લદ્દાખના આબોહવા કાર્યકર્તા સોનમ વાંગચુકને પોલીસે 2 ઓક્ટોબરની સાંજે મુક્ત કર્યા હતા. તે લગભગ 36 કલાક સુધી કસ્ટડીમાં હતો. સોનમ વાંગચુકે કહ્યું કે, કેન્દ્રીય ગૃહ મંત્રાલયે તેમને તેમની ચિંતાઓ દૂર કરવા માટે ટૂંક સમયમાં PM અથવા રાષ્ટ્રપતિની સાથે મુલાકાત કરાવવાનું આશ્વાસન આપ્યું છે.
મીડિયા સૂત્રોના અહેવાલ મુજબ, 2 ઓક્ટોબરે તેમની મુક્તિ પછી, સોનમ વાંગચુક અને લદ્દાખના અન્ય લોકોએ મહાત્મા ગાંધીના સ્મારક રાજઘાટ પર જઈને તેમને શ્રદ્ધાંજલિ આપી હતી. આ સાથે તેમણે ઉપવાસ સમાપ્ત કરવાની પણ જાહેરાત કરી હતી. સોનમ વાંગચુકે મીડિયાને જણાવ્યું કે, અમે સરકારને અમારી માંગણીઓનું એક મેમોરેન્ડમ આપ્યું છે. હિમાલયના સ્થાનિક લોકોને સશક્ત બનાવવા જોઈએ કારણ કે માત્ર તેઓ જ તેનું શ્રેષ્ઠ રીતે સંરક્ષણ કરી શકે છે. અમે લદ્દાખ માટે લોકતાંત્રિક વ્યવસ્થાની માંગ કરી છે અને છઠ્ઠી સૂચિ પણ તેનો એક ભાગ છે. આગામી દિવસોમાં અમે PM, રાષ્ટ્રપતિ કે ગૃહમંત્રીને મળીશું. ગૃહ મંત્રાલયે અમને આ ખાતરી આપી છે. બેઠકની તારીખ એક-બે દિવસમાં કન્ફર્મ કરવામાં આવશે.
એક વરિષ્ઠ પોલીસ અધિકારીએ મુક્તિ વિશે માહિતી આપતા કહ્યું, રાજધાનીના મધ્ય ભાગોમાં કલમ 163 લાગુ કરવામાં આવી છે. તે લોકોને ત્યાં એકઠા નહીં થવાની અને કોઈ યાત્રાનું આયોજન નહીં કરવાની ખાતરી આપ્યા પછી જ તેઓને જવા દેવામાં આવ્યા હતા.
સોનમ વાંગચુકને બવાના પોલીસ સ્ટેશનમાં જ્યારે અન્ય પદયાત્રીઓને દિલ્હી-હરિયાણા બોર્ડર પરના અન્ય ત્રણ પોલીસ સ્ટેશનમાં રાખવામાં આવ્યા હતા. પોલીસ સૂત્રોનું કહેવું છે કે, સરકાર સાથેની બેઠક માટે વાંગચુક હજુ થોડા દિવસ દિલ્હીમાં રહી શકે છે.
અહીં તમને જણાવી દઈએ કે, સોનમ વાંગચુક એક મહિના પહેલા લેહથી શરૂ થયેલી ‘દિલ્હી ચલો પદયાત્રા’નું નેતૃત્વ કરી રહ્યા છે. આ કૂચ 1લી સપ્ટેમ્બરે શરૂ થઈ હતી. તેનો ઉદ્દેશ્ય ચાર મુદ્દાના એજન્ડા પર લદ્દાખના નેતૃત્વ સાથે અટકેલી વાટાઘાટોને ફરીથી શરૂ કરવાની કેન્દ્રને માંગ કરવાનો છે. આ માંગણીઓ છે, રાજ્યનો દરજ્જો, બંધારણની છઠ્ઠી સૂચિનું વિસ્તરણ, લદ્દાખ માટે જાહેર સેવા આયોગ સાથે વહેલી ભરતી પ્રક્રિયા અને લેહ અને કારગિલ જિલ્લાઓ માટે અલગ લોકસભા બેઠકો. કૂચની શરૂઆત કરતા વાંગચુકે આશા વ્યક્ત કરી હતી કે, ગાંધી જયંતિ પર જ્યારે તેઓ દિલ્હી પહોંચશે ત્યારે સરકાર તેમને સારા સમાચાર આપશે.
