નરહરિ જીરવાલ સહિત મહારાષ્ટ્ર સરકારનો ભાગ એવા રાષ્ટ્રવાદી કોંગ્રેસ પાર્ટી (NCP)ના નેતાઓ અને ધારાસભ્યોએ મહારાષ્ટ્ર મંત્રાલયના ત્રીજા માળેથી કૂદી પડયા હતા. રાહતની વાત એ છે કે, તે બિલ્ડિંગમાં લાગેલી સેફ્ટી નેટમાં ફસાઈ ગયા હતા. આનાથી તેમનો જીવ બચી ગયો. પોલીસે ઘટનાસ્થળે પહોંચીને તેમને સુરક્ષિત બહાર કાઢ્યા હતા. અહીં તમને જણાવી દઈએ કે, જીરવાલ વિધાનસભામાં ડેપ્યુટી સ્પીકર પણ છે.
આદિવાસી સમુદાયના ચૂંટાયેલા ધારાસભ્યો અને સાંસદોના જૂથે શુક્રવારે રાજ્ય સરકારના મુખ્યાલય મંત્રાલયમાં વિરોધ પ્રદર્શન કર્યું હતું. CM એકનાથ શિંદેને મળી ન શકવાને કારણે ધારાસભ્યો આત્મહત્યાના પ્રયાસોને રોકવા માટે બિલ્ડિંગની અંદર લગાવવામાં આવેલી સુરક્ષા નેટ પર ચઢી ગયા હતા.
વિધાનસભાના ડેપ્યુટી સ્પીકર ઉપરાંત NCPના ધારાસભ્ય નરહરિ જીરવાલ, બહુજન વિકાસ આઘાડીના ધારાસભ્ય રાજેશ પાટીલ અને BJPના સાંસદ હેમંત સાવરા પણ આદિવાસી સમુદાયમાંથી આવે છે. તે બધા, અન્ય બે સાથે, મંત્રાલયમાં આત્મહત્યાના પ્રયાસોને રોકવા માટે સ્થાપિત સુરક્ષા નેટ પર કૂદી પડ્યા. કહેવાય છે કે તેઓ CM શિંદેથી નારાજ હતા.
આ ઘટના પછી પોલીસની ટીમ ઘટનાસ્થળે પહોંચી હતી અને તેમને બહાર કાઢ્યા હતા. ઉંચાઈ પરથી પડી જવાને કારણે જીરવાલનું બ્લડપ્રેશર વધી ગયું હતું. તેમની તબિયત તપાસવા માટે ડોક્ટરોની ટીમ પણ મંત્રાલય પહોંચી હતી. હાલમાં તેમને સુરક્ષા વચ્ચે મંત્રાલયમાં જ એક જગ્યાએ રાખવામાં આવ્યા છે.
આ તમામ લોકો PESA કાયદા હેઠળ આદિવાસી યુવાનોની ભરતી પરના પ્રતિબંધને હટાવવાની માંગ કરી રહ્યા છે. તેઓ ધનગરને અનુસૂચિત જનજાતિ (ST) ક્વોટામાંથી અનામત આપવાની માંગનો પણ વિરોધ કરી રહ્યા છે.
જ્યારે આ ઘટના બની ત્યારે, રાજ્ય કેબિનેટની બેઠક મંત્રાલયમાં ચાલી રહી હતી. આ તમામ શુક્રવારે બપોરે મંત્રાલય પહોંચ્યા હતા. જીરવાલ, પાટીલ અને સાવરા સાત માળની ઈમારતના બીજા માળે સેફ્ટી નેટ પર ચઢ્યા હતા. દરમિયાન, કિરણ લહમતે, હિરામન ખોસકર જેવા અન્ય ધારાસભ્યોએ તે જ ફ્લોર પર કોરિડોરમાં ધરણા શરૂ કર્યા. તેમને બીજા માળના કોરિડોરમાં ઉતરતા પહેલા સુરક્ષાકર્મીઓએ ઘણું સમજાવવું પડ્યું હતું.
વિરોધ પ્રદર્શનનું નેતૃત્વ કરી રહેલા જીરવાલે કહ્યું, ‘CM શિંદે સાથે મીટિંગ કરતા પહેલા અમે મંત્રાલય છોડીશું નહીં.’ તેમણે કહ્યું કે, જો અમારી માંગણીઓ નહીં સંતોષાય તો અમે રાજ્યવ્યાપી આંદોલન શરૂ કરીશું.
અહીં તમને જણાવી દઈએ કે, ધનગર સમુદાય પહેલાથી જ OBC હેઠળ સબ-કેટેગરીમાં આરક્ષણ ભોગવે છે, તેઓ માંગ કરી રહ્યા છે કે તેમને ST કેટેગરીમાં સામેલ કરવામાં આવે.
