સુપ્રીમ કોર્ટે સત્તાવાળાઓને ટ્રાફિક ચલણની વસૂલાત કરવા અંગે જમીની સ્તરે નક્કર પગલાં લેવાની જરૂરિયાત જણાવી છે. સુનાવણી દરમિયાન જસ્ટિસ J.B. પારડીવાલાએ સૂચન કર્યું હતું કે, જો લોકો ટ્રાફિક ચલણ ચૂકવતા નથી, તો તેની વસૂલાત માટે અન્ય સરકારી લેણાં જેવા કે વીજળીના બિલ સાથે તેની રકમ ઉમેરવા જેવી પદ્ધતિઓ પર વિચાર કરી શકાય.
જસ્ટિસ J.B. પારડીવાલાએ કહ્યું કે માત્ર E-ચલણ મોકલી આપવું એ પૂરતું નથી. પોલીસ હજારો અને લાખો E-ચલણ ઈશ્યુ કરી શકે છે. પરંતુ ખરો પ્રશ્ન આ ચલણો પર લાદવામાં આવેલા દંડની વસૂલાત કરવાનો છે. કોર્ટને જણાવવામાં આવ્યું હતું કે, રાજ્યો અને કેન્દ્રશાસિત પ્રદેશોએ E-ચલણ દ્વારા લગભગ 45,000 કરોડ રૂપિયા વસૂલવાના બાકી છે. તેમાંથી અત્યાર સુધીમાં લગભગ 25,000 કરોડ રૂપિયાની જ વસૂલાત કરવામાં આવી છે.
જસ્ટિસ J.B. પારડીવાલાએ કહ્યું કે, અધિકારીઓએ હકીકતની સ્થિતિને ધ્યાનમાં રાખીને કામ કરવું પડશે. તેમણે કહ્યું કે જે વાહનોના ચલણ પેન્ડિંગ છે તેમના રજિસ્ટ્રેશન સર્ટિફિકેટ રિન્યૂ કરવા અને ડુપ્લિકેટ સર્ટિફિકેટ આપવા પર પ્રતિબંધ મુકવા જેવા પગલાં લઈ શકાય છે. આવા વાહનોની માલિકીમાં થતા ફેરફારને પણ અટકાવી શકાય છે.
કોર્ટે એમ પણ કહ્યું કે, જ્યાં સુધી ચલણની રકમ ચૂકવવામાં ન આવે ત્યાં સુધી વાહનનું ફિટનેસ સર્ટિફિકેટ તેમને મોકલવું ન જોઈએ. આવા વાહનોને પરીવાહન પોર્ટલ પર બ્લેકલિસ્ટ કરવા અને ડ્રાઇવિંગ લાયસન્સના રિન્યુઅલ પર પ્રતિબંધ જેવા પગલાં પણ લેવામાં આવી શકે છે.
આ ઉપરાંત, પહેલેથી જ મોકલી આપેલા ડ્રાઇવિંગ લાયસન્સ (DL) સસ્પેન્ડ કરવા અને વાહનનું PUC પ્રમાણપત્ર ન આપવા જેવા પગલાં લેવા પર પણ વિચારણા કરવામાં આવે તેવું કહેવામાં આવ્યું હતું. કોર્ટે કહ્યું કે વાહનોનું રેન્ડમ ચેકિંગ કરવું જોઈએ અને જો કોઈ વાહનનું E-ચલણ ચૂકવવામાં આવ્યું નથી, તો જરૂર જણાય તો વાહન જપ્ત કરવાની કાર્યવાહી પણ કરવામાં આવે.
જસ્ટિસ J.B. પારડીવાલાએ કહ્યું કે, દેશમાં આવી સિસ્ટમને અસરકારક બનાવવા માટે જમીની વાસ્તવિકતાને ધ્યાનમાં રાખીને રસ્તો શોધવો પડશે. જો કે ટ્રાફિક ચલણને વીજ બિલમાં ઉમેરવાની બાબત કોર્ટ દ્વારા સૂચન તરીકે જ કહેવામાં આવી છે, પરંતુ તેનો અમલ કરવાનો કોઈ આદેશ આપવામાં આવ્યો નથી.