એક તરફ, મહારાષ્ટ્રની ચૂંટણીમાં, જ્યારે મહા વિકાસ અઘાડી એટલે કે MVA (શરદ પવાર-ઉદ્ધવ ઠાકરે-કોંગ્રેસ)માં સીટોની લડાઈ ચાલી રહી છે, ત્યારે બીજી તરફ, ઉદ્ધવ ઠાકરે (UBT)ના એક નેતાને કારણે પાર્ટી માટે વિચિત્ર સ્થિતિ સર્જાઈ છે. હકીકતમાં, શિવસેના (UBT)ના ઉમેદવાર કિશનચંદ તનવાણીએ 2014ની ચૂંટણી જેવી સંભવિત પ્રતિકૂળ પરિસ્થિતિઓનો ઉલ્લેખ કરીને ઔરંગાબાદ સેન્ટ્રલ મતવિસ્તારમાંથી ચૂંટણી ન લડવાનો નિર્ણય કર્યો. તનવાણીએ એવા સમયે પોતાનું નામ પાછું ખેંચ્યું છે જ્યારે મંગળવારે નોમિનેશનનો અંતિમ દિવસ છે. ઉદ્ધવે આવતીકાલે જ સંભાજીનગર સેન્ટ્રલ સીટ પરથી અન્ય ઉમેદવાર ઉભા રાખવા પડશે અને ઉમેદવારી નોંધાવવી પડશે.
અત્રે ઉલ્લેખનીય છે કે, 2014માં ઓલ ઈન્ડિયા મજલિસ-એ-ઈત્તેહાદુલ મુસલમીન (AIMIM)ના ઈમ્તિયાઝ જલીલે છત્રપતિ સંભાજીનગર શહેરના ઔરંગાબાદ સેન્ટ્રલ વિસ્તારમાંથી શિવસેના (અવિભાજિત) ઉમેદવાર પ્રદીપ જયસ્વાલને હરાવ્યા હતા. અને BJPની ટિકિટ પર ચૂંટણી લડનારા તનવાણી ત્રીજા સ્થાને રહ્યા હતા.
ઉદ્ધવ ઠાકરેની આગેવાની હેઠળની શિવસેનાએ ગયા અઠવાડિયે તનવાણીની ઉમેદવારીની જાહેરાત કરી હતી. તનવાણીએ દાવો કર્યો હતો કે તે 2019માં આવી જ પરિસ્થિતિને કારણે ચૂંટણી મેદાનમાંથી હતી ગયા હતા અને જયસ્વાલને ચૂંટણી જીતવામાં મદદ કરી હતી. તેમણે પત્રકારોને કહ્યું, ‘મેં મારી ચૂંટણીની સંભાવનાઓ માટે જયસ્વાલ પાસે મદદ માંગી હતી, પરંતુ તેઓ આગળ આવ્યા ન હતા. મેં ઉદ્ધવ ઠાકરે સાથે વાત કરી નથી. હું તેમની સાથે વાત કરીશ અને તેમની સૂચના મુજબ કામ કરીશ. મારું AB (અધિકૃતતા) ફોર્મ શિવસેનાના નેતા અંબાદાસ દાનવે પાસે છે.’
સોમવારે સાંજે એક પત્રકાર પરિષદને સંબોધતા, વિધાન પરિષદમાં વિપક્ષના નેતા અંબાદાસ દાનવેએ જણાવ્યું હતું કે, પાર્ટીના શહેર એકમના વડા બાળાસાહેબ થોરાત ઔરંગાબાદ મધ્યથી ઉમેદવાર હશે. દાનવેએ કહ્યું, ‘શિવસેના (UBT) પ્રમુખ ઉદ્ધવ ઠાકરેના આદેશ મુજબ, તનવાણીને જિલ્લા અધ્યક્ષ પદેથી મુક્ત કરવામાં આવ્યા છે.’
અસદુદ્દીન ઓવૈસીની આગેવાની હેઠળની AIMIMએ 20 નવેમ્બરની વિધાનસભા ચૂંટણી માટે 2019માં ઔરંગાબાદ સેન્ટ્રલ બેઠક પરથી જયસ્વાલ દ્વારા પરાજય પામેલા નસીર સિદ્દીકીની ઉમેદવારીની જાહેરાત કરી છે.
અત્રે ઉલ્લેખનીય છે કે, સંભાજીનગર મધ્ય બેઠક શિવસેનાનો ગઢ માનવામાં આવે છે. કિશનચંદ તનવાણી અને પ્રદીપ જયસ્વાલ બંનેના નામ કટ્ટર શિવસૈનિકોમાં આવે છે. પરંતુ પક્ષમાં વિભાજનના કારણે મતદારો ચૂંટણીમાં વિભાજિત થઇ જાય છે. મહારાષ્ટ્રની તમામ 288 બેઠકો માટે 20 નવેમ્બરે મતદાન થવાનું છે જ્યારે પરિણામ 23 નવેમ્બરે જાહેર કરવામાં આવશે.
