સુરત જિલ્લા ગ્રાહક તકરાર નિવારણ કમિશન (મુખ્ય)એ મોટર વીમાના એક મહત્વના કેસમાં ફરિયાદની તરફેણમાં ચુકાદો આપી અકસ્માતવાળુ વાહન માલિક દ્વારા અગાઉ અન્ય વ્યક્તિને વેચી દેવામાં આવ્યું હોવાનું ખોટું અનુમાન કરીને વાહનને થયેલ અકસ્માત સંબંધિત કલેઈમ નકારવામાં વીમા કંપનીના પક્ષે સેવામાં ક્ષતિ થઈ હોવાનું ઠરાવી આર.સી. બુક તથા વીમા પોલિસીમાં ફરિયાદીનું જ નામ ચાલુ હોય ત્યારે ફરિયાદી જ વાહનનો માલિક ગણાય એવું ઠરાવી અકસ્માતથી નુકસાન પામેલ વાહનને રીપેર કરવાવા માટેના ખર્ચના કલેઈમનાં રૂ. 1,87,500/- વ્યાજ અને વળતર સહિત ફરિયાદીને ચૂકવી આપવાનો વીમા કંપનીને આદેશ આપતો હુકમ કર્યો છે.
સુરતના કામરેજ તાલુકાના પાસોદરા ખાતે રહેતા ફરિયાદીએ એડવોકેટ પ્રાચી અર્પિત દેસાઈ અને ઈશાન શ્રેયસ દેસાઈ મારફત ગ્રાહક ફરિયાદ દાખલ કરાવેલી ફરિયાદની વિગત એવી હતી કે ફરિયાદીની માલિકીની Swift Dzire VDI કાર તા. 17-10-2019થી 16-10-2020 સુધીની વીમા પોલિસી લેવામાં આવી હતી. કારની IDV રૂ. 3,16,724 નક્કી કરવામાં આવી હતી. તા. 19-05-2020ના રોજ ફરિયાદી કાર લઈને સુરતથી સુરેન્દ્રનગર જઈ રહ્યા હતા ત્યારે માલવડ ગામ નજીક કાર પલટી જતાં અકસ્માત થયો હતો. કારને રાજકોટ ખાતે કટારિયા વર્કશોપમાં લઈ જવાઈ હતી, જ્યાં રૂ. 3,13,370નું રિપેરિંગ એસ્ટિમેટ આપવામાં આવ્યો હતો બાદમાં કારના રિપેરિંગ પાછળ રૂ. 2,50,000નો ખર્ચ થયો હતો.
વીમા કંપનીએ કલેઇમ નકારતાં એવો બચાવ લીધો હતો કે ફરિયાદીએ અકસ્માતના લગભગ છ મહિના પહેલાં કાર રૂ. 3,60,000માં વેચી તેનો કબજો સોંપી દીધો હતો, જેથી અકસ્માતના સમયે ફરિયાદીને વાહનમાં insurable interest રહ્યો નહોતો. આ આધાર પર કંપનીએ ફરિયાદીનો કલેઈમ ચૂકવવાનો ઈન્કાર કરતાં મામલો ગ્રાહક કમિશનમાં પહોંચ્યો હતો.
ફરિયાદીઓ તરફ એડવોકેટ પ્રાચી અર્પિત દેસાઈ અને ઈશાન શ્રેયસ દેસાઈએ દલીલો કરતાં જણાવ્યું હતું કે અકસ્માત સમયે આર.સી. બુકમાં તથા વીમા પોલિસીમાં ફરિયાદીનું જ નામ હતું. તેથી કાર વેચી દેવાઈ હોવાનું વીમા કંપનીનું અનુમાન ખોટું હતું. આર.સી.બુક અને વીમા પોલિસીમાં નામ ધરાવનાર વ્યક્તિ જ વીમા ક્લેઈમ મેળવવા હક્કદાર છે.
સુરત ગ્રાહક કમિશને પોતાના જણાવ્યું કે હાલના કેસમાં ફરિયાદીનું નામજ RC Book અને વીમા પોલિસીમાં વાહનના માલિક તરીકે ચાલતું હતું કમિશને વધુમાં નોંધ્યું કે નોન-સ્ટાન્ડર્ડ ક્લેઈમ તરીકે રૂ. 2,50,000 ના નુકસાનના 75 ટકા પ્રમાણે રૂ. 1,87,500 મેળવવાનો ફરિયાદીને હક્ક હોવાનું કમિશને ઠરાવ્યું હતું.
અંતે સુરત જિલ્લા ગ્રાહક કમિશનના પ્રમુખ ન્યાયાધીશ પી.પી.મેખીયા અને સભ્ય તીર્થેશ મહેતાએ ફરિયાદ અંશતઃ મંજૂર કરી વીમા કંપની તથા સામાવાળાઓને રૂ. 1,87,500 ફરિયાદ દાખલ થયાની તારીખ 25-09-2020થી વાર્ષિક 8 ટકા વ્યાજ સાથે ચૂકવવાનો હુકમ કર્યો છે. આ ઉપરાંત માનસિક ત્રાસ, હેરાનગતિ અને અગવડ બદલ રૂ. 3,000 તથા ફરિયાદ ખર્ચ પેટે રૂ. 2,000 ચૂકવવાનો પણ આદેશ કર્યો છે. આ તમામ રકમ હુકમ મુજબ 30 દિવસમાં ચૂકવવાની રહેશે. ચુકાદો તા. 14-08-2026ના રોજ જાહેર કરવામાં આવ્યો હતો.
આ ચુકાદો એવા વાહનધારકો માટે મહત્વનો છે કે માત્ર વાહનનો કબજો અન્ય વ્યક્તિને સોંપાયો હોય પણ વાહન R.T.O. માં અને વીમા કંપનીના રેકોર્ડમાં માલિકનું નામ ટ્રાન્સફર ન થયું હોય તો તે કારણસર જ વીમા કંપની ક્લેઇમ નકારી શકે નહીં–આ કેસમાં નેશનલ કમિશનના ચુકાદાના આધારે સુરત ગ્રાહક કમિશને ફરિયાદીને રાહત આપી છે.