પેરિસમાં સપ્તાહના અંતે યોજાનારી પ્રાઇડ માર્ચ (LGBTQ પ્લસ) મુલતવી રાખવામાં આવી છે.