ઉત્તર પ્રદેશના કાનપુરની મહિલા ટેટૂ પડાવવાનું મોંઘુ પડી ગયું. ટેટૂ બનાવ્યાના થોડા સમય પછી, તેની તબિયત બગડવા લાગી. સારવાર દરમિયાન, તેનો HIV ટેસ્ટ પોઝિટિવ આવ્યો. ડોક્ટરોનું કહેવું છે કે ટેટૂ કરાવતી વખતે ચેપગ્રસ્ત અથવા અયોગ્ય રીતે સાફ કરેલી સોયનો ઉપયોગ કરવાથી ચેપનું જોખમ રહેલું છે.
મીડિયા સૂત્રોના અહેવાલ મુજબ, મહિલા GSVM મેડિકલ કોલેજમાં તેના ગુપ્તાંગમાં જનનાંગ ચેપની ફરિયાદ લઈને આવી હતી. ડોક્ટરોએ તેની સ્થિતિનું મૂલ્યાંકન કર્યું અને HIV અને હેપેટાઇટિસ B સહિત જરૂરી પરીક્ષણો કર્યા. રિપોર્ટમાં HIV ચેપની પુષ્ટિ થઈ. મહિલાએ ડોક્ટરોને જણાવ્યું કે તેણે તાજેતરમાં દિલ્હીના એક ટેટૂ પાર્લરમાં ટેટૂ કરાવ્યું હતું.
GSVM મેડિકલ કોલેજના ત્વચારોગ નિષ્ણાંત ડૉ. શ્વેતાંકે જણાવ્યું હતું કે, મહિલા લગભગ એક અઠવાડિયા પહેલા સારવાર માટે આવી હતી. પ્રારંભિક તપાસ પછી, ડોક્ટરોએ ચેપ ગંભીર હોવાનું નક્કી કર્યું, તેથી વધારાના પરીક્ષણો કરવામાં આવ્યા. તેઓ કહે છે કે જો ટેટૂ કરાવતી વખતે નવી અને સંપૂર્ણપણે સાફ સોયનો ઉપયોગ ન કરવામાં આવે, તો HIV જેવા ગંભીર રોગો ફેલાવાનું જોખમ રહેલું છે.
મહિલાની સારવાર સરકારી હોસ્પિટલના એન્ટિરેટ્રોવાયરલ થેરાપી (ART) સેન્ટરમાં શરૂ કરવામાં આવી છે. આ સારવાર દર્દીને નિયમિત દવા પૂરી પાડે છે, જેનાથી તેઓ લાંબા સમય સુધી સામાન્ય જીવન જીવી શકે છે. HIV સંપૂર્ણપણે મટાડી શકાતો નથી, તેથી સમયસર સારવાર અને દવા કરાવવી ખૂબ જ જરૂરી હોય છે.
ડોક્ટરોએ એમ પણ જણાવ્યું હતું કે, ટેટૂ માત્ર ચેપ જ નહીં, પરંતુ ત્વચાની અન્ય સમસ્યાઓ પણ પેદા કરી શકે છે. કેટલાક લોકોને ટેટૂમાં વપરાતી રંગીન શાહીથી એલર્જી હોય છે. આનાથી ત્વચા પર લાલ ફોલ્લીઓ, ખંજવાળ, સોજો અને દુખાવો જેવી સમસ્યાઓ થઈ શકે છે.
ટેટૂ કરાવતા પહેલા આ બાબતો ધ્યાનમાં રાખો: હંમેશા પ્રતિષ્ઠિત અને સ્વચ્છ ટેટૂ સ્ટુડિયોમાં જ ટેટૂ કરાવો. તમારી સામે નવી, સીલબંધ સોય ખોલવાનું કહો. ખાતરી કરો કે બધા સાધનો સંપૂર્ણપણે સાફ છે. ફક્ત ઉચ્ચ ગુણવત્તાવાળી શાહી માટે આગ્રહ રાખો. જો તમને ટેટૂ કરાવ્યા પછી સોજો, દુખાવો અથવા અન્ય કોઈ પરેશાની થાય છે તો છે, તો તાત્કાલિક ડૉક્ટરની સલાહ લો.
ડો. શ્વેતાંક કહે છે કે, ફેશન માટે ટેટૂ કરાવતા પહેલા સલામતીના નિયમોનું પાલન કરવું ખૂબ જ જરૂરી છે. તમારી થોડી બેદરકારી પણ તમને ગંભીર સ્વાસ્થ્ય સમસ્યાઓ તરફ લઇ જઈ શકે છે.