ગોવામાં સ્પેશિયલ ઇન્ટેન્સિવ રિવિઝન (SIR) દરમિયાન, એવા 97 મતદારોના નામ, જેમને ચૂંટણી અધિકારીઓ દ્વારા તપાસ પછી લાયક ગણવામાં આવ્યા હતા, તેઓ અંતિમ મતદાર યાદીમાં સામેલ થઈ શક્યા ન હતા. આ મતદારોને અગાઉ ‘તાર્કિક વિસંગતતા’ના આધારે યાદીમાંથી દૂર કરવાની પ્રક્રિયામાં મૂકવામાં આવ્યા હતા. આ પછી તેમણે દસ્તાવેજો અને વાંધા રજૂ કર્યા. ERO અને AEROએ આ કેસોની તપાસ કરી અને 97 કેસોમાં જૂના નિર્ણયને ઉલટાવીને મતદારોને અંતિમ યાદીમાં સામેલ કરવાની જરૂરિયાત ધ્યાનમાં લીધી.
આ મામલો ત્યારે અટકી ગયો, જ્યારે જૂનો નિર્ણય ECINetમાં પહેલાથી જ દાખલ થઈ ગયો હતો. રિપોર્ટ અનુસાર, ERO અને AERO પાસે તે નિર્ણય પાછો લેવાનો એટલે કે ‘રોલબેક’ કરવાનો વિકલ્પ નહોતો. ગોવા ઈલેક્ટ્રોનિક્સ લિમિટેડે એમ પણ જણાવ્યું હતું કે, દસ્તાવેજોને રોલબેક કરવાની અને ફરીથી અપલોડ કરવાની સુવિધા સિસ્ટમમાં ઉપલબ્ધ કરાવવામાં આવી નથી.
મીડિયા સૂત્રોના અહેવાલ મુજબ, ગોવાના મુખ્ય ચૂંટણી અધિકારીના કાર્યાલયે 13થી 18 ફેબ્રુઆરી વચ્ચે દિલ્હીમાં ચૂંટણી પંચને સતત E-Mail મોકલ્યા હતા. 13 ફેબ્રુઆરીએ 97 કેસમાં રોલબેકની જરૂરિયાત જણાવવામાં આવી હતી. 14 ફેબ્રુઆરીના રોજ, રોલબેક અને દસ્તાવેજોને ફરીથી અપલોડ કરવાની સુવિધાની માગણી કરતા 2 E-Mail મોકલવામાં આવ્યા હતા. તે જ દિવસે મુખ્ય ચૂંટણી અધિકારી સંજય ગોયલે પણ લખ્યું હતું કે, અગાઉ મોકલવામાં આવેલા E-Mailનો કોઈ જવાબ મળ્યો નથી.
15 ફેબ્રુઆરીના રોજ કહેવામાં આવ્યું હતું કે, સુપ્રીમ કોર્ટના નિર્દેશોનું સમયસર પાલન સુનિશ્ચિત કરવા માટે રોલબેક વિકલ્પ ખૂબ જ મહત્વપૂર્ણ છે. 16 ફેબ્રુઆરીએ પણ કોઈ જવાબ મળ્યો ન હોવાનું કહેવાયું હતું. 17 ફેબ્રુઆરીના રોજ 97 કેસોની યાદી મોકલવામાં આવી હતી અને તેમને અંતિમ SIR મતદાર યાદીમાં સામેલ કરવા કાર્યવાહીની માંગ કરવામાં આવી હતી.
18 ફેબ્રુઆરીના રોજ નાયબ ચૂંટણી કમિશનર સંજય કુમારે ચૂંટણી પંચના IT ચીફને પત્ર લખ્યો હતો કે, ERO અને AERO પાસે સુધારાત્મક પગલાં લેવાની સત્તા છે અને IT સિસ્ટમે આવી કાર્યવાહીમાં અવરોધ ન કરવો જોઈએ. આમ છતાં 21 ફેબ્રુઆરીએ અંતિમ યાદી જાહેર કરવામાં આવી હતી અને આ 97 નામ તેમાં દાખલ કરવામાં આવ્યા નહોતા.
જ્યારે ગોવાના મુખ્ય ચૂંટણી અધિકારી સંજય ગોયલને ગોવામાં અંતિમ મતદાર યાદીમાંથી 97 મતદારોના નામ બાકી હોવા અંગે પૂછવામાં આવ્યું ત્યારે તેમણે ટિપ્પણી કરવાનો ઇનકાર કર્યો હતો. તેમને પૂછવામાં આવ્યું કે શું આ નામોને મતદાર યાદીમાં ફરીથી સામેલ કરવા અને પોર્ટલ પર અપડેટ કરવા અંગે કેન્દ્ર તરફથી કોઈ પ્રતિસાદ મળ્યો છે, પરંતુ તેમણે આ અંગે પણ કંઈ કહ્યું ન હતું. સંજય ગોયલે કહ્યું કે આ ઘટના લગભગ 8 મહિના જૂની છે અને તેમને તેની જાણ નથી. જો કે, વારંવાર પ્રશ્નો પૂછવા પર તેણે પોતાના સુરક્ષા કર્મચારીઓને બોલાવીને ત્યાંથી જવાનું કહ્યું. તેમણે કહ્યું કે તેઓ પહેલા તેમનો રેકોર્ડ તપાસશે અને પછી આ મામલે જવાબ આપશે.
રિપોર્ટ અનુસાર આ 97 મતદારોમાંથી 65 તાલેગાંવના હતા. બાકીના મતદારો સેન્ટ ક્રુઝ, કુમ્બરજુઆ, પ્રિયોલ, મારગાઓ, બેનૌલીમ અને વેલીમ વિધાનસભા ક્ષેત્રના હતા. આ મામલો મતદાર યાદી તૈયાર કરવામાં સ્થાનિક સત્તાવાળાઓ અને કેન્દ્રીયકૃત સોફ્ટવેર વચ્ચેના અધિકારો અંગે પ્રશ્નો ઉભા કરે છે.
રિપોર્ટ અનુસાર મતદાર યાદીમાં નામ ન હોવાના કારણે કેટલીક સરકારી યોજનાઓ પર પણ અસર પડી શકે છે. ગોવાની મેડિક્લેમ યોજનામાં ડાયાલિસિસ, એન્જીયોપ્લાસ્ટી, ઓપન-હાર્ટ સર્જરી, ટ્રાન્સપ્લાન્ટ, કીમોથેરાપી અને કોક્લિયર ઈમ્પ્લાન્ટ જેવી સારવાર આવરી લેવામાં આવી છે અને રાજ્ય માટે આ યોજના માટે લાયક મતદાર હોવું ફરજિયાત છે. અંતિમ યાદીમાં તેમના નામ ન આવ્યા પછી, કેટલાક અસરગ્રસ્ત લોકોને નવા મતદારો તરીકે ફોર્મ 6 દ્વારા ફરીથી અરજી કરવાનું પણ કહેવામાં આવ્યું હતું.