અધિકારીઓની ઑફિસોની ચક્કર લગાવી રહેલા સેવાનિવૃત્ત જવાને ન્યાય ન મળવા પર મૃત્યુદંડની માગ કરી છે. તેણે મ્યુનિસિપલ કોર્પોરેશન પર બળજબરીપૂર્વક તેમના પ્લોટમાં નાળુ નિર્માણ કરાવવાનો આરોપ લગાવ્યો છે. તેમણે જણાવ્યું હતું કે તેઓ IGRS પોર્ટલ પર પણ 1500 કરતા વધુ ફરિયાદ કરી ચૂક્યા છે, પરંતુ પાલિકાએ પોતાના હિસાબે ફરિયાદનો નિકાલ કર્યો છે. ખાતાખેડીના રહેવાસી સેવાનિવૃત્ત જવાન મોહમ્મદ શાહિદ મંગળવારે ગળામાં પ્લેકાર્ડ લટકાવીને કલેક્ટ્રેટ પહોંચ્યા હતા.
પ્લેકાર્ડ પર લખ્યું હતું કે, ફૌજીને મૃત્યુદંડ કે અધિકારીઓ પાસેથી ન્યાય. શાહિદે જણાવ્યું હતું કે, 24 વર્ષ સેનામાં સેવા બાદ તેઓ વર્ષ 2019માં સેવાનિવૃત્ત થયા. ફંડમાં મળેલા પૈસાઓથી તેમણે ખાતાખેડીમાં પ્લોટ ખરીદ્યો હતો. આરોપ છે કે મ્યુનિસિપલ કોર્પોરેશને બળજબરીપૂર્વક તેમને પોલીસ સ્ટેશનમાં બેસાડીને તેમના પ્લોટમાં નાળાનું નિર્માણ કરાવી દીધું, જેનાથી તેમની 8 લાખ રૂપિયાની જમીન નાળામાં જતી રહી.
આરોપ છે કે રસ્તાની બીજી બાજુના લોકોએ પાલિકાની જમીન કબજો કરી રાખ્યો છે. તેમના પર કાર્યવાહીની જગ્યાએ પાલિકાએ તેમણે ખરીદેલા પ્લોટને જ ટારગેટ કર્યો. શાહિદે જણાવ્યું હતું કે, આ મામલાની તપાસ SDM સદર અને મહેસૂલ વિભાગના કર્મચારીઓએ કરી હતી. પ્લોટની માપણી સાચી હોવાનું જાણવા મળ્યું હતું, પરંતુ કોર્પોરેશને વહીવટીતંત્રની તપાસ સ્વીકારી નહોતી. આરોપ છે કે તેમની ફરિયાદોનો નિકાલ પાલિકા પોતે જ કરી રહી છે.
તેમણે જિંદગીભરની કમાણી આ પ્લોટમાં લગાવી દીધી હતી. એવામાં તેમના બાળકો રસ્તા પર આવી જશે. પોર્ટલ પર કરવામાં આવેલી ફરિયાદોને લઇને કોર્પોરેશન ખોટો રિપોર્ટ મોકલી રહી છે તેમજ શાસન અને પ્રશાસનને ભરમાવી રહી છે. સેવાનિવૃત્ત જવાનનું કહેવું છ કે, જો તેમને શાસન પ્રશાસન ન્યાય નહીં આપી શકે તો તેમને મૃત્યુદંડ આપવામાં આવે. તેમણે પાલિકાના ભ્રષ્ટ અધિકારીઓની તપાસ કરવાની માગ ઉઠાવી હતી. પીડિતે DMને આવેદન આપ્યું હતું. DM મનીષ બંસલે ઘટનાની તપાસ કરાવીને કાર્યવાહીનું આશ્વાસન આપ્યું હતું.
