Quacquarelli Symonds (QS) વેબસાઇટ, જે દેશ અને વિશ્વની ટોચની યુનિવર્સિટીઓની રેન્કિંગ બહાર પાડે છે, તેણે વર્લ્ડ યુનિવર્સિટી રેન્કિંગ: એશિયા 2025ની યાદી બહાર પાડી છે. QS દ્વારા જાહેર કરાયેલ એશિયા યુનિવર્સિટી રેન્કિંગમાં 984 યુનિવર્સિટીઓમાં કુલ 22 ભારતીય સંસ્થાઓનો સમાવેશ કરવામાં આવ્યો છે. છ ભારતીય સંસ્થાઓએ એશિયાની ટોચની 100 સંસ્થાઓમાં સ્થાન મેળવ્યું છે. દક્ષિણ એશિયા રેન્કિંગમાં IIT બોમ્બેને પાછળ છોડીને IIT દિલ્હીએ પ્રથમ રેન્ક હાંસલ કર્યો છે. આ સાથે જ ચીને ટોપ-10માં પોતાનું વર્ચસ્વ સ્થાપિત કર્યું છે. પેકિંગ યુનિવર્સિટીનું વર્ચસ્વ ચાલુ રહે છે. તેણે સતત બીજા વર્ષે ટોચનું સ્થાન મેળવ્યું છે, ત્યારપછી યુનિવર્સિટી ઓફ હોંગકોંગ બીજા સ્થાને અને નેશનલ યુનિવર્સિટી ઓફ સિંગાપોર ત્રીજા સ્થાને છે.
ભારતની ઇન્ડિયન ઇન્સ્ટિટ્યૂટ ઑફ ટેક્નોલોજી, દિલ્હી (IITD)એ સમગ્ર એશિયામાં 44મું સ્થાન મેળવ્યું છે. આ પછી, ઇન્ડિયન ઇન્સ્ટિટ્યૂટ ઑફ ટેક્નોલોજી બોમ્બે (IITB) 48માં સ્થાને અને ઇન્ડિયન ઇન્સ્ટિટ્યૂટ ઑફ ટેક્નોલોજી મદ્રાસ (IITM) 56માં સ્થાને, લિસ્ટમાં સામેલ આ સંસ્થાન દેશની ટોચની 3 યુનિવર્સિટીઓ છે.
એશિયામાં ટોચની ભારતીય યુનિવર્સિટીઓ 2025: ઇન્ડિયન ઇન્સ્ટિટ્યૂટ ઑફ ટેક્નોલોજી દિલ્હી (IITD)-ક્રમ 44, ઇન્ડિયન ઇન્સ્ટિટ્યૂટ ઑફ ટેક્નોલોજી બોમ્બે (IITB)-ક્રમ 48, ઇન્ડિયન ઇન્સ્ટિટ્યૂટ ઑફ ટેક્નોલોજી મદ્રાસ (IITM)-ક્રમ 56, ઇન્ડિયન ઇન્સ્ટિટ્યૂટ ઑફ ટેક્નોલોજી ખડગપુર (IIT-KGP)-ક્રમ 60, ઇન્ડિયન ઇન્સ્ટિટ્યૂટ ઑફ સાયન્સ બેંગલુરુ (IISc)-ક્રમ 62, ઇન્ડિયન ઇન્સ્ટિટ્યૂટ ઑફ ટેક્નોલોજી કાનપુર (IITK)-ક્રમ 67.
દક્ષિણ એશિયન કેટેગરીમાં ભારત અને પાકિસ્તાનની યુનિવર્સિટીઓનો સમાવેશ થાય છે, ઇન્ડિયન ઇન્સ્ટિટ્યૂટ ઑફ ટેક્નોલોજી દિલ્હી (IITD) એ 308 યુનિવર્સિટીઓમાં ટોચનું સ્થાન મેળવ્યું છે. દક્ષિણ એશિયાની શ્રેણીમાં ટોચની 10 યુનિવર્સિટીઓમાં 7 ભારતીય યુનિવર્સિટીઓનો સમાવેશ કરવામાં આવ્યો છે. નેશનલ યુનિવર્સિટી ઓફ સાયન્સ એન્ડ ટેક્નોલોજી (NUST) ઈસ્લામાબાદએ ઈન્ડિયન ઈન્સ્ટિટ્યૂટ ઓફ ટેક્નોલોજી કાનપુર (IITK) સાથે સાઉથ એશિયન કેટેગરીમાં છઠ્ઠું સ્થાન મેળવ્યું છે.
અહીં તમને જણાવી દઈએ કે, QS યુનિવર્સિટી રેન્કિંગ યુનિવર્સિટીઓની આ રેન્કિંગ ઈન્ટરનેશનલ ફેકલ્ટી, PHD ધરાવતા કર્મચારીઓ, ફેકલ્ટી અને સ્ટુડન્ટ્સનો રેશિયો, ઈનબાઉન્ડ એક્સચેન્જ, એકેડેમિક રેપ્યુટેશન, પ્રતિ પેપર ઉદ્ધરણ, ફેકલ્ટી દીઠ પેપર્સ, ઈન્ટરનેશનલ રિસર્ચ નેટવર્ક, ઈન્ટરનેશનલ સ્ટુડન્ટ્સ, આઉટબાઉન્ડ વિનિમય અને એમ્પ્લોયર પ્રતિષ્ઠા પર આધારિત છે.
